2 Hermana Evodiata rogani, ajinallatataj hermana Sintiquitapis, Señorwan ujchaska uj yuyayllapi allinyanacapunancuta. 3 Kantapis, cheka llancꞌaj-masi, niricuyqui chay warmista yanaparinayquita. Paycuna nokawan cusca sumaj willanaspi llancꞌarkancu. Clementewan cusca llancꞌarkancu, tucuy llancꞌaj-masisniywanpis. Paycunaj sutisnincoka Diospa libronpi kelkaskamin tucuy wiñay causayniyojcunawan.

4 Cusicuychejpuni Señorwan ujchaska. Ujtawan niyquichej: ¡Cusicuychej! 5 Tucuy runaspa ñaupakencupi cꞌacha runas caychej ama japꞌinacojcunaka. ¡Señor cutimushanña!

6 Ama imamantapis chhicata llaquicuychejchu. Manachayrí tucuy sonkowan Diosmanta mañacuychej tucuy imapi. Mañacuyniyquichejpeka tucuy imatapis payman willaychej graciasta kospa. 7 Chanta Dioska tucuy sonkoyquichejta yuyayniyquichejtapis allin cayninwan wakaychanka Cristo Jesusnejta. Allinyachej Dios sonkonchejpi caspa samacuyninta kowanchej. Chay samacuynenka tucuy yuyaymantapis aswan jatunmin.

8 Ajinaka, hermanosníy, sumaj imaspipuni yuyaychej. Tucuy cheka cajpi, tucuy cꞌacha cajpi, tucuy allin cajpi, tucuy llimphu cajpi, tucuy sumaj cajpi, tucuy allin niska cajpiwan yuyaychej. Chay sumaj mentaska imaspipuni yuyaychej chaycunata ruwanayquichejpaj. 9 Nokamanta yachacuskayquichejta, japꞌiskayquichejta, uyariskayquichejta, ricuskayquichejtawanka ruwaychejpuni. Ajinapi allinyachej Dios kancunawan caconka.

10 Anchatapuni cusicuni Señorpi watejmanta qhuyacuyniyquichejta nokapaj ricuchiskayquichejraycu. Yachanitaj nokamanta yuyashaskayquichejtapuni, astawanrí mana imaynamantapis yanapawayta atisharkanquichejchu. 11 Chaytaka mana pisiwaskanmantachu parlashani. Manachayrí yachaska caniña imayna caskaypipis cusiska causacuyta. 12 Yachani causayta mana capuwajtin; yachallanitaj causayta ashqha capuwajtinpis. Sajsaska caytapis chayrí yarkhaska caytapis, mana pisichicuypipis chayrí pisichicuypipis yachaska cani. 13 Callpachawajniy Cristowan ujchaska tucuy imapaj callpayoj cani. 14 Astawanpis cꞌachata ruwarkanquichej llaquiyniypi cuscachacuwaspa.

15 Filiposmanta hermanos, yachanquichejjina sumaj willanaspi llancꞌaskaymanta yanapataka kancunallamin kowarkanquichej. Sumaj willanas kallaricushajtin Macedoniamanta llojsejtiy Diospa ajllacuskasninmantaka kancunalla yanapawan cuscachacuwarkanquichej. 16 Tesalónica llajtapi cashajtiypis mana uj cutillatachu pisiwaskanpi yanapata apachimuwarkanquichej. 17 Chaytaka mana konawayquichejta mascꞌaspachu nini. Manachayrí mascꞌashani aswan ashqha cosechajina Diospa ñaupakenpi kancunapaj cananta. 18 May ashqhatapuniñamin kowarkanquichej. Tucuy ima pisiwaskanpi juntꞌaskaña cashani, apachimuwaskayquichejta Epafroditomanta japꞌispa. Chaytari mana nokallamanchu kowarkanquichej. Manachayrí sumaj kꞌapayniyoj jaywanajina Diosman koska cashan paytataj cusichin. 19 Diosniyka khapaj atiyninmanjina tucuy pisisuskayquichejta juntꞌachisonkachej Cristo Jesuswan ujchaska caskayquichejraycu. 20 Dios Tatanchejka wiñaypa wiñayninpaj yupaychaska cachun. Ajina cachun.

21 Napaycuychej Cristo Jesuswan tucuy ujchaska Diospa runasninta. Napaycamusunquichej nokawan caj hermanos. 22 Napaycamusunquichej tucuy Diospa runasnin astawanka jatun camachejpa wasinmanta cajcuna.

23 Señorninchej Jesucristoj cꞌacha yanapaynin tucuy kancunawan cachun. Ajina cachun.