14
Alli yachëyuq warmiqa wayinchö täraqkuna alli kawayänanpaqmi imallatapis allikunata ruran.Mana käyikuq warmiqa wayinchö täraqkunata llakitsinmi.
2 Cäsukuq nunaqa Teyta Diostam mantsakun.
Mana cäsukuq nunaqa Teyta Diosta manakaqpaqmi churan.
3 Mana yachëyuq nunaqa nuna tukurmi imatapis parlan.
Yachëyuq nunaqa imatapis allillatam parlan.
4 Yunta mana kaptinqa mikïkuna churakunapis jayäkunmi.
Yunta kaptinmi sï atska atska mikïpis churaran.
5 Mana ulikuq testïguqa rasun kaqllatam parlan.
Qellëpaq rëkur testïguqa manakaqtam pitapis tumpan.
6 Aksë nunaqa käyikuq këta munarpis manam churapukantsu käyikuq kananpaq.
Respetakuq nunaqa shumaqmi käyikurin.
7 Mana alli nunawan purirqa manam yachakunkitsu imatapis allita.
Pëta qatiränëkipa rantin witikï.
8 Yachëyuq nunaqa imanöpis kawëkanqanta käyikunmi.
Mana käyikuq nunaqa manam käyikuntsu imanöpis kawanqanta.
9 Mana käyikuq nunaqa jutsata rurarirpis alabakunmi.
Yachëyuq nunaqa jutsata rurarirpis Teyta Diostam perdonta mañakun.
10 Kikinllam nunaqa musyan shonqun llakikushqanta.
Y manam pipis musyantsu juk nunapa shonqun imanö kushishqa kashqanta.
11 Mana alli nunapitaqa castankunapis wakpa këpam ewkuyanqa.
Alli nunapa wayinchöqa yanapanakurmi alli kawakuyan.
12 Wakin nunakunaqa mana allita rurarpis allita rurëkäyashqantam yarpäyan.
Tsënö yarpar kawakurpis wanïmanmi ëwëkan.†
13 Asikurpis wakinqa llakishqallam shonqunkunachö këkäyan.
Tsëmi kushikurpis waqakïman chäyan.†
14 Mana alli nunaqa mana allita rurarirpis kushikunmi.
Alli nunaqa allita rurashqanpitam kushikun.
15 Mana tantiyakuq nunaqa llapan niyashqantam juklla creyirin.
Alli käyikuq nunaqa asïllaqa pitapis manam creyintsu.
16 Yachëyuq nunaqa Teyta Diosta mantsakurmi jutsa rurëta jaqirin.
Mana yachëyuq nunaqa mana mantsakushpam jutsata ruran.
17 Imallapitapis piñakuq nunaqa mana allitam rurarin.
Yachëyuq nunaqa imata niyaptinpis awantakunmi.
18 Mana käyikuq nunaqa imëpis llutan rurëllachömi kawakun.
Alli käyikuq nunaqa mas yachëyuqmi tikran.
19 Mana allita rurashqanta käyikurmi mana alli nunapis alli nunakunapa makinta mutsanqa.
Ima rurëtapis mana puëdirmi nöpanman qonqurikunqa.
20 Waktsa nunataqa mana imanpis kaptinmi kuyë yanasankunapis ajayäyan.
Rïcu nunataqa riquëzanpaq rëkurmi pïmëpis kuyan.
21 Nuna mayinta chikiq kaqqa jutsayuqmi tikrarin.
Waktsakunata yanapaq nunataqa Teyta Diosmi yanapan.†
22 Mana allita rurananpaq yarpakachaq nunaqa mana allim kawakun.
Allita rurananpaq yarpakachaq nunataqa pipis kuyarmi yanapan.
23 Uryakuq nunapaqa imëkanpis kanmi.
Parlakurlla kakuq nunaqa waktsayanmi.
24 Yachëyuqkunapaqa yachaq këninmi corönan këkan.
Mana yachëyuqkunapaqqa upa këninllam corönan këkan.
25 Rasun kaqllata parlaq testïguqa pitapis salvanmi.
Qellëpaq rëkur testïguqa pitapis wanïmanmi jitarkun.
26 Pëta mantsakuq nunatam kikintapis wamrankunatapis Teyta Dios yanapan.
27 Teyta Diosta mantsakuq nunaqa alli kawakïtam tarin.
Tsënöpam wanïpitapis safan.†
28 Mandakushqan nacionchö atska nunakuna kaptinqa rey kushikunmi.
Wallkaqlla nuna kaptinqa llakikunmi.
29 Käyikuq nunaqa juklla manam piñakuntsu.
Mana käyikuq nunaqa imallapitapis jukllam piñakun.
30 Alli shonqu nunaqa sänum kawakun.
Chikikuq nunaqa qeshyakurllam kakun.
31 Waktsata jipatsiq nunaqa kamakuq Teyta Diostam piñatsin.
Waktsata yanapaq nunaqa Teyta Diostam respetan.
32 Mana alli nunaqa llutankunata rurashqanpitam mana alli kawan.
Alli nunaqa allita rurashqanpitam yamë kawakun.
33 Yachëyuq nunapa yarpëninchöqa käyikïllam këkan.
Mana käyikuq nunapaqa yarpënin manam kantsu.
34 Nacionchö respetanakur alli kawakurqa pïmëpis kushikunmi.
Jutsata rurar kawayaptinqa tsë nacionta manakaqpaqmi churayan.
35 Sirwiqnin cäsukuptinqa rey kuyanmi.
Mana cäsukuptinqa piñakunmi.