Malaquías
1
1 Kaychömi qellqashqa kaykan Israel runakunapä profëta Malaquías Tayta Diospa willakuyninta willakunqan.
Israel runakunata Tayta Dios kuyanqan
2 Tayta Diosmi nin: “Noqaqa qamkunatam imaypis kuyä.
“Peru tsaynö kaptinpis qamkunam niyämanki: ‘¿Imanöpatä musyayäman kuyayämanqaykita?’
“Tsaymi tantiyatsir nï: ‘¿Manaku Jacobwan Esaúqa tsay wawqilla kayarqan? Tsaynö kaykaptinpis unay castayki Jacobtam kuyarqä 3 y Esaútanam chikirqä.b Tsaymi Esaú castakuna täyanqan partikunatapis tsunyaqman tikratsirqü. Tsaychöqa chacalkunallanam taykäyan’ ”.ac
4 Tsaymi edomitad runakuna niyanqa: “Markantsikkunata ushakätsiptinpis yapaymi kay nacionta shäritsishun”.
Tsaynö niyaptinpis llapanta mandaq Tayta Diosmi nin: “Markankunata yapay shäritsiyaptinpis yapaymi ushakätsishä. Tsaymi nacionninta jutitsiyanqa Jutsasapa Runakuna Täyanqan Nación jutin kananpä. Tsaynöllam niyanqa paykunawan imaypis rabyashqa kaykanqäta. 5 Tsaynö ushakätsinqäta rikarmi niyanki: ‘Tayta Dios alabashqa kaykullätsun. Poderyuq kanqanqa maytsay nacionkunachömi musyakanqa’ ”.
Sacerdötikunata Tayta Dios qayapanqan
6 Sacerdötikunapämi llapanta mandaq Tayta Dios nin: “Tsurinkuna papäninta respitayanmi. Sirviqnin runakunapis patronninta cäsuyanmi. Noqam papänikikuna y patronnikikuna kä. Papäniki kaykaptïqa ¿imanirtä respitayämankitsu? Patronniki kaykaptïqa ¿imanirtä mantsapakayämankitsu? Qamkunaqa manakaqmanmi churayämanki.
“Tsaynöllam niyämanki: ‘¿Imachötä qamta manakaqman churayarqü?’
7 Altarnïman mana alli ashmakunatae sacrificiupä apamurmi manakaqman churayämanki.
“Tsaynö nir tantiyatsiptïpis yapaymi niyämanki: ‘¿Imachötä qamta manakaqman churayarqü?’
“Qamkunaqa mana alli ashmakunata sacrificiupä altarnïman apamurmi manakaqman churayämanki. 8 Qapra ashmakunata sacrificiupä apayämunqayki ¿alli kanqantaku yarpäyanki? Tsaynölla weqru o qeshyaqyashqata apamur ¿allitatsurä ruraykäyanki?f Tsaykunata mä gobernadornikikunata qarayänaykipä apayay. Paypis manam kushishqatsu chaskiyäshunki. Noqa llapanta mandaq Tayta Diosmi tsaynö nï.
9 “Tsaynö mana allikunata ruraykarpis yanapanäpä kanqanta yarparmi rugakayämankirä. Mana alli ashmakunata sacrificiupä apayämuptiki ¿kushishqatsurä chaskïman? Noqa llapanta mandaq Tayta Diosmi tsaynö nï.
10 “¡Ima allirä kanman pipis mana yaykunanpä templupa punkunta wichqayaptin! Tsaynöpam altarnïman mana alli ashmakunata pipis apayämunmantsu. Tsaynö apayämunqayki manam gustamantsu. Apayämuptikipis manam chaskiyäshaykitsu.g
11 “Rupay yarqamunqan lädupita rupay ullunqan läduyaqmi atska nacionkunachö jutïta joqarir shumaq sirviyäman. Maytsaychömi inciensiuta qoshnitsiyan y tsaki mikuyta altarkunaman apayan. Tsaynö rurarmi maytsaychöpis respitayäman. Noqa llapanta mandaq Tayta Diosmi tsaynö nï.
12 “Peru qamkunaqa altarnïta mana respitarmi kikïtapis respitayämankitsu. Mana munanqäta altarnïman apamurmi manakaqman churayämanki. 13 Tsaynöllam nikäyanki sirviyämanqayki alläpa aja kanqanta. Sirvimarpis janan shonqullam sirviyämanki. Altarnïmanqa sacrificiupä apaykäyämunki suwakuy ashmata, weqru ashmata, qeshyaqyashqa ashmata. Tsay ashmakunata ¿chaskinäpä kanqantaku yarpaykäyanki?
14 “Noqaqa llapanpä poderyuq reymi kä. Maytsay nacionkunachömi noqata mantsayäman. Qamkunaqa orqu ashmakunapita sänu kaqta apayämunaykipä awnikurpis däñashqa kaqta altarnïman apamurmi maldicionashqa kayanki. Noqa llapanta mandaq Tayta Diosmi tsaynö nï”.