Salmo 53 (52)
Jutsa rurayllachö runa kawanqan
(1) Cantaqkunapa mandakuqninpaqmi. Mahalat.a David qellqanqan salmum.
1 (2) Mana tantiyakuq runakunam shonqunkunachö yarpar niyan: “Diosqa manam kantsu”.
Paykunaqa mana alli ruraykunaman umankuna churakashqam kayan.
Ima rurayanqanpis alläpa penqakuypaqmi.
Manam mayqanpis alli ruraqqa kantsu.†
2 (3) Dios Yayam ciëlupita runakunata rikaykämun.
Paymi pipis tantiyakuqta ashiykan.
Payta pipis ashiqtam ashiykan.
3 (4) Peru runakunam llapanpis jutsa rurayllachö kawayan.
Llapanmi mana allikunata rurayan.
Manam pipis alli ruraqqa kantsu.
Manam ni jukllayllapis kantsu.†
4 (5) Mana alli ruraq runakunaqa ¿manatsuraq tantiyakuyan?
Paykunam tantata mikuqnö Dios Yaya kuyanqan runakunata ushakätsiyan.
Dios Yayaman manam ni imay mañakuyantsu.
5 (6) Paykunam imapis mana kaykaptin illaqpita mantsakäyanqa.
Paykunatam Dios Yaya chikir penqakuyman churanqa.
Wañuskatsirmi tullunkunatapis wakpa kaypa witsinqa.
6 (7) ¡Allim kanman Siónpita Israel runakunata Dios Yaya salvaptin!
Salvaptinmi Jacobpita miraq Israel runakuna alläpa kushikuyanqa.