2 Tsay witsaymi Dan trïbupita Manoa shutiyuq runa Zora markachö täkurqan. Warmin qolluq kaptinmi tsurin karqantsu. 3 Peru juk junaqnam Dios Yayapa angelnin Manoapa warminta yuripuskir nirqan: “Qolluq kaykarpis qeshyaq tikraskirmi ollqu wamrata qeshyakunki. 4 Peru wawayki yurinqanyaq vïnuta ni ima machätsikuqtapis ama upyankitsu. Tsaynölla impüru kaq wätatapis^† ama mikunkitsu. 5 Qeshyaq kaykaptikillaraqmi wawaykita Dios Yaya akranqa nazareo kananpaq.^† Tsaymi aqtsanta ni imaypis rutuyanqatsu. Paymi Israel runakunata filisteo runakunapa poderninpita salvar qallaykunqa”.

6 Tsaynam ollqunta willaqnin aywar nirqan: “Dios Yayapa willakuqninmi shamushqa. Kikin Dios Yayapa angelnin rikuqmi mantsakaypaq kashqa. Manam maypita kanqanta ni pï kanqantapis tapushkätsu ni kikinpis willamashqatsu. 7 Paymi nimashqa ollqu wamrantsik kananpaq. Kananpitaqa manash vïnuta ni ima machätsikuqtapis upyashaqtsu. Tsaynöllash impüru kaq wätakunatapis mikushaqtsu. Manaraq yuriptinshi wamrantsikta Dios Yaya akranqa yurinqanpita wañunqanyaq nazareo kananpaq”.

8 Tsaymi Dios Yayata mañakur Manoa nirqan: “Dios Yaya, yapay tsay runata mandaykallämuy tsurï yuriptin imanö wätanäpaq kanqanta tantiyatsimänanpaq”.

9 Tsaynö mañakuptinmi Manoapa warminta yapay ángel yuripurqan chakrachö kikillan kaykaptin. 10 Tsaymi warmiqa cörrilla aywar Manoata nirqan: “¡Jukpun yuripamaq runam yapay chämushqa!”

11 Tsaymi Manoaqa tsay runa kaykanqan kaqpa jina höra aywarqan. Chaykurnam nirqan: “Taytay, ¿warmï qeshyaq kananpaq parlapaq runaku kanki?”

Tsaynam nirqan: “Awmi, noqam tsay runa kä”.

12 Manoanam tapurqan: “Ninqaykinö tsurï yuriptin ¿imanötan wätashaq?”

13 Dios Yayapa angelninnam nirqan: “Warmikim cumplinqa llapan yätsinqäkunata. 14 Ama üvata ni päsasta mikunqatsu ni ima machätsikuqtapis upyanqatsu. Impüru kaq wätakunatapis mikunqatsu. Llapan mandanqäkunata cumplinqa”.

15 Tsaynam Dios Yayapa angelninta Manoa nirqan: “Taytay, shuyaykullay mallwa cabrata pishtaskir kusinaskamunqäyaq”.

16 Peru angelnam nirqan: “Kusinamuptikipis manam mikushaqtsu. Qaramanqaykipa rantin mallwa cabrata Dios Yayapaq waykana sacrificiuta waykay”.

Tsaynö niptinpis Manoa manam tantiyarqantsu Dios Yayapa angelnin kanqanta.

17 Tsaymi angelta nirqan: “Taytay, shutikita willaykamay nimanqaykikuna cumpliptin agradëcikunaqpaq”.

18 Peru angelnam nirqan: “¿Imapaqtan shutïta musyayta munanki? Shutïtaqa manam pipis tantiyayta puëdintsu”.

19 Tsaynam Manoaqa mallwa cabratawan tsaki mikuyta jatun rumi jananman churaykur Dios Yayapaq waykarqan. Rupaykätsiptinmi Manoatawan warminta imaypis mana rikäyanqan milagruta Dios Yaya rikätsirqan. 20 Tsaymi altarpita nina lunyaptin warminwan Manoa rikäyarqan Dios Yayapa angelnin nina rurinpita ciëluman witsaykaqta. Tsayta rikaykurmi mantsakar ishkan patsaman juklla pelatakuykuyarqan. 21 Nina rurinpita witsaykaqta rikarmi Manoa tantiyaskirqan Dios Yayapa angelnin kanqanta. Tsaypitaqa mananam mayqantapis ángel yuripurqannatsu. 22 Tsaymi warminta Manoa nirqan: “¡Dios Yayatam rikashkantsik! ¡Kananqa wañushunchari!”

23 Peru warminnam nirqan: “Dios Yaya wañutsimaynintsikta munarqa manam chaskimashwantsu karqan waykana sacrificiuta ni mikuy rupatsinqantsiktapis. Manam ni imata rikätsimashwantsu ni willamashwantsu karqan”.

24 Killan paqtaskiptinmi ollqu wamrata qeshyakuskir shutin churarqan Sansónta.^† Sansóntam wiñanqallanman Dios Yaya llapan imaykachöpis yanaparqan. 25 Zora y Estaol markakunachö kaykaq Mahané-dan partichö täkuykäyaptinmi Dios Yayapa Espïritun yanapanqanta runakuna tantiyayarqan.