อาโกบ ตึอน แฮะ ฮอต ยัม, อาโยว วี ฆึบ ดี โดว ฆูณ อัน, ยาม ตาง, วี อูห ฆูณ อัน. 2 อาโยว วี จัร แดเจณ อัน, เฆ อี มูห ซาราโวน อัน, แตห เฆ พ็อห ซีนัม ดี โดว ฆูณ อัน, แกวะ แตห อัน อูห, แกวะ แตห อัน อัม. แฮะ ฮอต เฆ ซาราโวน วี โบง ปาย ตี. 3 เฆ โลว พ็อห ซีนัม ดี โดว อัน อาดา พวน ฆึร ซีแง. อึณ โลว เหลณ แคะ ตี. เฆ ดูอี อาโมยว แอฆึบ วี กลึร อาดา บู ฆึร ซีแง.

4 วาย แฮะ โตต อาคราว ดี โลว กลึร เฆ, อาโยว วี กาลาง ดี อามู อามาด คูนดีคัม ต็อห, “แตห เบ กาลาง ดี คูนดีคัม ปาย นี, 5 ‘ดอ แฮะ หงา ดี ยัม ฆูณ โอว, อัน แฮะ แตห โอว ดัว กาดีก ซัดฌา ดี อัน, แตห โอว เบลห โดว โบ็ง อัน แคง บาเรว อัน แคง มืง กานัณ.’ โคว, โอว หมาณ แม คูนดีคัม, แตห แม ควาง โอว ฮาว ดีบ ฆูณ โอว. แฮะ ฮอต โอว ดี วี ตัห ดี นี.” 6 คูนดีคัม บอ เวียะ โฆรห อัน ต็อห, “แตห แม ฮาว ดีบ โดว โบ็ง ฆูณ แม, แตห แม โบง ปี ดัว แม กาดีก ซัดฌา ดี อัน.” 7 ปัน ตี อาโยว วี ฮาว, แตห อัน ดีบ ฆูณ อัน. อึณ ยี มึห เฆ อามู อามาด คูนดีคัม, เฆ ดา ตาง แคง มืง, เฆ อี มึห ปวน แคง มืง แอฆึบ, เฆ ดอน อี ฌึร ตี ฮาว รึม โดบ อาโยว ตึอน 8 บอ เฆ อึณโฮม อัน, เฆ อีกัด อัน, บอ ดอน อี อี กอย แคง อึณ โฮม ฆูณ อัน, เฆ ดอน อี บอ โดบ อัน. ฆีด มี เฆ ฆอน ดีแตด บอ มาบู บอ มาแป อี กอย ดี ปัน แคง มืง โฆวเซน ตึอน. 9 เฆ ดูอี มัง อี บอ ฮาว ป็อะ ราทา, มัง อี ป็อะ มังปร็อง. อึณ บอ มึห ดูอี กืน อี ฮาว รึม โดบ อัน.

10 เฆ แฮะ ตัห ฌัม ดี กางน็อห อี มูห โดง มัห อี โหงว. อึณ จืร อาทาด, เฆ ดอน อี วี จูห ดี ยาม ตาง, ยาม เหลณ. อาดา บู ซีแง, อาโยว ตึอน วี โบง บลอย ดูอี ยัม. 11 เฆ ดูอี อี กอย แคง มืง กานัณ ตึอน, เฆ ยี ยึร ดูอี กลึร ดี กางน็อห อาทาด ตึอน, เฆ บอ ต็อห, “อึย, เฆ ดูอี อาโมยว แอฆึบ โบง บลอย กลึร กาเซา. โคว, เฆ วี แตห โดง ตี จืร อาเบนมีราด.^a”

12 ปาย ตี เฆ ฆอน อาโกบ ตึอน, เฆ แฮะ โบง ปี หมาณ ฆูณ เฆ. 13 เฆ ตึย โดว โบ็ง อัน ฌัม มืง กานัณ, ดีบ อัน แคง กาเดา มาว อี กอย กาตัด โดง จืร มาดเปนลา อี กอย นา เลห ซีแง โดง จืร มัมเร. กาเดา มาว ตี กอย แคง โดง นา ปี จึห อาบราฮัม ตึอน ดี อาเอพาโรน ตึอน, อี มูห ดู อี อาโมยว เฮทีด. อัน แฮะ แตห อึณ แบน โดง ดีบ เฆ ดูอี ยัม. 14 อาโยว แฮะ ฮอต ดีบ ฆูณ อัน, อัน วี เวณ มืง แอฆึบ. บอ อัน บอ อูกัด อูวา อัน, เฆ ดอน อี อี แฮะ ฮาว โดบ อัน, เฆ วี เวณ.

