Israel runacuna Tayta Diosninchiman mana yupachicushan
9
Irmänucuna,
Israel-masïcuna Washäcuj Jesúsman mana yupachicuptin,
llaquish cawä.
Mana llullacüchu.
Washäcuj Jesúsman yupachicuptï,
Espíritu Santu yanapäman rasullanta rimanäpaj.
2 Sumaj-sumaj llaquicü.
Waran-waran shungüpis nanan.
3 Israel-masïcuna Washäcuj Jesúsman yupachicunan-raycur,
imamanpis ćhayäman.
Juyu ñawinpa Tayta Diosninchi ricamänan captinsi,
mana llaquicümanchu.
4 Israel runacunaga Jacobpa willcallan caycanchi.
Israel runacunallata Tayta Diosninchi wamrachacuran.
Chunyaj pachaćhu purishan wichanpis achic-achicyaycar ricaripunyaran.
Parlanacunyaran.
Sinaí puntaćhu shimintapis musyachiran.
Quiquinmi wasinćhu imanuy-imanuy alliman ćhurananpäpis,
jarananpäpis tantiyachiran.
Yawar-masillanpita Washäcuj yurinantapis auniran.
5 Unay auquillunchicuna caycan Abraham,
Isaac,
Jacob.
Paycunapa willcallanpita Washäcuj yurinantapis Tayta Diosninchi camacächiran.
Yawar-masillan Jesús caycaptinsi,
Israel-masïcuna wasguiparan.
Washäcujninchi Jesúsmi ichanga cay pachatapis,
llapan imacunatapis maquinćhu charan.
Payga Tayta Diosninchim.
Payllata imaypis alliman ćhurashun.
Chaynuy caycullächun.
6-7 Israel-masïcuna Washäcujta wasguipänanpaj,
¿Tayta Diosninchichuraj aunishanta cutiricuran?
Mana.
Tayta Diosninchi mana Abrahampa,
Jacobpa llapan willcancunatachu wamrachacuran.
Mana Israel runacunallatachu wamrachacuran.
Manchäga shungun munashallanta wamrachacuran.
Quiquin Abrahamtapis niran:
«Isaacnillayquita wamrachacushaj.
Payllapita willcayquicuna miranga.»*
8 Tayta Diosninchi mana Abrahampa llapan wamrancunatachu wamrachacuran.
Manchäga aunishan-jina jucnayllata wamrachacuran.
9 Abrahamta aunir,
Tayta Diosninchi niran:
«Watan caynuy wichan cutimuptï,
majayqui Sara wamrayujna caycanga.
Llapanta camacächishaj.»*
10 Auquillunchi Isaacpapis warmin Rebecaćhu ishcay wamran caran.
11-13 Ichanga wamrancuna mana yuriptillan,
allita,
mana allita rurananpis mana musyacaptillan,
Tayta Diosninchi Rebecata niran:
«Jichpa wamrayqui shullcanpa maquinćhu cawanga.»
Tayta Diosninchipa shiminćhüpis isquirbiraycan:
«Shullca captinsi Jacobta llaquipar,
wamrachacushcä.
Esaútam ichanga jichpa captinsi,
wasguishcä.»*
Tayta Diosninchi shungun munashallanta wamrachacun.
Payga allita,
mana allita rurashantapis mana ricanchu.
Manchäga munashallanta camacächin.
Tayta Diosninchi allillata rurashan
14 ¿Chaymi:
«Tayta Diosninchi llutanta ruraycan» nishuwanchuraj?
Mana.
15 Moiséstapis marca-masinpaj mañacapuptin,
quiquin Tayta Diosninchi niran:
«Manacaj captinsi munar,
pitapis wamrachacushaj.
Shungü munashan-cajllata llaquipäshaj.»*
16 Tayta Diosninchi wamrachacamänanchipaj mana quiquinchichu callpachacunanchi.
Manchäga llaquipashpan shungun munaptin,
pitapis wamrachacun.
17 Shiminćhüpis Egipto marca mandajta Tayta Diosninchi nin:
«Faraón,
munayniyuj canayquipaj camacächishcä.
Chaymi nishä-nishäta rurachishayqui nuwalla munayniyuj cashäta llapan runa musyananpaj.
