Salmo 12 (11)
Yanapananpaq Dios Yayata mañakunqan
(1) Cantaqkunapa mandakuqninpaqmi. Pusaq cuerdayuq instrumentuta töcarnin cantayanki. David qellqanqan salmu.
1 (2) Dios Yaya, waktsakunata salvaykullay.
Qamman creyikamuq runakuna mananam kayannatsu.†
Alli ruraq runakunaqa llapannam ushakäyashqa.
2 (3) Runakunaqa juknin jukninmi llullakuyan.
Tsaymi imata äniskirpis “mananam” niyan.
3 (4) Llapan llullakuqkunata y orgullösukunata Dios Yaya ushakätsitsun.
4 (5) Paykunam niyan: “Parlaychöqa manam ni pipis gänamäshuntsu.
Imaykanöpam defendikushun.
Noqantsiktaqa manam ni pipis dominamäshuntsu”.
5 (6) Dios Yayam nin:
“Waktsakunata y humildikunatam alläpa allqutsakur sufritsiyan.
Sufritsiyaptinmi alläpa waqayan.
Tsaymi paykunata sas yanapashaq.
Mañakayämanqannöllam salvashaq”.
6 (7) Dios Yaya prometinqankunam llapanpis confiakuypaq.
Llapan ninqankunam qanchis kuti tsullutsishqa qellaynö püru.
7 (8) Dios Yaya, musyämi waktsakunata yanapanaykipaq kanqanta.
Musyämi mana alli runakunapita imaypis tsapänaykipaq kanqanta.
8 (9) Tsay runakunam maytsaypa rikapakur puriykäyan.
Jutsata rurayaptinpis alli kayanqanta yarparmi aläbayan.