22
Tsaypitanam ángel rikätsimarqan imayyaqpis kawatsikuq y kuyakuypaq cristal vidriunö chipakyaq [chuya] mayuta.† Tsay mayum Dios Yaya y Jesucristo jamaykanqan trönu chakinpita yarqamurqan. 2 Jatun cälli pullanpam tsay mayu päsarqan. Mayu kuchunkunachömi imayyaqpis kawatsikuq jachakuna karqan.† Tsay jachakunam cada killa wayuyaq. Raprankunanam llapan nación runakunapaq jampi karqan.3 Kay patsata Dios Yaya maldicionashqa karpis tsay markataqa mananam maldicionanqanatsu.† Tsay markachömi Dios Yayapa y Cordërupa trönun kanqa. Serviqninkunanam Diosta adorayanqa. 4 Tsaychömi Dios Yayapa qaqllanta rikäyanqa.† Urkunkunachömi Dios Yayapa shutin qellqashqa kanqa. 5 Tsay markachöqa patsapis mananam tutapanqanatsu. Chipakyayninwan Dios Yaya atsikyaptinmi† rupaytapis ni ima aktsitapis wanayanqanatsu. Tsay runakunam imayyaqpis mandakuyanqa.†
Jesucristo kutimunanpaq ninqan
6 Tsaymi ángel nimarqan: “Profëtakunata tantiyatsiq Dios Yayam imapis päsananpaq kaqkunata serviqninkunata willanäpaq kachamashqa. Kay willakunqäkunaqa rasunpa kaqllam”.
7 Tsaynöllam Jesucristo nin: “Shamunäpaqnam kaykä. Kushishqam kawayanqa kay libruchö qellqashqa kaykaqkunata cäsuqkuna”.
8 Noqa Juanmi tsaykunata wiyashkä y rikashkä. Tsaymi llapanta rikätsimaq angelpa puntanman adoranäpaq pelatakuykurqä. 9 Tsaymi nimarqan: “¡Noqata ama adoramaytsu! Profëta majikikunanölla y qellqanqaykikunata chaskiqkunanöllam noqapis Dios Yayata servï. Dios Yayallata adoray”.
10 Tsaypitanam nimarqan: “Llapanpis cumplinanpaqna kaykaptinqa revelacionchö rikanqaykikunata ama pakarätsiytsu, sinöqa libruman qellqarkur runakunaman apatsiy. 11 Mana alli ruraqkuna jina mana allita rurar kawayätsun. Jutsa ruraqkunaqa jina jutsata rurar kawayätsun. Alli runakunaqa allita rurar kawakuyätsun. Dios Yaya munanqannö santu kawaqkunaqa pay munanqannö santu kawakuyätsun”.†
12 Jesucristum nin: “Shamunäpaqnam kaykä. Shamurmi runakunata kawayanqanman juzgar premiuta qarashaq o castigashaq.† 13 Alfa y Omegama kä. Qallanan y ushananmi kä.†
14 “Kushishqam kayanqa mushuq Jerusalénman yaykuyänanpaq y imayyaqpis kawatsikuq jachapa† wayuyninta mikuyänanpaq llatapankunata taqshakuqkuna.† 15 Peru tsay markamanqa manam yaykuyanqatsu mana alli ruraqkuna, brüjukuna, fornicación jutsata ruraqkuna, runa majinta wañutsiqkuna, ïdulukunata adoraqkuna y llullakuqkunapis.
16 “Noqa Jesúsmi creyikamuqkunaman angelnïta kachamushkä imapis päsananpaq kaqkunata musyatsinanpaq. Noqam Davidpita miraq† Waraq Lucëru† kä”.
17 Espíritu Santu y Jesucristuwan casarananpaq jipashmi† niyan: “¡Taytay, sas shamuyna!” Kay libruchö qellqashqa kaykaqkunata liyimunqanta wiyaqkunapis niyätsun: “Taytay, shamuykullay”. Yakunaqkuna shayämutsun. Imayyaqpis kawatsikuq yakuta dembaldilla upyayätsun.†
18 Kay libruchö qellqashqa kaykaqta wiyaqkunatam albertï: Mayqanpis kay qellqashqa kaqkunaman yarpayninkunapita yapaq kaqtaqa Dios Yaya mana llakipaypam castiganqa. Kay libruchö qellqashqa kanqannömi tsay runakuna ñakayanqa. 19 Kay libruchö qellqashqa kaykaqpita juk yachatsikuyllatapis jipiq kaqtaqa† Dios Yaya manam permïtinqatsu imayyaqpis kawatsikuq jachapa wayuyninta mikunanpaq.b Tsaymi mushuq sagrädu Jerusalén markaman yaykuyanqatsu ni kay libruchö qellqashqa kaykaq bendicionkunatapis chaskiyanqatsu.
20 Kay libruta qellqanäpaq tantiyatsimaqmi nin: “Shamunäpaqnam kaykä”.
“¡Amén! ¡Shamuykullay, Señor Jesús!”
21 Señornintsik Jesucristo llapaykita imaypis yanapaykuyälläshuy. [Amén.]