4
Astawan sutꞌinchariyta munani. Chayake japꞌej wawaka manaraj runayashaspaka uj camachijinallarajmin cashan. Tucuy chayake paypata cashajtinpis suyanan tiyan japꞌinanpaj. 2 Wawallaraj cashajtenka tatan churapun uywajcunata khawajcunatawan tatanpa ajllaskan pꞌunchay chayamunancama. Chaypachalla japꞌenka chayakentaka. 3 Nokanchejwanpis quiquillantaj carka. Manaraj Cristo jamushajtin Diosmanta pisillata yacharkanchej. Chayraycu cay pacha runaj yachaynin camachiwarkanchej. 4 Diosrí ajllaskan pꞌunchaypi Wawan Jesucristota cachamorka. Wawanka warmimanta nacecorka. Payka israel ayllupi nacecuspa camachiskasnincuta casorkapuni. 5 Ñaupajpi chay camachiskasman wataskas carkanchej. Chayraycu Dios Wawanta cachamorka chay camachiskaspa juchachayninmanta cacharichinawanchejpaj paypa wawasninpaj japꞌicapunawanchejpajtaj.6 Wawasnin caskayquichejta ricuchinanpaj, Dios sonkoyquichejman Santo Espirituta cachamorka tiyacunanpaj. Wawan Jesús mañacuskanmanjina chay Espíritoj atiyninwan cusiskas Diosta khaparinchej: “¡Munaska Tatáy!” nispa. 7 Chayraycu Diospa wawan canqui manaña camachichu. Wawan caskayquiraycutaj wiñay causayta Dios kosonka Cristonejta.
Pablo yuyan allinnincupaj
8 Ñaupajpirí Diosta mana rejsiskayquichejraycu ruwaska dioscunaj camachisnin carkanquichej. Chekamanta chaycunaka mana dioscunachu cancu. 9 Cunanrí Diosta rejsinquichejña. Astawanka Dios kancunata rejsisunquichej. Chanta ¿imaraycutaj ujtawan cay pacha yachaycunata camachisjina casuyta munanquichejrí? 10 Chekanpaj khawaskas cayta munaspa wakaychashanquichej ajllaska pꞌunchaycunata mosoj quillasta, tꞌakaska tiemposta, watastawanpis. 11 Llaquichiwanquichej. Mayta manchachicuni kancuna uqhupi sinchꞌita llancꞌaskayka yankhapaj cananmanta.
12 Jesucristopi hermanosníy, mayta niyquichej: Noka Cristopi japꞌicuni, kancunapis ajinatapuni paypi japꞌicuychej. Amataj israelcunaj ruwanasnincuman camachis caychejchu. Imaynatachus ñaupajta carkanquichej Cristopi japꞌicuspa, nokapis ajinallataj carkani. Kancuna ni imapi mana allin cajtaka ruwawarkanquichejchu. 13 Yachanquichej onkoska caskayraycu kancunaman Cristomanta willararkayquichej ñaupajpi. 14 Onkoyniy llaquichiwarka. Chaywanpis mana pisipichu khawawarkanquichej nitaj khesachawarkanquichejchu. Astawanrí japꞌiwarkanquichej Diospa uj angelninpis chayrí Jesucristopis caymanjinata. 15 Cunan ¿imaraycutaj manaña cusicunquichejchu yachachinasniywanrí? Noka kancunata mentaspa chekata nini, aticunmanchus carka chayka, ñawisniyquichejtapis orkhocuspa kowanquichejman carka. 16 ¿Cheka cajta kancunaman niskayraycuchu chejnisojniyquichejtajina khawanquichej?
17 Llulla yachachejcuna mayta munancu suwayta sonkosniyquichejta. Munaynincurí mana allinniyquichejpajchu. Imaraycuchus paycunaka munancu tꞌakasuyta sumaj willanaspi allinniyquichejmanta. Chayjinapitaj munancu paycunaman cꞌascacunayquichejta. 18 Allin yuyaywan munacususkayquichejka allinpuni canman. Astawanrí munacusunallayquichejpuni mana noka kancunawan cashajtillaychu. 19 May munaska wawasníy, onkocushaj warmijina ujtawan kancunapaj ñacꞌarishani Cristojina canayquichejcama. 20 Cunanpacha munayman kancunawan uyapura parlayta manataj kelkaskallaywanchu. Cristopi causayniyquichejmanta mana yachanichu imatachus yuyanayta.
Uj ricuchina Agarmanta Saramantawan
21 Kancuna, camachiskas ruwaynejta chekanchaskas cayta munajcuna, niwaychej: ¿Manachu Diospa palabranta uyarerkanquichej? 22 Imaraycuchus chay kelkaskanpi nin Abrahamka iscay khari wawasniyoj caskanta. Uj carka camachin Agarmanta, ujnintaj warmin Saramanta. 23 Chay camachinmanta cajka nacecorka Abrahampa munayninmanjina. Paypa warminmanta cajtaj nacecorka Diospa sumaj niskanmanjina. 24 Chaycunaka uj ricuchina caspa yuyachiwanchej Diospa iscay tratosninmanta. Ujnin Jesucristopi japꞌicuymin cashan, ujnintaj Moisespa camachiskasnin. Chayta Sinaí orkomanta Dios korka. Chay tratonmanjina nacecojcunataj camachi warmi Agarpa wawasninman rijchꞌacuncu camachiskaspa camachisnintaj cancu. 25 Imaraycuchus Agar suteka yuyachillawanchej Sinaí orkomanta Arabia jallpꞌapi. Chaymin yuyachiwanchej cunan pꞌunchay Jerusalén llajtayojcunamanta. Paycunaka camachiskaspa camachisnin cancu. 26 Janaj pacha Jerusalén llajtayojcunarí camachiskasmanta cachariskas cancu. Astawanka tucuy nokanchej Jesucristopi japꞌicuspa janaj pacha llajtayojcuna canchej mosoj Jerusalén llajtamanta. 27 Ajinatamin Diospa palabranpi nin:
Cusicuy, mana wawallicoj nitaj wachayta atej warmi.
Khapariytaj cusiywan onkocuy nanayta mana rejsej warmi.
Chekamanta sapan khesachaska warmi mana wawasniyoj cajpis
khepata Diospa sumaj niskannejta aswan ashqha wawasniyoj canka kosayojmanta niskaka.
[Chay wawastaj janaj pacha llajtayojcuna cancu Jesucristopi japꞌicuskancunejta.]a
28 Hermanosníy, Diospa sumaj niskannejta Abrahampa wawan Isaac nacecorka. Ajinallataj nokanchejpis Isaacjina Diospa wawasnin canchej paypa sumaj niskanmanjina. 29 Astawanrí cunanpis ñaupajpijinallataj cashan. Abrahampa munayninmanta nacecojka llaquichisharka Diospa sumaj niskannejta nacecojta. Ajinata cunanpis camachiskasta ruwaskanejta chekanchaska cayta munajcuna llaquichishancu Diospa runasninta. Chay runasnintaj Santo Espíritoj munayninmanjina naceskas cancu. 30 Chaywanpis Dios palabranpi nin: “Kharkoy camachi warmita wawantinta. Imaraycuchus camachi warmej wawanka chayaketa mana japꞌenkachu quiquin warminpa wawanwan cuscaka”, nispa. 31 Ajinaka, hermanosníy, nokanchej Diospi japꞌicojcunaka manamin camachi warmej wawasninjinachu canchej. Manachayrí Diospa wawasnin canchej, janaj pacha llajtayojcuna.