Selusien koa helamu ten
2 Timoti
?Isei mutis selusien koanik?
Pol mutis selusien koanik en sua 67 AD (sua keil koa katau en avong Iesu avasi) ka vi selusien ekor onen. Navong mutis selusien mulamu va min Timoti ka Taetas, mul sao veah en vangi Kristin keil en taon houlu. Ka navong va en out Rom, avuli kati ka aso risi va en eim takeih.a Navong va en kot, alei rahit usite onen ka avit, hervitei tuetin, kei hemat. Navong kur longlongien teni, mutis leta tamun keke va min Timoti vit hekalah hemai helesi. Avaseini keke kilea hemat, tisien ekor koanik onen Pol mul rie lati keke demkatien onen keih,b en vati li mok hihiseien keil ten Sios hemal vasi,c ka en vati li mok keke moulien onen metai keil ten Sios hetolas lisenges.d
?Isei vuli selusien koanik mulamu?
Pol mutis selusien koanik va min Timoti,e ka en vati keke koakeil ten sios ten out Efeses avalonge.f Selusien koa helamu ten 1 Timoti vit kilea Timoti vi isei.
?Pol mutis selusien koanik vensa?
Pol en vati valei ris Timoti – Pol kilea keke hervitei tuetin uasi hemat,g sakini kei en vat valei ris Timoti helamu en avong hemat en hen me-Rom keil.h
Pol en vati vasel kat Timoti keke avong takeih mul mai – Pol lei kilea keke avong takeih mul mai ven koakeil amusil kat Iesu, sakini en vati keke keil ilomal hekeih en demkatien one.i
Pol en vati vasel kat Timoti valei kat revi hihiseien keil onen – Pol vis Timoti helei kat revi hihiseien onen navong san selusien onen Ahi,j ka hel hehitehiten selusien onen Ahi.k
Pol en vati vasel kat Timoti avong tamun usil meatin keil ten luvosien – Meatin ten luvosien keil amul veah ka Pol sel kat ris Timoti nousil kattei keil ka nasel retavoaitei natal min keil.l
Mari rendemien tai ten selusien koanik mul en 2 Timoti 2:15
Kum hetahos hesakini kokilea kovalomal en meten Ahi suval meatin toumien koa romemoutei ven umen onen. Kihi meteisau navong komul kovisein meatin keil en selusien ten anatinien onen Ahi.
Mari rendemien tamun ten selusien koanik mul en 2 Timoti 3:16-17
Selusien keil vasi koa mul en Tus Votut ka ven Ahi. Selusien keil enek atahos tahihiseien, ten selkatien, ten hit luvat sise koa mal, ka tahisein meatin keil keke anoumontei mun sakien tatisa keil one. Tus Votut mul sak mesein meatin keil onen Ahi keke akilea avoum vasin tounah koa vatahos.
?Asa mul en tus koanik?
1. Hihiseien usil koakeil akur umen onen Ahi. (1:1–2:26)
2. Selkatien min Kristin keil keke avalomal vakeih en demkatien one en avong keil takeih. (3:1–4:22)