1 แคง มืง กานัณ ตึอน อาคราว เอต โบม บอ เหลณ กาเซา. 2 ปัน ตี เฆ แฮะ ฮอต โตต ปี ดี โฮม ปี ดึห ตัห เฆ แคง มืง แอฆึบ ตึอน, ฆูณ เฆ วี ต็อห ดี ฆอน อีมาย อัน, “แตห เบ วี ฮาว มืง แอฆึบ, แตห เบ จึห ปี ดี โฮม อาดา เอ.”

3 อายูดา ตึอน วี ต็อห ดี อัน, “ดา กาณา ตึอน แฮะ ต็อห ดี เย แบน เฌณ แบน เฌณ, เย ตู ปึอน วี ตัห ฌัม ดี อาต อัน, เซ วา เย ตู ตัห รึม โดบ เย. 4 เซ แม ดี แตห วา เย ฮาว รึม โดบ เย, เย ดี วี โลง ปอ อู เฌณ, จึห ปี ดี โฮม. 5 เซ แม ยี ตู ควาง อัน โดบ เย, เย ตู ปึอน ฮาว. ดูอี ตึอน แฮะ ต็อห, ‘เบ ตู ปึอน วี ตัห, เซ วา เบ ตู โดบ เบ.’”

6 อาโกบ ตึอน วี ต็อห, “เหมา อึณ ปาย ปี โบง เบ แตห อึณ หณาบ แคะ ตี ดี โอว, เหมา อึณ ปาย ปี โลว กาลาง เบ ลอง วา เบ?”

7 เฆ วี เวียะ โฆรห ตี ต็อห, “ดูอี ตึอน แฮะ ดีหมอด เย ลอง อึณโฮม เอ. อัน ต็อห, ‘ฆูณ เบ, อัน ซี กอย โดง กอย เบ? เบ ซี มึห วา ปอ อู วี?’ ปัน ตี เย วี เวียะ ปี ดีหมอด อัน. เย มืร ตู นับ, อัน ดี จัร เย แดะ วา เย ตัห ฌัม โดง กอย อัน.”

8 อายูดา ตึอน วี หมาณ ดี ฆูณ อัน ต็อห, “แตห แม แตห โอว ยอด แมน ฆอน แม. เซ แม ซี แตห เอ ดอน อี อีม, บอ เย บอ แม บอ ฆอน เย, เซ แม ตู ซี แตห เอ ยัม โตต ดอน อี, แตห แม ควาง เย ฮาว อู เฌณ. 9 โอว ดี กาแซณ ดี แม. ปัน ดี วี ตัห ฌัม เย ดี นี, เซ โอว ตู วี ตัห ตึย อาเบนยาม ดี แม, แม โลว ดัม หมาบ ดี โอว, แกวะ แตห แม ปีว หมาบ โอว เซเซ. 10 ดอ ตี นี เย แฮะ ฮอต หน็อะ เหลณ. เซ เย ตู หน็อะ เหลณ, เย แฮะ ดัน วี ตัห อา เฌณ.”

11 ฆูณ เฆ วี ต็อห, “เซ อึณ โลว, แตห เบ โบง ปาย นี. แตห เบ บอ ดึห โกรว อี เลห แคง มืง เอ นี, ดัว แตห อึณ แบน คอซอง ดี ดา กาณา ตึอน. แตห เบ ดึห ซีนัม พ็อห, งาม มาเพียน, ซีนัม โฮม, ซีนัม อูห หงูน, บอ เบล ฆลอะ บอ เบล ซาแดด. 12 แฮะ ฮอต แตห เบ ดึห รึอน อา บูน บอ รึอน ปี ดึห เบ คา อาต ปี กาดูห เบ แคง จาน เบ, แตห เบ ดึห โตต, โยว เฆ กาลึบ ดี ดัว หมาน คา อาต นู. 13 แฮะ ฮอต แตห เบ ดึห บอ วา เบ, แตห เบ วี ฮาว ฌัม โดง กอย ดา อี ตึอน แคง มืง แอฆึบ. 14 แตห เฌาพรา ยี กาเว เบ ดอ กอย เบ ดี อาต ดา กาณา ตึอน, แตห อัน วี ควาง บอ อูกัด อูวา เบ บอ อาเบนยาม วี ตัห แคง กาง เอ. เซ โอว บอ โลว คัม ดูก โกบ แฮะ หราย ฆอน ปอ วี, แตห อึณ แบน ปาย ตี.”

