Jesús yurinqan
2
1 Tsay witsanmi Augusto César willakatsirqan mandanqan nacionkunachö llapan runakuna censakuyänanpä. 2 Tsay punta kaq censakuy karqan Cirenio jutiyuq runa Siria provinciachö gobernador kaykaptinmi. 3 Llapan runakunam unay castankunapa markanman censakuyänanpä aywayarqan.
4 Unay castan rey David Belénchö yurishqa kaptinmi Josépis Galileachö kaykaq Nazaretpita Judeachö kaykaq Belénman censukuq aywarqan. 5 Warmin kananpä parlashqana karmi Maríatapis pusharqan. Maríaqa tsay junaqkuna qeshyakunanpänam kaykarqan. 6 Belénchö kaykäyaptinnam nanay tsariskirqan. 7 Tsaychönam mayor wamranta qeshyakurqan. Qorpakuna patsakuyänan cuartuchö posäda mana kaptinmi inchanawan piturkur ashmakunapa mikukuyänallanman punuykatsirqan.a
Üsha mitsiqkunata angelkuna yuripunqan
8 Tsay paqasmi Belén marka washa lädunchö üsha mitsiqkuna üshankunata cuidaykäyarqan. 9 Tsayman ángel yuripuskiptinmi Tayta Diospa chipipiynin juntapaykurqan. Tsayta rikaykurmi üsha mitsiqkuna pasaypa mantsakäyarqan. 10 Angelnam nirqan: “Ama mantsakäyaytsu. Llapan runakuna kushikuyänanpämi alli willakuyta apamurqü. 11 Kananmi rey Davidpa markanchö juk salvador yurishqa. ¡Payqa Señornintsik Cristum! 12 Kay willanqä rasun kanqanta musyayänaykipä kanan aywarmi ashmakuna mikukuyänanchö llullu wamrata inchashqa punuykaqta tariyanki”.
13 Ángel tsaynö parlaykaptinmi atska angelkunana yuriskir Tayta Diosta alabar niyarqan:
14 “¡Ciëluchö kaqkuna Tayta Diosta alabaykuyällätsun!
¡Kay patsachöpis Tayta Dios kuyanqan kaqkunapä alli kaway kaykullätsun!”
15 Angelkuna ciëluman kutiskiyaptinnam mitsikuqkuna juknin jukninpis ninakuyarqan: “Tayta Dios angelkunawan willamanqantsiknö aku Belénman aywar rikamushun”.
16 Tsaynö nir empëñu aywarmi Josétawan Maríata y llullu wamrata tariyarqan. Wamranam ashmakunapa mikukuyänanchö kaykarqan. 17 Rikaykurmi willakuyarqan llullupä ángel willanqankunata. 18 Willakuyaptinmi llapan wiyaqkuna kushikuyarqan. 19 Maríanam shonqunllachö tsay llapan päsanqankunata yarpararqan. 20 Ángel willanqannölla llapantapis tariykurmi üsha cuidaqkuna rikayanqanpita y wiyayanqanpita Tayta Diosta alabarnin kutikuyarqan.
Nacimiento de Jesús
Nïñu Jesústa templuman apayanqan
21 Wamra puwaq junaqyuq kaykaptinmi pallunchö señalatsiyarqan. María manarä qeshyaq kaptin ángel ninqannöllam llullupa jutinta churayarqan Jesústa.
22 Moisés qellqanqan leykunachö ninqannöllam María qeshyakunqanpita purificakunan junaq chämuptinb Tayta Diospa poderninman churayänanpä Joséwan María Jerusalén templuman llulluta apayarqan. 23 Tsaynö apayänanpämi Tayta Diospa leynin qellqashqachö nin: “Mayor ollqu tsurikiqa Tayta Diospam kanqa”.c
24 Tsaynöllam Diospa leynin qellqashqachö nin: “Ishkay kullkushkunata o ishkay pushapa palumakunatam apamunqa”.d Tsay ninqantapis cumpliyänanpämi templuman aywayarqan.
