Kꞌuitjáña ti chjasin Babilonia
18
Ndá chrꞌéxi̱n kꞌuíkua̱n íjnko ángel kꞌuínkaji̱nxi̱n nka̱jní chónta nchónhña kjuachaxin landá ti chjasintajni la kꞌuínkaséña kixin ti ángel la imá tjáki̱ni.
2 a*Ndá ti ángel la itsen ndáchro:
―Ó kꞌuitjáña,
ó xika ti chjasin ijié Babilonia.
La kꞌóna ndo̱e ti jínahña la ti tꞌiximáxin ncha̱kuén jínahña la ko ka̱ké ti iko xritjaká la ko itjue̱é kaín iko jie̱he náxrjónhña.
3 b*Kixin kaín nación kókoa̱nxi̱n ti vino kuènté ti nkehe jínahña kjuajon tjan la ko ti sin rey tꞌe̱to̱an chjasintajni la kjuasiko tjan ijie̱.
La ti sin nchekji nkehe kuenté chjasintajni la kórico sin kixin jehe tjan kꞌue̱na tjan itsjé ti nkehe xrinchekji sin.
4 c*Ndá kui̱ha̱n íjnko itan kui̱xi̱n nkaya nka̱jní ndáchro:
―Tꞌaxrjéxinra ti chjasin méhe̱,
jahara chojni tinkáchónki ti janhan,
kixin chrókjuásinhñara ijie̱ éxi jehe tjan la ko chrókjuasótexínhñara ti nkehe tso̱hen ntiha.
5 d*Kixin ti ijie̱ tjasin tjan mé kꞌuánkí hasta kjuíjixraká nka̱jní la Díos xráxinkaon ti nkehe nduáhya kjuíchꞌe tjan.
6 e*Chje̱héra tjan éxi ti nkehe kjuíchꞌehe tjan íso chojni la ko tjénke̱héra tjan yáya éxi ti nkehe kjuíchꞌe tjan.
La chꞌénara yáya fuertexin ti nkehe itsꞌi tjan éxi ti tsíkjichꞌéna tjan ikꞌui íso chojni.
7 f*A̱ntsí chrókjuasóte tjan éxi ti nkehe kjuíchꞌehe tjan íso chojni kixin kjuínchehnke tjan la ko kꞌuéchónta tjan kaín nkehe kóxríhi̱n tjan.
Kixin jehe tjan ndáche tjan a̱sén tjan:
“Ntihi tétja̱xian éxi ijnko reina.
Janhan la jehya ijnko chojni ikꞌán la ko tsjasótehya janhan.”
8 Méxra̱ nkoko̱a ña̱o itsi kaín ti kjuaxikaon tso̱hen tjan:
itsꞌen tjan,
tsjasóte tjan la ko tsꞌenxín tjan kjinta la ko tsochexín tjan xrohi kixin Itꞌéni Díos chónta kaín kjuachaxin la sinchekjasóte ti jehe tjan.
9 g*A̱ndá ti sin rey siín chjasintajni tsíkjasinko tjan ijie̱ la ko nchónhña kjuaxróxin kꞌuéchónta sin kixin ti nkehe kꞌuéchónta tjan la tsotsjánka sin la ko tsꞌèya sin ti ó tsꞌikon sin tsꞌàya tjan ihnchi ti ó tsoche tjan.
10 Ndá jehe sin la ikjín tsꞌejó sin kixin tsochrakon sin kixin koí sin tsjasóteko sin tjan la tsondáchro sin:
―Nóa ti jaha chjasin ijié,
chjasin Babilonia,
ti chjasin imá tꞌe̱to̱an kixin titàya̱ ikui ti kjuasótia.
11 h*Ti sin nchekji nkehe la kja̱xin tsotsjánka sin la ko tsꞌèya sin kixin xi̱kaha kóhen ti chjasin a kixin í tso̱kohya nkexro tsꞌe̱na ti nkehe sinchekji sin:
12 i*éxi ti oro,
plata,
ixro̱ náxrjón,
perla,
ika náxrjón tsíkꞌónaxín lino,
ika seda,
ika morado la ko kjátse;
kja̱xin kaín ti inta náxrjón xraxé,
ti nkehe tsíkꞌónaxín bronce,
ti nkehe tsíkꞌónaxín ñeno elefante la ko ixro̱ mármol,
13 canela,
xro̱a̱n xraxé náxrjón,
chi̱nko̱ xraxé náxrjón,
xro̱a̱n mirra,
vino,
aceite,
harina na̱jni la ko noa trigo,
la ko kja̱xin iko tamá nkehe,
kolélo,
koka̱te̱,
carreta la ko chojni chꞌexín ixra̱.
