Selusien koa helamu ten
Pilipae
?Isei mutis selusien koanik?
Pol, koa vi eiloheh tai onen Iesu Kristo mutis leta koanika en sua 61 AD (sua keil koa katau en avong Iesu avasi), navong mul en eim tai en out Rom ka meatin tavaeen keil amul alei kokoe eni.b
?Isei vuli selusien koanik mulamu?
Pol mutis selusien koanek va min Kristin keil koa amul en out Pilipae. Navong Pol mul mual keke vahitehiten more longlongien usil Iesu Kristo en ualien koa elu onen,c kei les meatin tai ten provins ten out Masedonia en matil vovoien tai.d Meatin enek mul vise keke vamai ven keil. Sakini, Pol va en out Masedonia, ka va rohtoh en taon ten out Pilipae ka meatin houlu akur demkatien en out enek.e
?Pol mutis selusien koanik vensa?
Pol en vati vamasmas Kristin keil en out Pilipae ven sanien one – Navong Kristin keil en out Pilipae alonge keke Pol mul en hen kavmen ten out Rom, keil asan sanien tai vakatauni.f
Pol en vati vahisein Kristin keil en out Pilipae en sakien tetahos koa rie lati keke meatin tai vi Kristin – Pol sel kat koakeil en sios ten out Pilipae vit Kristin tai, rendemien onen hehi netan hesuval koa Iesu Kristo mumoni,g hel heloh hekeih keke hetokol keite ten lohlohien ten demkatien onen,h hermundemkotei ven etai tounah,i ka kilea hehisu en sakvisien keil hetal min keihoen koa Iesu Kristo mul sani mini.j
Pol en vati vasel kat Kristin keil en out Pilipae avakur sien val en moulien one – Navong Pol mutis va min Kristin keil enek en out Pilipae, keil amul avisu en avong keil takeih ven demkatien one.k Sakini kei sel kat keil avoumon tounah vasi vatal min sien.l
Pol en vati vasel kat Kristin keil en out Pilipae avalah ruai vatahos – Sakvisien keilm ka hihiseien tateisav keiln amul asakin Kristin keil en out Pilipae amul amusel ral min keil eris. Sakini, Pol sel kat keil keke avalah ruai vatahos.o
Mari rendemien tai ten selusien koanik mul en Pilipae 1:21
Munak nimoul, nihati lat Iesu Kristo hetal min moulien onak. Ka munak nimat, koanek hetahos imok, veni niha nito hetal mini.
Mari rendemien tamun ten selusien koanik mul en Pilipae 2:5
Rendemien koa mul en kami hesuval etin rendemien koa mul en Iesu Kristo.
?Asa mul en selusien koanik?
1. Koakeil amusil Kristo avisu en avong keil takeih ral min sien. (1:1-30)
2. Koakeil amusil Kristo amul amumon sakien keil onen ral min sien. (2:1-30)
3. Koakeil amusil Kristo amulomal keih en demkatien one ral min sien. (3:1–4:1)
4. Koakeil amusil Kristo akataun mesav keil ral min sien. (4:2-23)