Nehemías
Jerusalénpä Tayta Diosta Nehemías mañakunqan
1
Kay libruchömi qellqaraykan Hacalíaspa tsurin Nehemías ruranqankuna.Artajerjes ishkay chunka (20) watana Persia nacionpa mandaqnin rey kaykaptinmi Quisleu killacho noqa Nehemías Susa markacho kaykarqä. 2 Tsaycho kaykaptïmi Judápita shamuq runakunawan wawqï Hanani watukamaq chämurqan. Paykunatami tapurqä Jerusalén marka imanö kaykanqanta y Judácho quëdamuq runakuna imanö kaykäyanqantapis. 3 Tsaymi niyämarqan: “Judá provinciacho quëdamuq runakuna pasaypa kuyapaypä y penqakuypämi ñakaykäyan. Jerusalénpa murällanpis chipyaq juchutsishqami kaykan. Punkunkunatapis rupatsirmi ushayashqa”.
4 Tsaynö willayämaptinmi jamaykur pasaypa waqarqä. Tsaynöpis atska junaq llakishqa qoyarmi ciëlucho kaykaq Tayta Diosta mañakur ayunarqä. 5 Mañakurmi nirqä:
“Ciëlucho kaykaq Tayta Dios, llapanpä munayyuq y mantsariypämi kanki. Pactuta rurar awninqaykinöllami kuyashuqnikikunata y mandamientuyki cumpliqkunata imaypis kuyanki. 6 Sirvishuqniki Israel runakunapä paqaspa junaqpa mañakamunqäta wiyaykallämay. Mana cäsukuypami Israel mayïkuna jutsata rurayashqa. Tsaynöllami castäkunapis y noqapis jutsata rurashqä. 7 Qamta mana cäsukurmi llutanta rurayashqä. Manami cumpliyashqätsu sirvishuqniki Moiséswan willakatsiyämanqayki mandamientuykikunata, estatütuykikunata y leynikikunata. 8 Moisésta ninqaykita yarpaykullay. Paytami nirqayki: ‘Jutsata rurayaptikiqa maytsaypapis mashtaypa mashtarmi qarquyäshayki. 9 Tsaynö kaptinpis yapay cäsukamar mandamientükunata cumpliyaptikiqa maytsaycho mashtakashqa kayaptikipis tänäpä akranqä sitiumanmi qoriyämushayki’.
10 “Noqakunaqa sirvishuqniki y kuyanqayki runakunami kaykäyä. Munaynikiwanmi unay castäkunata Egiptupita jipimurqayki. 11 Tayta Dios, rugakamunqäta wiyaykallämay. Sirviqniki karmi jutikita joqarir qamta alabayä. Tsaynöpis reyta tantiyaykatsillay rugakuptï yanapaykamänanpä”.
Tsay witsan noqaqa rey Artajerjespa vïnu sirviqninmi karqä.