Malaquías
Babiloniachö täyanqanpita Judáman Israel runakuna kutiyashqana kaptin y templuta yapay shäritsiyashqana kaptinmi profëta Malaquías kay libruta qellqarqan. Kutiyanqanpita pachak (100) watatanö qepatarämi qellqarqan. Pay kawanqan witsanmi Israel runakuna yarpäyarqan profëtakuna willakuyanqannö rïcuyäyänanpäna kanqanta (Hag. 2.7, 18-19), rey Davidpa castanpita juk rey mandananpäna kanqanta (Eze. 34.13, 23-24) y paykunawan Tayta Dios mushuq pactuta rurananpäna kanqantapis (Jer. 31.23, 31-34). Yarpäyanqannö mana kaptinmi runakuna llakikur Tayta Diosman janan shonqullana yärakuyarqan.
Tsaymi Malaquías willakurqan sänu ashmakunata sacrificiukunapä templuman apayänanpä (Mal. 1.6—2.9), warminpita runakuna mana rakikäyänanpä (Mal. 2.10-16) y diezmukunata templuman apayänanpä (Mal. 3.6-12). Tsaynöllam willakurqan Tayta Dios mandamunanpä kaq willakuq y runakuna shuyäyanqan mandaq shamunanpä kanqanta (Mal. 3.1-5; 4.5-6). Paykunapä willakurmi Bautizaq Juan y Jesucristo shayämunanpä kaqta willakurqan. Chusku pachak pitsqa chunka (450) watanö Jesucristo manarä yuriptinmi Malaquías willakurqan.