Tayta Dios shamur mandananpä ninqan
14
1 Jerusalén runakuna, Tayta Dios juzgayäshunqayki junaq chämunqanam. Kikikikuna rikaykäyaptikim chikishuqniki nación runakuna vinciyäshurniki imaykaykikunatapis qechuyäshunqaykita rakipänakuyanqa.
2 Jerusalénta atacayänanpämi llapan nación runakunata Tayta Dios qorimunqa. Tsay runakuna Jerusalénman yaykuskirmi tsaychö kaykaq wayikunapita imaykankunatapis apayanqa. Warmikunatanam violar ushayanqa. Jerusalénchö täraq runakunatam pullanta prësu apayanqa. Wakintanam markallanchö dëjaykuyanqa.
3 Tsaynö rurayaptinmi kikin Tayta Dios tsay nacionkunawan pelyanqa. Israel runakunata unay yanapar pelyanqannömi tsay nacionkunapa contran pelyanqa. 4 Tsay junaqmi Jerusalén tsimpan rupay yarqamunan kaq lädu Olivos jirkanchö Tayta Dios ichinqa. Tsaychö ichiptinmi Olivos jirkan ishkayman partikanqa. Partikaptinmi jatunkaray raqra rikakunqa rupay yarqamunanpita hasta rupay ullunanyaq. Pullan jirkanmi norti kaq lädupa rakikanqa y pullan kaqnam sur kaq lädupa rakikanqa. 5 Tsay raqra Azal partiyaq chaptinmi qamkunaqa tsay jatunkaray raqrapa qeshpiyanki. Judá nacionpa mandaqnin rey Uzías kanqan witsan terremötu kaptin unay castaykikuna qeshpiyanqannömi qamkunapis qeshpiyanki. Tsay höram santu angelninkunawan Tayta Dios shamunqa.
6 Tsay witsanqa manam kanqatsu atsikyaypis, alaypis ni qajapapis. 7 Manam paqaspis ni junaqpis kanan kanqannötsu kanqa, sinöqa paqas kaptinpis junaqpanöllam atsikyanqa. Tsay junaqnöqa manam imaypis kashqatsu ni kanqatsu. Tayta Diosllam musyan tsay junaq imanö kananpä kanqantapis.a
8 Tsay witsanqa usya tiempupis y tamya tiempupis tsuya yakum Jerusalénpita yarqamunqa.d Pullan yakum chanqa rupay yarqamunan kaq lädu lamaryaq.b Pullan kaq yakunam chanqa rupay ullunan kaq lädu lamaryaq.c
9 Tsay witsanqa entëru kay patsachö Tayta Diosllam rey kanqa. Tsaymi maytsaychöpis pay kikillantana alabayanqa.
10 Entëru Judá nacionmi pampa tikranqa Gebapita hasta Jerusalénpa sur kaq lädunchö kaykaq Rimón partiyaq. Jerusalénnam jirkan jananchö quëdanqa. Runakunaqa Jerusalénchö täyanqa Benjamín Punkupita hasta Unay Punku jutiyuq punku kanqanyaqmi. Tsay Unay Punkupa jutinmi kanan kaykan Esquïna Punku. Tsaynöllam täyanqa Hananeelpa rikachakunan törripita hasta reypä üvata jarukuyänan kaqyaq. 11 Tsaymi Jerusalénchö runakuna junta täyanqa. Mananam ima maldicionpis paykunapä kanqanatsu, sinöqa tranquïlunam täyanqa.
12 Jerusalén runakunata atacayanqanpitam llapan contran nación runakunata Tayta Dios mantsariypä qeshyawan castiganqa. Tsay qeshyawanmi kawaykaptillanrä aytsanpis y ñawinkunapis ismunqa. Tsaynöllam qallunkunapis shiminkunallachö ismunqa. 13 Tsay witsanmi Tayta Dios tsay runakunata pasaypa mantsariyman churanqa. Tsaymi kikinpura contra shärir pelyayanqa.
14 Jerusalénta defiendir pelyayänanpämi Judá parti markakunachö täraq runakuna Jerusalénman shayämunqa. Lädun nacionkunachö täraq runakunata vinciskirmi atska riquëzankunata qechuyanqa. Tsay riquëzakunam kayanqa atska qellay, qori y röpakunapis. 15 Chikiqninkunapa campamentunkunachö kaykaq caballukunata, mulakunata, camëllukunata, ashnukunata y wakin ashmakunatapis mantsaypä qeshyam ushanqa. Tsay qeshyaqa ämunkunata tsarinqan qeshyallam kanqa.e
16 Jerusalén runakunawan pelyayanqanpita kawaykar quëdaq juklä nación runakunaqa cada watam Jerusalénman shayämunqa poderösu rey Tayta Diosta adorayänanpä. Tsaychö adorarmi Ramäda fiestata rurayanqa.f
17 Mayqan nación karpis llapanta mandaq Tayta Diosta adorayänanpä Jerusalénman mana shamuptinqa tsay nacionchö manam tamya kanqatsu. 18 Egiptupita karpis Ramäda fiestata rurayänanpä mana shayämuptinqa Tayta Diosmi wakin nacionkunata castiganqannölla castiganqa. Tsaymi paykunapäpis tamya kanqatsu. 19 Tsaynöllam castiganqa Egipto runakuna y mayqan nación runakunapis Ramäda fiestata rurayänanpä mana shayämuptinqa.
20 Tsay witsanmi caballukuna wallqaraykanqan campanillakunachöpis qellqashqa kanqa: “Tayta Diospä santum” nir. Tayta Diospa wayin templuchö kusinayänanpä kaykaq mankakunapis altarpa ñöpanchö kaykaq tazonkunanö santum kanqa. 21 Entëru Jerusalénchö y Judáchöpis llapan mankakunam llapanta mandaq Tayta Diospä santu kanqa. Santu kaptinmi pipis adorayänanpä shamur tsay mankakunawan apayämunqan sacrificiuta kusinayanqa. Tsay witsanqa llapanta mandaq Tayta Diospa templunchö rantikuqkuna manam kayanqanatsu.