Selusien koa helamu ten
1 Korin
?Isei mutis selusien koanik?
Pol, koa vi eiloheh tai onen Iesu Kristo mutis leta koanika en sua 55 AD (sua keil koa katau en avong Iesu avasi), navong sua etel onen en out Efeses vesesal vavus.b
?Isei vuli selusien koanik mulamu?
Pol mutis selusien koanek va min Kristin keil koa amul en taon ten out Korin. Kei va rohtoh ven keil en sua 52 ADc ka ro ral min keil avati teindan outel (18).d En out enek kei visu min Akuila keilu Prisila ka lumusili telva en taon ten out Efeses.e Evus, Pol ling keilu en out Efeses keke luhoum hetal min meatin keil ekonek. Navong keilu lumum, luvisu min Apolos ka luvisein revi usil more longlongien koa lukuri.f Evus, lusila vaha vakataun Kristin keil en out Korin ka out sav keil en provins ten out Akea.g
Taon ten out Korin vi mari taon tai koa sip houlu ason angka eni, sakini meatin houlu amumon bisnis keil houlu ien. Vesesal meatin vasi keil en out enek uva netan min ahi Apafrodaeti, koa avit vi ahi ten envatien. Ka navong meatin keil umai keke avaha netan mini, akanian vituai ka amatil ral min hoeaso keil koa aro en eim votut enek.h Sakini, meatin keil ten out Korin avotin keih keke avalokovein sakien tisa enek.i Ka tounah sav koa kur out, Kristin keil en out Korin amul ariti vas keil en vangite keil ka amul asel min keil eris.j
En ualien etel onen Pol,k Pol va ris en out Efeses en sua 53 AD ka mum ekonek.l Navong Pol long usil tounah koa mul sak vis Kristin keil en out Korin, kei mutis leta koanek.
?Pol mutis selusien koanik vensa?
Pol en vati vatalimal en rendemien one keke mal avousil isei – Kristin keil en out Korin amul ariti vas keil en vangite keil musil avat tateisav keil.m Ka Pol viteni min keil keke mal avousil Iesu enges, ka eiloheh keil ka tiser sav keil one avi meatin toumien enges onen koa kei sani vakataun keil.n
Pol en vati vatalimal en rendemien one usil sakien koa amatil vituai ral min koakeil arvitei asoe keil – Kristin keil en out Korin amul amatil ral min meatin sav keil koa arvitei asoe keil kati musil sakien matu one.o Ka Pol viteni min keil keke sakien enek romaltei en koakeil avit avi Kristin,p ka romaltei keke avalah ruai vatal min Kristin sav keil koa amul amumon sakien tisa enek.q
Pol en vati vatalimal en rendemien one usil tounah koa Ahi maen Kristin tai voumoni – Kristin keil en out Korin amundemi keke Ahi maen keil avoumon tounah vasi koa e vati avoumoni,r ka maen keil avaan tounah vasi emun.s Ka Pol viteni min keil keke vi anatin koa Ahi maen Kristin keil avaan anien vasi,t ka sakien keil koa umoni nasakintei Kristin sav keil koa ales tounah enek vi tisaen anamot en demkatien one.u Ka sakien koa meatin mumoni en aven hetolasv veni aven vi usi aven Iesu Kristow ka aven vi Eim Votut onen Ahi koa Ninin Votut onen mul ien.x
Pol en vati vatalimal en rendemien one usil sanien keil koa Ninin Votut mul sani min keil, ka sakien koa um hetali – Kristin keil en out Korin avasi keil veni Ninin Votut san sanien houlu min keil,y ka navong alah ruai keke avaha netan min Ahi, keil vasi asak visi avoum vatal min sanien one en avong vatas.z Ka Pol viteni min keil keke sakien enek rokatauntei meatin sav keil. Sakini kei visein keil keke Ahi mul san sanien keil ekek vakataun Kristin vasi keila navong amum ral min sanien keil one en sakien ten envatien,b ka mal avoum vatal min keil vousil oda kati teni.c
Pol en vati vatalimal en rendemien one keke Iesu moul eris ran matien ka Kristin keil umoni hesuvali – Tei en Kristin keil en out Korin aviteni keke koakeil umat asakras avamoul eris ran matien.d Ka Pol viteni min keil keke anatinien keke meatin imoul eris ran matien vi vatte ten demkatien onen Kristin keil.e
Mari rendemien tai ten selusien koanik mul en 1 Korin 1:10
Tuak ka ahinkuli keil en demkatien, en isen Iesu Kristo, asuv orer, nasel kat kami keke miheto en tomat hetal min kami. Anatin, en tounah vasi koa mimul mimumoni, mihoum vituai eni. Ka en tounah koa mikur anatin eni, rendemien onami hetas. Sakien ten selien ka tasilien hetovuol en kami.
Mari rendemien tamun ten selusien koanik mul en 1 Korin 6:19-20
Kami mimumoni suval koa mireingeingeni keke avemi vi Eim Votut ka Ninin Votut koa Ahi sani min kami mul ro ien. Tahos mikilea keke moulien onami rovitei mun onami, avi onen Ahi. Veni kei vul lat kami ral min moulien onen Natnali koa vi tounah tai koa mariso vis mariso mok. Sakini, mihehati lat isen Ahi en tounah vasi koa mimul mimumoni hetal min avemi.
?Asa mul en selusien koanik?
1. Pol visein keil vit sakien ten tasilien romaltei. (1:1–4:21)
2. Pol visein keil vit sakien koa amatil ral min koakeil arvitei asoe kati keil romaltei. (5:1–6:20)
3. Pol visein keil usil tounah koa avisi.
a. usil sakien ten tetaliheien. (7:1-40)
b. usil sakien koa uva ris en eim votut onen ahi sav keil. (8:1–11:1)
c. usil sakien koa umoni navong alah ruai keke uva netan min Ahi. (11:2–14:40)
d. usil sakien koa Kristin keil imoul eris ran matien. (15:1-58)
e. usil mukave isak mesein keil avasan kataunien min Kristin sav keil ten out Serusalem. (16:1-4)
4. Selusien ekor. (16:5-24)