Selusien koa helamu ten
Siud
?Isei mutis selusien koanik?
Meatin koa mutis selusien koanik, isen Siud.a Kei viteni keke vi slev onen Iesu Kristo ka tunali Tiemes.b Kei vi tunali Iesu koa isen tamun vi Sudas.c Avaseini Siud ka Tiemes, tunali Iesu keilu, lurkurtei anatin keke Iesu vi Mesaea navong moul semau,d keilu lukur anatin esuk katau en matien onene ka lumai luvi elda en sios onen Kristin keil.f
?Isei vuli selusien koanik mulamu?
Siud mutis selusien koanik va min Kristin keil en out vasig vesesal en sua 65 AD (sua keil koa katau en avong Iesu avasi). Kei mul mutis min keil veni kur longlongien keke tiser taluvosien keil amul avisein keil en sakien keil koa romaltei.
?Siud mutis selusien koanik vensa?
Siud sel kat Kristin keil anousiltei koakeil moulien one tisa – Tei en tiser keil aviteni keke Kristin keil akilea avoum vatisa vamukave veni more envatien onen Ahi marite imok,h ka Siud viteni keke Ahi hesan mahien min koakeil amum tisa.i
Siud sel kat Kristin keil avousil kat hihiseien keil enges koa vi anatin – Siud sel kat Kristin keil keke avalomal vakeih en demkatien koa Iesu ka eiloheh keil onen alingi tuai mul en meatin keil onen Ahi.j Hemukonek, keil il ilomal hekeih veah navong Asuv Iesu Kristo hemai ris eni.k
Mari rendemien tai ten selusien koanik mul en Siud 1:3
Onak eli keil … tahos imok keke nisel kat kami mau keke miheles mihelomal hekeih en anatinien ten demkatien onami. Koanik vi vati demkatien koa Iesu ka eiloheh keil onen alingi tuai mul en meatin keil onen Ahi ka amundesin keil eni.
?Asa mul en selusien koanik?
1. Selkatien keke Kristin keil avalei kokoe revi ven tiser taluvosien keil. (1:1-16)
2. Selkatien keke Kristin keil availea revi hihiseien ten anatinien keke demkatien one hemoul hemarite. (1:17-23)
3. Selusien ekor. (1:24-25)