5
Mayur cüra cananpaj pitapis marca-masillanpita acran.
Cüra cayman ćhuran runa-masincunapaj Tayta Diosninchita mañacapunanpaj.
Chaymi pipis juchanpita wanacuptin,
runa-masinpa cuyachicuyninta,
jaracuyninta Tayta Diosninchita jaran.
2 Mayur cürapis runa cayninwan pantapacun.
Chaymi runacuna mana musyayninwan llutanta ruraptin,
pantapacuptin,
llaquipan.
3 Tantiyayyuj runa cashpan quiquin jucha aparicushanpita,
pampa runacuna juchata aparicushanpita mañacapur,
Tayta Diosninchita jaran.
4 Chaura quiquillanpita pipis mayur cüra cayman mana ćhayanmanchu;
manchäga Tayta Diosninchi acrarcur alli cayman ćhuraptinraj.
Cüracunapa taytan Aarónpis quiquin Tayta Diosninchi acrarcur ćhuraptinraj,
mayur cüra cayman ćhayaran.
5 Washäcuj Jesúspis mana quiquinchu ashisha mayur cüra cananpaj.
Manchäga Tayta Diosninchi alli ricar,
mayur cüra cayman ćhurar,
musyachicuran:
«Wawämi canqui.
Cananpita-pacha nuwapitana cawanqui» nir.*
6 Jucläćhüpis musyachicuran:
«Cüra cayniquipita imaypis mana llucshinquipächu.
Melquisedec-jina cüra canqui» nir.*
7 Washäcuj Jesús cay pachaćhu purir,
wiguinpawanraj llapan shungunwan mañacuran:
«Taytallau Tayta,
wañuypita jishpiycachillämay,
ari» nir.
Manchapacuj captin,
mañacushanta Tayta Diosninchi camacächiran.
8 Chaypis Wawan carsi,
sumajraj ñacasha wañuyman ćhayananpaj.
Chayraj wiyacuj cayta yaćhacusha.
9 Wiyacuj cayta yaćhacuptinmi ichanga,
Tayta Diosninchi cawarcachimuran wiyacujcunata jishpichinanpaj,
imaycamanpis maquinćhu cawachinanpaj.
10 Jananmanpis unay Melquisedecta ćhurashan-jina mayur cüra cananpaj ćhurasha.
Irmänucunata piñapashan
11 Sumaj wiyacamay.
Achcaraj caycan yaćhachinajpaj.
Ichanga upa-tucur jillanashpayqui tantiyacuyta mana atipanquichu.
12 Juccunata yaćhachinayquipaj mayna tantiyacunquiman caran.
¿Imanirtaj imatapis mana tantiyacunquirächu?
¿Tayta Diosninchipa shiminta yaparir-yaparir willapänallajtachu shuyarpaycanqui?
¿Pishi wamra-jina chuchutarächu shuyarpaycanqui?
Chucru micuyta mana micunquirächu.
13 Chuchuj mallwa-jina Tayta Diosninchipa shungun munashanta mana tantiyacunquirächu.
Mana yaćhacunquirächu.
14 Sinćhi wamracunam ichanga chucru micuycunata micun.
Paycuna-jina yarpay-sapacuna allitapis,
mana allitapis tantiyacun.
Tayta Diosninchipa shungun munashantapis tantiyacun.