Tesalónica marcaćhu Pablo willacushan
2
Irmänucuna,
allipaj watucuj shamushäta musyanqui.
2 Musyashayquinuypis Filipos marcaćhu runacuna ashllir ushyamasha.
Sumaj ñacachimasha.
Ñacachimash captinsi,
Tayta Diosninchiman yupachicur shiminta willapänä-raycur jamcunaman ćhayamushcä.
Marca-masiquicuna chapata ruramaptinsi,
paypa alli willapanta willapashcaj.
3 Mana mishquichipallarchu riguichishcaj.
Mana pantachicurchu willapashcaj.
Yaćhachirpis,
mana llutantachu yaćhachishcaj.
4 Shungüta Tayta Diosninchi musyapan.
Payga shiminta willapäcunäpaj ćhuramasha.
Chaymi runacunata mana cushicachinalläpächu willapäcuycä;
manchäga Tayta Diosninchipa shungunman tincunanpaj.
Payga llapan runapa shungunta musyapan.
5 Irmänucuna,
mana jatun-tucushäta musyanqui.
Mana jillay-raycullarchu willapäcushcä.
Chaytaga Tayta Diosninchipis musyan.
6 Runacuna manchapacamar:
«Taytallau tayta» nimänanta may-chayćhusi mana ashishcächu.
7 Washäcuj Jesúspa caćhan caycar,
alli-tucuyta alli-tucüman caran.
Chaypis mana alli-tucushcächu.
Manchäga juc mama wamranta alli ricashan-jina jamcunatapis llaquipashcaj.
8 Yaćhänacushpanchi Jesúspa alli willapanta willapänaj-raycur imamanpis ćhayäman caran.
Mana willapashalläwanchu ushyaranga.
Manchäga wañuytasi jina tarïman caran.
9 Irmänucuna,
nuwacuna sumaj arushätapis,
ñacashätapis ama junganquimanchu.
Tayta Diosninchipa alli willapanta willapäcushä wichan sumaj arur,
pagas-junajpis jamayta mana tarishcächu.
Arushcä mana runapa-cajllaman ricaränäpächu.
10 Manchapacur cawapäcushäta jamcunapis,
Tayta Diosninchipis musyan.
Ricay ñawinćhüpis,
ricay ñawiquićhüpis allillata rurar cawapäcushcä.
Mana imaćhüpis juchallicushcächu.
11 Jamcunata wamräta-yupay ricashcaj.
12 Chaymi shacyächipaycar,
willapaycar,
anyapaycar,
llapaniquiwan juyashcä.
Tayta Diosninchipa shungun munashannuy cawanayquipaj yaparir-yaparir willapashcaj.
Paymi acracamashcanchi maquinćhu imaycamanpis cushishalla cawananchipaj.
13 Irmänucuna,
Tayta Diosninchipa shiminta willapaptï,
ćhasquicärishcanqui:
«Paycuna Tayta Diosninchipa shiminta willapaycämanchi;
mana runapa yarpayllanpitachu» nir.
Tayta Diosninchipa shimin captin,
shunguyquiman ćhayasha.
Payman yupachicuptiqui,
maquinćhüna puriycächishunqui shungun munashannuy cawanayquipaj.
Chaymi jamcunapita mana yamacällar nï:
«Taytallau Tayta,
ima allish shimiqui shungunman ćhayasha.
Chaymi ćhasquicärishcashunqui.»
14 Chaypis Washäcuj Jesúsman yupachicur Tayta Diosninchipa maquinćhu cawashayquipita marca-masiquicuna ñacachishcashunqui.
Judea quinranćhu jutucaj irmänucunata Israel marca-masincuna ñacachishan-jina jamcunatapis ñacaycächishunqui.
15 Judea marcacunaćhu Tayta Diosninchipa willacujnincunatapis,
Tayta Jesústapis wañuchiran.
Nuwacunatapis jaticaćhämar ushyamasha.
Paycuna chiqui runa.
Tayta Diosninchita ullgüchin.
Runa-masincunapa cunćhan jatarin.
16 Chiquicuj Israel runacuna chapata ruraman.
Juclä marcacunaćhu Tayta Diosninchipa shiminta mana ricsijcunata willapänätapis mićhäman.
Maquinćhu cawananpaj Tayta Diosninchi jishpichinantapis mana munanchu.
Juchaćhu arurpis,
juchanta miraycächin.
Chay-niraj cashanpita Tayta Diosninchipis ullgur ñacayman jaycurij-jaycurijllana caycan.
Yapay watucuyta Pablo yarpashan
17 Irmänucuna,
jamcuna-cajpita aywacur,
sumaj llaquicushcä.
Jamcunapaj yarparar,
llapaniquiwan tincuyta sumaj munashcä.
18 Nuwacuna watucuj shamuyta sumaj munashcä.
Quiquïpis achca cuti shamuyta munashcä.
Chaypis Supay chapata llapanïta ruramasha.
19-20 Ichanga Tayta Diosninchiman yupachicushayquipita,
maquinćhu cawashayquipita sumaj cushicü.
Jesúspa ñaupanćhüpis tincushunpaj.
Taytanchi Jesús cutimur arushanchipita tapumaptinchi,
jamcunapita sumaj cushicur,
shungücunapis achicyacäcunga.