Josuépa latsapanta trukatsiqta revelacioncho rikanqan
3
Tsaypitanami Tayta Dios rikatsimarqan mandaq sacerdöti Josuéta.† Pay ichiraykarqan Tayta Diospa angelninpa ñöpanchömi. Josuépa derëchanchömi Satanás kaykarqan payta acusarnin.† 2 Acusaptinmi Tayta Diospa angelnin nirqan: “¡Tayta Diosmi upällakunaykipä nikäshunki, Satanás!† ¡Jerusalénta akraq Tayta Diosmi upällakunaykipä nikäshunki! Kay runaqa ¿manaku kaykan lunyaykaq ninapita jipirishqa shanshaykaq carbonnö?”3 Josuéqa pasaypa qanra latsapan jatishqami angelpa ñöpancho ichiraykarqan. 4 Tsaymi yanapaqninkunata ángel nirqan: “Jatiraykanqan qanra latsapanta jipitsiyay” nir.a
Nirkurmi Josuéta nirqan: “Llapan jutsaykipitami perdonashqä. Kananqa kuyayllapä latsapata jatitsiyäshunaykipämi nishä”.†
5 Tsaypitanami nirqan: “Mandaq sacerdöti jatikunan limpiu görrata Josuéta jatitsiyay”.
Tsaymi limpiu görrata jatitsiyarqan. Tsaynöllami kuyayllapä latsapatapis jatitsiyarqan. Tsaynö jatitsiyaptinmi Tayta Diospa angelnin ñöpancho ichiraykarqan.
6 Jatiskatsiyaptinnami Josuéta Tayta Diospa angelnin nirqan: 7 “Llapanta mandaq Tayta Diosmi nin: ‘Llapan ninqäta cäsukuptikiqa templüta y patiunta rikanaykipämi churashayki. Tsaynöpis churashayki sirvimaq angelnïkunanö kanaykipämi.
8 “ ‘Mandaq sacerdöti Josué, qampis y sacerdöti mayikikunapis shumaq wiyayämay. Qamkunaqa señalnömi kaykäyanki.b Tsaymi sirviykäyämaptiki Renuevo ninqan sirvimaqnï runata† kachamushä.
9 “ ‘Ñöpaykiman churanqä rumita rikay. Tsay rumiqa qanchis ñawiyuqmi kaykan. Tsay rumimanqa kikïmi qellqashä. Tsaymi juk junaqllacho runakunapa jutsankunata perdonashä. Noqa llapanta mandaq Tayta Diosmi tsaynö nï. 10 Tsay junaqmi cada ünuykikuna üva jachaykikuna chakincho y hïgus jachaykikuna chakincho vecïnuykikunawan kushishqa jamakuyanki.† Noqa llapanta mandaq Tayta Diosmi tsaynö nï’ ”.