Sacrificiukunata Aarón kayar qallanqan
9
Tsëpita puwaq junaqtanam Moisés qayarqan Aarónta, tsurinkunata y precisaq Israel nunakunatapis. 2 Tsëchömi Aarónta nirqan: “Purificätsina sacrificiupaq juk sänu wishita y kayana sacrificiupaq sänu carnëruta Teyta Diospa nöpanman apamunki. 3 Israel nunakunatana ninki purificätsina sacrificiupaq juk chiwata apayämunanpaq. Tsënölla kayana sacrificiupaq juk watayuq sänu wishita y juk watayuq sänu mallwa üshata apayämunqa. 4 Tsënölla alli pasakï sacrificiupaqpis juk töruta y juk carnëruta apayämunqa. Tsëkunata Teyta Diospa puntanchö pishtayanki. Tsënölla aceitiwan pichushqa jarinata apayämunqa. Tsënömi apayämunqa Teyta Dios kanan junaq noqantsikman chämunanpaq kaptin”.5 Aarónta Moisés ninqannöllam Israel nunakuna tsëkunata apayarqan Tinkuna Toldupa patiunman. Tsëmi llapan nunakuna Teyta Diospa nöpanman ëllukäyarqan. 6 Tsënam Moisés nirqan: “Apayämunqëkita kayanantsikpaqmi Teyta Dios nishqa. Ninqanta rurayaptikiqa chipapëpa chipaparmi yuripuyäshunki”.
7 Tsëpitanam Aarónta Moisés nirqan: “Purificätsina sacrificiupaq y kayana sacrificiupaq apamunqëki wätakunata altarman apëkur pishtë. Tsëkunaqa kanqa qamwan Israel nunakuna perdonashqa kayänëkipaqmi. Tsëpitana Israel nunakuna apayämunqan wätakunata altarman apëkur pishtë pëkunapis jutsankunapita perdonashqa kayänanpaq. Tsënö rurayänëkipaqmi Teyta Dios nishqa”.†
8 Tsënö niptinmi purificätsina sacrificiupaq apamunqan wishita altarman apëkur Aarón pishtarqan. 9 Pishtanqan wätapa yawarnintanam Aarónpa tsurinkuna makyayarqan. Tsë yawarman dëdunta yakarkurmi altarpa waqrankunata Aarón llushirqan. Sobraq yawartanam altarpa chakinman tallirqan. 10 Tsëpitanam purificätsina sacrificiupaq pishtanqan wätapa pacha rurunta, ñatinchö këkaq wiranta y wakin wiranta altarchö kayarqan. Moisésta Teyta Dios ninqannöllam llapanta rurarqan. 11 Ëtsantawan qarantaqa nunakunapa toldunkuna kashqanpita juk läduman apëkurmi kayarqan.
12 Tsëpitanam kayana sacrificiupaq apamunqan wätata Aarón pishtarqan. Tsë wätapa yawarninta tsurinkuna makyayaptinnam altarpa lädunkunata tsaqtsurqan. 13 Tsëpitanam tsë wätapa peqanta y cuartizanqan ëtsata apayaptin Aarónqa altarchö kayarqan. 14 Pachantapis chakintapis paqarirmi wakinta kayanqannölla altarchö kayarqan.
15 Tsënöllam purificätsina sacrificiupaq Israel nunakuna apayämunqan chiwata pishtarir purificätsina sacrificiuta puntata ruranqannölla Israel nunakunapaqpis rurarqan. 16 Tsëpitanam imëpis rurananpaq Teyta Dios ninqannölla kayana sacrificiuta kayarqan. 17 Qoyapa kayana sacrificiuta kayanqan jananchömi juk aptë tsaki mikïtapis kayarqan.
18 Tsëpitanam Israel nunakuna alli pasakï sacrificiupaq† apayämunqan törutapis carnërutapis Aarón pishtarqan. Tsë wätakunapa yawarninta tsurinkuna makyayaptinmi altarpa lädunkunata tsaqtsurqan. 19 Tsënöllam tsurinkuna makyayarqan törupawan carnërupa chupanta, pacha wiranta, pacha rurunta y ñatinchö këkaq wirantapis. 20 Tsë wirankunatam pishtashqa wätakunapa pëchunkuna jananman churayarqan. Tsëpitanam wiranllatana altarchö Aarón kayarqan. 21 Wätapa pëchunkunatawan allawka kaq chankantanam Moisésta Teyta Dios ninqannölla ishkan makinwan pallarkur wakman këman kuyutsirqan.
22 Purificätsina sacrificiupaq, kayana sacrificiupaq y alli pasakï sacrificiupaq apayämunqankunata altarman churarirmi Israel nunakunapa jananpa makinta pallarkur Aarón bendicionta qorqan.† Altarpita yarpurirnam 23 Aarónwan Moisés Tinkuna Tolduman yëkuyarqan. Tsëpita yarqamur Israel nunakunata bendicionta qoptinnam Teyta Diospa chipapënin rikakämurqan. 24 Teyta Diospa nöpanpita nina shamurmi altar jananman churayashqan ëtsatawan wirata rawrar usharirqan. Tsëta rikëkurmi llapan Israel nunakuna alläpa kushikïwan qaparir Teyta Diosta adorar lätakïkuyarqan.