San Mateo
Jesucristupä qellqanqan
Jesúspa unay castankuna pï kayanqanpis
1
1 Abrahampita y rey Davidpita miraq Jesucristupa unay castankunam kayarqan:
2 Abrahampa tsurinmi karqan Isaac.
Isaacpa tsurinmi karqan Jacob.
Jacobpa tsurinmi karqan Judáwan wawqinkunapis.
3 Judápa tsurinkunam kayarqan Fareswan Zara.
Paykunapa mamanmi karqan Tamar.
Farespa tsurinmi karqan Esrom.
Esrompa tsurinmi karqan Aram.
4 Arampa tsurinmi karqan Aminadab.
Aminadabpa tsurinmi karqan Naasón.
Naasónpa tsurinmi karqan Salmón.
5 Salmónpa tsurinmi karqan Booz.
Boozpa mamanmi karqan Rahab.
Boozpa tsurinmi karqan Obed.
Obedpa mamanmi karqan Rut karqan.
Obedpa tsurinmi karqan Isaía.
6 Isaípa tsurinmi karqan rey David.b
Rey Davidpa tsurinmi karqan Salomón.
Salomónpa mamanmi karqan Uríaspa viüdan.
7 Salomónpa tsurinmi karqan Roboam.
Roboampa tsurinmi karqan Abías.
Abíaspa tsurinmi karqan Asa.
8 Asapa tsurinmi karqan Josafat.
Josafatpa tsurinmi karqan Joram.
Jorampa tsurinmi karqan Uzías.
9 Uzíaspa tsurinmi karqan Jotam.
Jotampa tsurinmi karqan Acaz.
Acazpa tsurinmi karqan Ezequías.
10 Ezequíaspa tsurinmi karqan Manasés.
Manaséspa tsurinmi karqan Amón.
Amónpa tsurinmi karqan Josías.
11 Josíaspa tsurinmi karqan Jeconíaswan wawqinkunapis.
Jeconías kawanqan witsanmi Israel runakunata tsariskir Babilonia soldädukuna nacionninman prësu apayarqan.c
12 Tsaychönam Jeconíaspa tsurin Salatiel yurirqan.
Salatielpa tsurinmi karqan Zorobabel.
13 Zorobabelpa tsurinmi karqan Abiud.
Abiudpa tsurinmi karqan Eliaquim.
Eliaquimpa tsurinmi karqan Azor.
14 Azorpa tsurinmi karqan Sadoc.
Sadocpa tsurinmi karqan Aquim.
Aquimpa tsurinmi karqan Eliud.
15 Eliudpa tsurinmi karqan Eleazar.
Eleazarpa tsurinmi karqan Matán.
Matánpa tsurinmi karqan Jacob.
16 Jacobpa tsurinmi karqan Maríapa runan José.
Maríapa wamranmi karqan Jesús. Paymi Tayta Dios mandamunqan Cristo.
17 Abraham kawanqan witsanpita David yurinqanyaqmi chunka chusku generación karqan. Tsaynöllam David kawanqan witsanpita Israel runakunata Babiloniaman apayanqan witsanyaq chunka chusku generación karqan. Tsaynöllam Babiloniaman apayanqan witsanpita Jesucristo yurinqanyaqpis chunka chusku generación karqan.
Jesús yurinqan
18 Kaychömi qellqashqa kaykan Jesucristo manarä yuriptin ima päsanqanpis. Joséwan churakänanpämi María parlashqana karqan.d Joséwan manarä tarmi Espíritu Santupa poderninwan qeshyaq rikakurqan. 19 Joséqa alli runa karmi Maríata penqakuyman churayta mana munar pakayllapa dëjayta yarparqan.
20 Tsaynö yarpachakuykaptinmi Tayta Diospa angelnin Joséta sueñuyninchö nirqan: “Rey Davidpa castan José, Maríawan churakayta ama penqakuytsu. Payqa Espíritu Santupa poderninwanmi qeshyaq kaykan. 21 Ollqu wamratam qeshyakunqa. Payman criyikuqkunata jutsankunapita salvananpä kaptinmi tsay wamrapa jutinta churanki Jesúse”.f
22 Llapanpis tsaynö päsarqan profëtanwan Tayta Dios ninqan cumplinanpämi. Tsay profëtam nirqan:
23 “Juk virgen jipash qeshyaq rikakurmi ollqu wamrata qeshyakunqa.
Tsay wamrapa jutintam churanqa Emanuel”.g
(Emanuelqa Tayta Dios noqantsikwan kaykan ninanmi.)
24 Tsaynö niptinmi José punuykanqanpita rikcharkamur Tayta Diospa angelnin ninqannölla Maríata warminpä qorirqan. 25 Peru Maríawan churakarpis wamran yurinqanyaq manam paywan punuyarqantsu. Wamra yuriskiptinnam jutinta churarqan Jesústa.h