Mayor wawqikunapä ninqan
5
1 Mayor wawqikuna, noqapis qamkunanö mayor wawqim kä. Jesucristo ñakanqankunatam rikarqü. Jesucristo kutimurmi llapantsiktapis qorikamäshun. Tsaymi qamkunata yätsï: 2 Tayta Diosman criyikuqkunata rikayänaykipä churashqa kaykarqa üsha mitsiqkuna üshankunata cuidayanqannö shumaq cuidayay.a Qelanaykar cuidayänaykipa rantinqa alli voluntäwan cuidayay. Ama qellaypä raykullaqa cuidayankitsu, sinöqa Tayta Dios munanqannö kushishqa cuidayanki.
3 Yaqa patronnöqa criyikuq mayikikunata ama ñakatsiyankitsu, sinöqa allita rurar kawayay paykunapis rikayäshurniki allita rurar kawayänanpä. 4 Tsaynö kawarmi pastorkunapa pastornin Jesucristob kutimuptin imayyaqpis mana ushakaq corönata chaskiyanki.
Tayta Diospa poderninchö kawanapä ninqan
5 Jövinkuna, mayor wawqikunata cäsuyay. Llapaykipis mana yachaq tukur respitanakuyay. Yachaq tukuqkunataqa Tayta Dios manam yanapantsu. Peru humildi kaqkunatam sïqa kuyapar yanapan.c 6 Tsaynö kaykaptinqa poderösu Tayta Diosta cäsur mana yachaq tukur kawayay. Paymi dispöninqan höra chämuptin respitashqa kayänaykipä churayäshunki.d 7 Tayta Dios yanapaykäyäshuptikiqa llapan llakikuynikikunata paypa poderninman churayay.e
8 Shumaq tantiyakurnin maya mayalla kawayay. Chikimaqnintsik diabluqa imayka mallaqashqa leonnömi pitapis jutsata ruratsinanpä qayararrä puriykan. 9 Criyikuq mayintsikkuna maytsaychöpis qamkunanö ñakayanqanta musyaykarqa Tayta Diosman yärakur diabluta ama cäsuyaytsu.
10 Noqantsik raykur Jesucristo wanushqa kaptinmi kuyapäkuq Tayta Dios qayamarquntsik gloriachö imayyaqpis kawanantsikpä. Tsaymi kay patsachö ñakashqapis Tayta Dios yanapamäshun jutsata mana ruranantsikpä, pay munanqannö kawanantsikpä y payman shumaq yärakunantsikpä. 11 ¡Tayta Dios poderösu kanqanpita imayyaqpis alabashqa kaykullätsun! Amén.
Cartapa ushanan
12 Wawqintsik Silvanuwanmif kay cartata cartakayämü. Payqa Tayta Dios munanqannömi imaypis kawan. Kay cartächömi qamkunapä qellqamü Tayta Dios kuyapäyäshunqaykita tantiyayänaykipä. Payman imaypis yärakuyay.
13 Babiloniachög criyikuq mayintsikkunam saludakayämushunki. Paykunatapis qamkunatanöllam Tayta Dios akrayäshurquyki. Tsaynöllam kuyanqä wawqintsik Marcuspish saludakayämushunki.
14 Jukniki juknikipis cäraykikunachö mutsanakur saludanakuyay. Jesucristuchö kaqkuna alli kawaychö kaykuyällay. [Amén.]