15 ฆูณ เฆ แฮะ ฮอต ยัม, อีกัด อาโยว ตึอน ลาย กาลาง ต็อห, “เอ โยว อาโยว, โยว อัน ซี มึห น็อห รู ดี เอ, คราม ดี วี โบง นา ตู หมึอม ดี เอ โกบ แฮะ โบง เอ นา ตู หมึอม ดี อัน คา อาต.” 16 ปัน ตี เฆ วี แดะ ดา อู วี, แตห อัน กาลาง ดี อาโยว ต็อห, 17 “อาต ยัม ฆูณ แม, อัน แฮะ ต็อห ดี เย, ‘แตห เบ หมาณ ดี อาโยว, แตห อัน ฆ็อห แวน หมาบ ปี โบง เบ ดี อัน.’ ดอ ตี นี, เย วี ตัห หมาณ, แตห แม บลัวะ แวน หมาบ เย. บอ เย มูห หมาย เฌาพรา ปี กรึบ ฆูณ แม.” อาโยว ตึอน ยี ยึร ปี หมาณ เฆ ตี, อัน วี ยาม.

18 แฮะ ฮอต ปัน ตี เฆ อีกัด อัน บอ ตัห ฌัม โดง กอย อัน. เฆ ตัห โฆม ดี อาต อัน ต็อห, “เย แฮะ ตัห โดง กอย แม, แตห เย แบน หมาย แม.”

19 อาโยว ตึอน วี ต็อห, “แกวะ แตห เบ วี โยว. โอว ตู มูห เฌาพรา. 20 เบ แฮะ ดึอม โบง นา ตู หมึอม ดี โอว. เฌาพรา ยี แฮะ แตห อึณ แบน นา หมึอม. อัน เฌา แฮะ ซี คยอด อาซาก เฆ ดูอี กืน. โกบ แปะ แฮะ โบง เบ, เฆ ดูอี กืน ตี, เฆ ซี กอย กอ ฌัม อาตึร. อาว มึห อาเซ อี แฮะ ยัม. 21 เบ มืร อาว โลว โยว มาเซ. โอว ดี วี เฮียง บอ เบ บอ ฆอน เบ.” ปาย ตี อาโยว วี กาลาง โฆรห หมึอม ดี เฆ, แตห อึณ ดึร น็อห เฆ.

22 อาโยว บอ กอย ฮาว แคง มืง แอฆึบ ตึอน, บอ อัน บอ อึณโฮม ฆูณ อัน. อาซาก อัน บอ โนะ อู มาย็อห ดี ฆึร ซีนัม. ปัน ตี อัน บอ ยัม. 23 อาซาก อัน แฮะ โต็ง, แตห อัน กอ ยึร หลูกหลาน อัน. ดอ กอย อัน, อัน บอ โจะ เงียม แหลน อัน, อี มูห ฆอน อามาคีรา. อามาคีรา มูห ฆอน อามานาเซ.

24 อัน วี ต็อห ดี อูกัด อูวา อัน, “อึย, โอว หงา ดี ยัม ดอ ตี นี. เฌาพรา ยี ดี เฮียง เบ, อัน ดี บอ ตึย เบ, แตห เบ วี เลห ตัะ มืง ตี, ฮาว ฌัม แคง มืง ปี ดัว อัน ดี อาบราฮัม บอ อาแซก บอ อาโกบ ตึอน. อัน เฌา แฮะ ฮอต ดัว กาดีก ซัดฌา ลอง อัน ตี. อัน ดี บอ โบง ปี ต็อห อัน.” 25 อัน แฮะ ฮอต กาลาง ปาย ตี อัน วี หมาณ แตห เฆ อูกัด อูวา อัน วี ดัว กาดีก ซัดฌา ดี อัน. อัน ต็อห, “แตห เบ ดัว กาดีก ซัดฌา ดี โอว. เซ เฌาพรา ดี วี ตึย เบ ฮาว ฌัม แคง มืง เบ, แตห เบ ดึห ฮาว บอ โดว ยัม โอว, แตห โอว วี กอย แคง มืง เบ ตี.”

26 ปัน ตี อาโยว บอ ยัม แคง มืง แอฆึบ. ดอ อัน ตี อาซาก อัน แฮะ โนะ อู มาย็อห ดี ฆึร ซีนัม. วาย แฮะ ยัม อัน, เฆ วี พ็อห ซีนัม ดี โดว อัน, แกวะ แตห อัน อัม. แฮะ ฮอต เฆ เบลห โดว อัน แคง กอม.