14 La tsondáche sin ti chjasin:
―Í chontahya ti ito imá náxrjón kꞌuékóxríhan la ko kaín ti nkehe náxrjón tjete kꞌuéchonta la í tsꞌikonhña ínaá.
15 j*Ti nkexro kꞌuékjinchekjihi nkehe ti chojni a,
la kórico sin kixin ti nkehe kjuínchekjihi sin tjan.
La ikjín tsꞌejó sin kixin tsochrakon sin kixin koí sin tsjasóte sin la tsotsjánka sin la ko tsꞌèya sin,
16 la tsondáchro sin:
―Nóa ti chjasin ijié.
Kuekꞌitsá ika lino náxrjón tsjehe la ko ika kjátse tie la ko kjátse la ko chónta chika oro la ko ixro̱ perla tjete sínkí.
17 k*A̱ndá nkoratókoá kjuéje̱ kaín ti nkehe tjete kꞌuéchónta tjan ―mé xi̱kaha tsondáchro sin.
Kaín ti nkexro tꞌe̱to̱an ti ntabarco la ko ti sin síxehen ti ntabarco la ko ti sin ichꞌe ixra̱ chritaón nda̱ñao la kuíto̱he sin ikjín
18 l*la ti ó kꞌuíkon sin ti ihnchi síchrìinxín ti chjasin,
la kꞌóyako sin,
ndáchro sin:
―¿Xá nke chjasin chrókóyóhe̱ ti chjasin ijié i?
19 m*La kuikjajin sin ikja sin inche la tsjánka sin,
ndáchro sin:
―Nóa ti chjasin imá ijié.
Ti sin kꞌuéchónta ntabarco chritaón nda̱ñao la kórico sin landá nkorató koá kjuixin kꞌuitjáña ti nkehe kꞌuéchónta sin.
20 n*A̱ndá kaín ti nkexro tjejó nka̱jní tso̱chéhe̱ sin kixin xi̱kaha kóhen ti chjasin a.
Tócháha̱ra jahara kꞌuájikoara Ìnchéni la ko jahara kꞌuéchronkaxinra itén Díos la ko kaínra kuinkachónkira chꞌan kixin Díos kjuínchekjasóte ti tjan a,
kixin kaín ti nkehe jínahña kjuíchꞌe tjan.
21 o*A̱ndá ijnko ángel chónta nchónhña kjuachaxin mé kjua̱tse̱n ijnko ixro̱ éxi ijnko ixro̱ kuènté molino la kꞌue̱nkí nda̱ñao la ndáchro:
―Xi̱kihi tso̱han jaha,
chjasin Babilonia,
ti chjasin imá ijié,
la í tsꞌikonhña chojni chrꞌéxi̱n.
22 pq*Í tsienhña sin isón kuènté ti arpa,
i tsienhña sin tsotsje chojni,
tso̱kohya ti isón kuènté flauta la ko trompeta ti nti̱a kuèntá la ko tso̱kohya ninkexró sichꞌe ixra̱ ntiha la ko í tsienhña sin ninkehó ruido kuènté ti ixro̱ molino.
23 Í tsꞌinkaséñaxínhña xrohi kuènté ninkehó lámpara la ko í tsienhña tsꞌixin kia tso̱te̱he chojni.
Kixin ti sin kꞌuékjinchekji nkehe ntiha ósé la imá kuékꞌe̱to̱an sin kuènté chjasintajni la kꞌuékjichꞌiyehe sin ti sin siín chjasintajni,
kꞌuékjinchexro̱a̱n sin la kjuíchꞌiyehe sin kaín chjasin.
24 r*Kixin ti chjasin ijié mé kónoxín ijni̱é ti sin tsíkꞌen kꞌuéchronka itén Díos la ko ti sin tinkáchónki Ìnchéni la ko kaín ti sin tsíkꞌen kuenté chjasintajni.