May-chayćhüpis nuwallata manchapacamanga.»*
18 Tayta Diosninchi munar,
pipa shunguntapis chucruyächin ullgujyänanpaj.
Llaquipayta munar,
pitapis llaquipan.
19 Sumaj tantiyacushun.
«Tayta Diosninchi shungun munashallanta camacächin» niptï waquinniqui llutanta yarpar,
niramanquiman:
«Juchata aparicuptinchisi,
Tayta Diosninchi mana piñapämäshunchu.
Paypa shungun munashanta mana ticrachishuwanchu» nir.
20 ¿Pitaj canchi Tayta Diosninchita ashipänanchipaj?
Mitu manca-yupay caycanchi.
Mitu manca quiquin manca-rurajta mana ninmanchu:
«¿Imanirtaj cay-nirajta ruramashcanqui?»
21 Manca-rurajga yarpashanta mitupita ruran.
Chay mitullapita waquin mancata ruran cuyayllapaj;
waquinta mana.
Chay-jina Tayta Diosninchipis yarpashanta nuwanchiwan ruran.
22-24 Chaymi juchallaćhu arujcunata ushyacächinan camacan.
Ushyacächimänanchi captinsi,
juchanchita jurgapämänanchi captinsi,
Tayta Diosninchi llaquipämänanchi camacan.
Paypa maquinćhu cawaycanchi.
Israel runa captinchisi,
jäpa runa captinchisi,
unaypita-pacha acracamashcanchi llaquipämashanchita tantiyacunanchipaj.
Llapaninchita acracamashcanchi imaycamanpis janaj pachaćhu cawananchipaj.
25 Chaymi Oseas isquirbishan librućhüpis Tayta Diosninchi nin:
«Jäpa runacunata wajta runa-jina ricaj carsi,
acracushaj wamrachacunäpaj.
Wasguishcunata llaquipar,
sumaj llaquipäshaj.*
26 ‹¿Piraj cacullanquipis?›
nishä runacunata wamrachacushaj.»
Jananmanpis nin:
« ‹Jamcunata mana ricsijpishchu.
Mana wamrächu canqui› nish captïsi,
runacuna jinallanćhu auninga:
‹Cawaj Tayta Diosninchipa wamrancuna carcaycanqui› nir.»*
27-28 Israel runacunapaj Isaías niran:
«Israel runacuna agu-jina chay-chicajmi.
Chaypis jucha aparicushanpita Tayta Diosninchi llapanta-yupay ushyacächinga.
Mana llaquipar,
juclla ushyaypa ushyarachinga.
Auquillunchicunata aunishanta ćharcurmi ichanga,
waquin-waquillanta jishpichinga.»*
29 Jananmanpis Isaías niran:
«Auquillunchicunata waquin-waquillanta Munayniyuj Tayta Diosninchi mana jishpichiptin,
Sodoma marcawan Gomorra marca ushyacashan-jina nuwanchipis pasaypa illarishuwan caran.»*
30 Canan sumaj tantiyacushun.
Jäpa runacunata mana imatapis ruraycaptin,
alli ñawinwan Tayta Diosninchi rican Jesúspa shiminta ćhasquicushallanpita.
31-32 Israel runacunatam ichanga Jesúspa shiminta mana ćhasquicushanpita wasguiparan.
Paycuna Tayta Diosninchi alli ricananta munar,
Moiséspa shimin nishannuylla tucuyta ruraran:
«Paypa shiminta llapanta ćharcuptï,
alli ñawinwan Tayta Diosninchi ricamanga» nir.
Chaymi Jesústa tunichicuj rumita-jina ricar,
shimintapis mana ćhasquicuranchu.*
33 Israel runacuna Washäcujta wasguinanpaj shiminćhu Tayta Diosninchi musyachicuran:
«Sión marcaćhu juc runa yuringa pitapis llutäpacachinanpaj.
Tunichicuj rumita-jina runacuna ricanga.
Achcajmi wasguipanga.
Pingaymanpis ćhayanga
Paypa shiminta ćhasquicurmi ichanga,
alli cawayta taringa.
Imaypis mana pingayman ćhayangapächu» nir.*