Uva sachꞌamanta quiquinchana
15
‘Noka cani cheka uva sachꞌa, Tataytaj chayta llancꞌajka. 2 Uvawan llancꞌajka tucuy mana pokoj ramata cꞌutun. Tucuy pokoj ramatarí cꞌutun astawan pokonanpaj. Ajinallatataj nokawan ujchaska runasniywan Tatayka ruwan. 3 Nisuskayquichejnejta juchamanta llimphuchaskasña canquichej. 4 Nokapi japꞌicuwaspa cacuychej, nokataj kancunawanpuni cacusaj. Ajinapi ujchaska canchej. Uj rama mana sachꞌapi cacuspaka mana pokoyta atinchu. Quiquillantataj sichus nokapi japꞌicuspa mana cacuwajchejchu chayka, kancunapis mana cꞌacha runas cayta atinquichejchu.5 ‘Noka cani uva sachꞌajina kancunataj ramasniyjina. Nokawan ujchaska cajlla cꞌacha causayniyoj cashanquichej ashqha pokoyniyoj ramajina. Mana nokawan ujchaska caspaka ni imata ruwayta atinquichejchu. 6 Nokawan mana ujchaska cacoj runaka cꞌutuska ramajinamin. Cꞌutuska ramaska wijchꞌucun chꞌaquinanpaj. Chaymantataj tantacun ninaman ruphachiska cananpaj.
7 ‘Nokawan ujchaskachus cacunquichej niskasniypis sonkoyquichejpi chayka, imatachus munaskayquichejta Diosmanta mañacuychej. Kancunamantaj kosonka. 8 Cꞌacha causayniyoj caskayquichejka ashqha pokoyjinamin. Chaywan Tatayta jatunchanquichej, yachacojcunay caskayquichejtataj ricuchinquichej. 9 Imaynatachus Tatay munacuwan, ajinallatataj nokapis munacuyquichej. Ajinata munacuyniypi causacuychej. 10 Niskasniyta casuspalla munacuyniypi causacunquichej. Imaynatachus noka Tataypa niskasninta casuni, paytaj munacushallawanpuni, ajinallatataj niskasniyta casuwajchej chayka, nokapis munacuyquichej.
11 ‘Chay imasta nerkayquichej nokajina cusiskas canayquichejpaj quiquin cusiywan juntꞌa canayquichejpajtaj.
Jesuswan ujchaska cajcuna munanacuncu
12 ‘Caymin niskayka: Imaynatachus noka munacorkayquichej quiquillantataj kancunapura munanacuychej. 13 Uj runa amigosninraycu wañuycama churacojtenka chekatapunimin munacun. Chayjina munacuymanta astawanka mana canchu. 14 Niskasniymanjinachus ruwanquichej chayka, amigosniy canquichej. 15 Manaña camachitachu sutichayquichej. Uj camacheka camachejnin imatachus ruwashaskanta mana yachanchu. Tataymanta tucuy uyariskayta willarkayquichej. Chayraycu amigosniyta sutichayquichej. 16 Mana kancunachu nokata ajllacuwarkanquichej. Manachayrí noka kancunata ajllacorkayquichej [runasman willajtataj cacharkayquichej. Willaskayquichejwan runas nokapi japꞌicojtincu cusiskas canquichej. Cusiyniyquichejtaj wiñaypaj canka.]a Ajinapitaj nokawan ujchaska caspa imatachus Dios Tatamanta mañacunquichej, chayta kosonkachej. 17 Cayta niyquichej: Kancunapura munanacuychej, —nerka Jesús.
Cay pacha runaska Jesuspi japꞌicojcunata chejnincu
18 Nerkataj:
—Cay pacha runas kancunata chejnisojtiyquichejka reparaychej nokata ñaupajta chejniwaskancuta. 19 Cay pacha runaswan causaynincupi ujlla cawajchej chayka, cay pacha runaska munacusunquichejman carka. Astawanrí cay pacha runaswan causaynincupi mana ujllachu canquichej. Manachayrí noka cay pacha runasmanta ajllacorkayquichej nokapi japꞌicunayquichejpaj. Chayraycu cay pacha runas chejnicusunquichej. 20 Yuyaricuychej kancunaman cayta nisuskayta: Camacheka mana aswan curajpaj khawaskachu camachejninmantaka. Sichus nokata ñacꞌarichiwarkancu chayka, kancunatapis ñacꞌarichillasonkachejtaj. Sichus niskayta casorkancu chayka, kancunajtapis casullankancutaj. 21 Astawanrí tucuy mana allin cajta ruwasonkachej nokaj yachacojcunay caskayquichejraycu. Paycunaka cachamuwajniyta mana rejsincuchu.
22 ‘Sichus paycunaman mana jamuymanchu nitaj parlaymanchu carka chayka, mana juchachaskachu cancuman carka. Cunanrí ni imata atincuchu juchancuraycu cutichiyta. 23 Nokata chejniwajka Tataytapis chejnicullantaj. 24 Tucuy runamanta aswan jatuchej ruwanasta paycunaj ñaupakencupi ruwarkani. Chay jatuchej ruwaskasniytachus mana ricuncumanchu carka chayka, mana juchachaskaschu cancuman carka. Cunanrí ricuncuña chejniwaycutaj nokata Tataytapis. 25 Ajinaka Diospa palabranpi paycunamanta kelkaska juntꞌacun: “Khasimanta chejnicuwarkancu”, nispa.
Jesús Yanapajta cachamunanmanta