Estrëlla estudiaqkuna Jesústa adorayänanpä chäyanqan
2
1 Rey Herodes mandanqan witsanmi Judea provincia Belén markachö Jesús yurirqan. Yuriskiptinmi qoyllur estudiaq runakuna rupay yarqamunan lädupita Jerusalénman chaykur 2 tapukuyarqan: “¿Maychötä Israel runakunapa mandaqnin rey kananpä yuriq llullu kaykan? Estrëllan yurimuqta rikarmi adoraqnin shayämurqü”.
3 Tsayta wiyaykurmi rey Herodes y Jerusalénchö täraq runakunapis pasaypa yarpachakuyarqan. 4 Tsaymi mandaq sacerdötikunata y ley yachatsikuqkunata qayaykatsir Herodes tapurqan: “Salvamaqnintsik Cristo ¿maychö yurinanpätä kaykan?”
5 Paykunanam niyarqan: “Taytay, Judea provinciachö Belén markachömi. Tsaychö yurinanpämi Tayta Diospa profëtan qellqarqan:
6 “ ‘Belén marka, Judáchö wakin markakunapita mas takshalla kaptikipis
qamchömi Israel runakunapa mandaqnin rey yurinqa.a
Paymi Israel runakunata üsha mitsiqnö cuidanqa’ ”.
7 Tsayta wiyaykurmi qoyllur estudiaqkunata pakayllapa Herodes qayatsirqan. Chaykuyaptinnam tsay qoyllurta imaypitana rikayanqantapis tapurqan. 8 Willaskiyaptinnam Herodes nirqan: “Belénman aywar tsay wamrata ashiyämuy. Tariykurqa willayämanki noqapis adoraq aywanäpä”.
9 Belénman aywayaptinmi tsay rikayanqan qoyllurpis paykunapa puntanta aywarqan. Wamra kaykanqan wayi derëchunman chaykurnam qoyllur päraskirqan. 10 Tsayta rikarmi pasaypa kushikuyarqan. 11 Wayiman yaykurirnam wamrata y maman Maríata tariyarqan. Tsaymi wamrapa puntanman qonqurikuykur adorayarqan. Tsaypitanam apayanqan qorita, inciensiuta y mïrrata qarayarqan.
12 Herodes kaqman manana kutiyänanpä sueñuyninchö Tayta Dios revelaptinmi juk nänipana markankunaman kutikuyarqan.
Egiptuman Jesústa José qeshpitsinqan
13 Estrëlla estudiaqkuna aywaskiyaptinnam Joséta sueñuyninchö Tayta Diospa angelnin nirqan: “Herodesmi wamrata wanutsinanpä ashitsinqa. Kanan höra sharkur wamrata mamantinta Egiptuman qeshpitsiy. Tsaychömi yapay willanqäyaq täyanki”.
14 Tsaymi jinan höra rikchaskamur patsa manarä waraptin wamrata mamantinta apakurkur Egiptuman aywayarqan. 15 Tsaychömi Herodes wanunqanyaq täyarqan. Tsaynöpam Tayta Diospa profëtan qellqanqanta cumpliyarqan. Tsay profëtam nirqan: “Tsurï kaptinmi Egiptupita qayamurqä”.b
Belénchö wamrakunata wanutsiyanqan
16 Estrëlla estudiaqkuna mana kutiyaptinmi rey Herodes pasaypa rabyarqan. Tsaymi soldädunkunata mandarqan Belén markachö y ñöpan caseriukunachöpis ollqu wamrakunata wanutsiyänanpä. Estrëllata imay rikayanqantapis willayanqanpita cuentata jipiskirmi wamrakunata wanutsiyarqan tsayrä yurishqapita ishkay watayuqyaq. 17 Tsaynö wanutsirmi profëta Jeremías qellqanqanta cumpliyarqan. Tsay qellqanqanchömi nin:
18 “Ramá markachö llakikur waqanqanmi wiyakämun.
Tsayqa Raquel waqanqanmi.
Wamrankuna wanushqa kaptinmi shoqayaptinpis mana päraypa waqaykan”.c
Egiptupita kutiyämunqan
19 Herodes wanuskiptinnam Egiptuchö José kaykaptin Tayta Diospa angelnin sueñuyninchö 20 nirqan: “Wamrata mamantinta apakurkur Israelman kutikuyay. Wamrata wanutsiyta munaqkuna wanuyashqanam”.
21 Tsaynö niptinmi wamrata mamantinta apakurkur Israelman kutiyarqan. 22 Kutiykäyanqanchömi José musyarqan Judeachö rey Herodespa rantin tsurin Arquelao mandakuq kaykanqanta. Tsayta musyaskirmi Judeaman kutiyta mantsarqan. Tsaymi sueñuyninchö Tayta Dios willaptin Galileamanna aywayarqan. 23 Tsaynöpam Nazaret markaman täraq aywayarqan.d Tsaychö tarmi Tayta Diospa profëtankuna niyanqanta cumpliyarqan. Tsay niyanqanmi nin: “Nazareno kanqantam runakuna niyanqa”.