25 Tsay witsanmi Jerusalénchö Simeón jutiyuq runa karqan. Payqa alli ruraq karmi Tayta Diosman yärakur kawarqan. Tsaynöllam Israel runakuna ñakayanqanpita Cristo jipinanpä kaqta shuyararqan. Payqa Espíritu Santupa poderninchömi kawaq. 26 Paytam Espíritu Santu musyatsirqan Tayta Dios mandamunqan Cristuta rikaykurrä wanunanpä. 27 Tsaynö tantiyatsiptinmi templuman Simeón aywarqan. Tsaymannam Maríawan José Tayta Diospa leyninchö ninqanta cumpliyänanpä Jesústa chätsiyarqan. 28 Simeónnam llulluta marqarkur Tayta Diosta alabar nirqan:
29 “Tayta Diosllä, nimanqaykita cumplirquykinam.
Kananmi sïqa tranquïluna wanukushä.
30 Mandamunqayki salvadortam rikarqüna.
31 Paytam mandamurquyki maytsaychö täraq runakunata salvanaykipä.
32 Mana Israel runakunapäpis aktsim kanqa.
Pay raykurmi kuyanqayki Israel runakunapis reqishqa kayanqa”.
33 Simeón ninqankunata wiyarmi José y María kushikuyarqan. 34 Simeónnam Tayta Diosta mañakurqan bendicionninta paykunaman churananpä. Jesúspa maman Maríatanam nirqan: “Kay llullutam Tayta Dios churamushqa wakin Israel mayintsikkunata salvananpä y wakintana juzgananpä. Paytaqa atskaq runakunam chikiyanqa. 35 Tsaynöpam runakuna allita o mana allita yarpäyanqanpis musyakanqa. Tsaykuna päsaptinmi qampa shonquyki espädawan tuksiykushqanörä nananqa”.
36 Templupa patiunchömi Tayta Diospa profëtan Ana jutiyuq chakwanpis kaykarqan. Paypa taytanqa Aser trïbupita Fanuelmi karqan. Payqa qanchis watallam runanwan täyarqan. 37 Puwaq chunka chusku (84) watam viüdalla kakurqan. Templupa patiunpita mana yarquypam paqaspapis junaqpapis ayunar Tayta Diosman mañakuq. 38 Simeón mañakur ushaskiptinmi Anapis Jesúsman witiykur Tayta Diosta agradëcikurqan. Tsaypitanam Tayta Dios mandamunqan Cristuta shuyaraykaq runakunata nirqan: “Kay llullum shuyanqantsik salvador kaykan”.
39 Tayta Diospa leyninchö ninqannö cumpliskirmi José y María Galilea Nazaret markanman kutikuyarqan. 40 Tayta Dios yanapaptinmi Jesúsqa wiñayllanta mas yachaq y kallpayuq karqan.
Templuchö Jesústa tariyanqan
41 Cada watam Jesúspa papäninwan maman Pascua fiestakuq Jerusalénman aywayaq. 42 Jesús chunka ishkay watayuq kaykaptinmi Israel runakunapa üsunkunamannö Pascua fiestaman Jesústapis pushayarqan. 43 Fiesta ushaynam Joséwan María markankunapa kutikuyarqan. Jerusalénchö Jesús quëdanqantaqa manam tantiyakuyarqantsu. 44 Paykunaqa wakin runakunawan Jesús aywaykanqanta yarparmi juk junaq qoyat aywayarqan. Jesústa watukaskirnam castankunachö y reqinakuyanqanchö ashiyarqan. 45 Mana tarirnam Jerusalénman ashiq kutiyarqan.
46 Kimsa junaqtarämi templuchö kaykaqta Jesústa tariyarqan. Tsaychömi ley yachatsikuqkunawan tapunakur jamaraykänä. 47 Jesús alli yachaq kar tapuyanqanta contestaptinmi wiyaqninkunapis espantakuyarqan. 48 Tsaychö rikaykurnam papäninwan maman pasaypa espantakuyarqan. Mamannam nirqan: “Hïju, ¿imanirtä kaychö quëdakurquyki? Pasaypa llakikurmi ashiyarqü”.
49 Jesúsnam nirqan: “¿Imanirtä ashiyämarquyki? ¿Manaku musyayanki Papänïpa wayinchö kanäpä kanqanta?”
50 Peru paykunaqa imapä ninqantapis manam tantiyayarqantsu.
51 Tsaypitanam paykunawan Nazaretman Jesús kutikur mandanqankunata rurarqan. Mamanqa llapan ima päsanqankunatapis shonqullanchömi yarpararqan. 52 Jesúsqa wiñayllanta mas yachaq kaptinmi Tayta Dios y runakuna kushikuyarqan.
La Niñez de Jesús.