15 ปัน ตี เฆ อูกัด อูวา ตึอน, เฆ วี ดึห คอซอง บอ รึอน อา บูน. เฆ บอ แดะ อาเบนยาม โดบ เฆ. แฮะ ฮอต เฆ ฮาว ฌัม แคง มืง แอฆึบ, ฮาว ฌัม ดี อาต อาโยว ตึอน. 16 อาโยว ตึอน ยี ยึร, บอ เฆ บอ อาเบนยาม แฮะ วี ตัห, อัน วี กาลาง ดี หมาย อัน, “แตห แม แดะ ดูอี เฆ ตี ฮาว ลึบ แคง กาง โอว. แตห แม ง็อห มาบู, ดัง ฮาบ. แตห เย โฮม รึม โบม ซีแง.”

17 หมาย ตึอน โบง ปี จัร อาโยว อัน โบง. อัน มืร ตึย เฆ ฮาว แคง กาง อาโยว. 18 ดอ ฮาว เฆ แคง กาง อาโยว, น็อห เฆ กอ วี โยว. เฆ ต็อห, “โยว อึณ ดี มูห โกบ รึอน ตึอน, ปี เบลห เฆ แคง จาน เอ. โคว อัน ตี, ดา กาณา ตี แตห เอ ตัห แคง กาง อัน. อัน ดี เหมต เอ, แตห เอ แบน หมาย อัน, บอ เอ บอ โดว ซัดดาวา เอ.”

19 เฆ บอ ฮาว โฮะ แคง กาง อาโยว ตึอน. เฆ บอ ฌัม ดี อาต มาโลห, เฆ วี จูห ดี กาลาง โฆรห ดี หมาย ตึอน. 20 เฆ ต็อห, “แตห แม โทม โฆรห เย. เย แฮะ ฮอต ตัห ฌัม ดี นี อู เฌณ. 21 ดอ เวณ เย, เย บอ คยัะ แคง หมึร, วึห จาน เย. อึณ บอ มึห รึอน ดอน อี นา แดง โหงว แคง จาน. เย แฮะ วี ดึห ตัห โตต. 22 เย บอ มึห รึอน ปอ อึณ ปัว, แตห เย จึห ปี ดี โฮม. เย ตู นับ อาเซ แฮะ ฮับ รึอน แคง จาน เย คา อาต.”

23 เฆ แฮะ ฮอต ต็อห ปาย ตี หมาย ตึอน วี ต็อห, “แฮะ มูห, แฮะ หมาน โตต. แกวะ โยว. อึณ บอ มูห เฌาพรา ปี กรึบ ฆูณ เบ. อัน แฮะ เบลห รึอน แคง จาน เบ. โอว แฮะ ปึอน รึอน เบ ตึอน.” อัน แฮะ ฮอต กาลาง ปาย ตี อัน วี แตห อาซีเมโอน ตึอน วี เลห แคง กาปึม, กอย รึม โดบ เฆ.

24 ปัน ตี หมาย ตึอน แตห เฆ ลึบ แคง กาง อาโยว. อัน บอ ดัว อึม, แตห เฆ วี บาย เปลา เฆ. อัน บอ ดัว ปี ดี โฮม ดี มาลา เฆ. 25 เฆ วี เบลห อูน คอซอง เฆ, หน็อะ อาโยว ตัห. เฆ แฮะ ยึร, อัน ซี แตห เฆ โฮม โบม แคง กาง อัน.

26 ดอ ตัห อาโยว ตึอน ฌัม แคง กาง อัน, เฆ วี ดัว คอซอง ปี แรน อูน เฆ. เฆ บอ วี ครึบเครา ดี อาต อัน. 27 อาโยว ดีหมอด เฆ ต็อห, “เบ ฆยามซา ดอน อี?” แฮะ ฮอต, อัน วี ดีหมอด ต็อห, “เหมา ฆูณ เบ ปี ดึอม แค เบ ดี โอว, บอ อัน แฮะ กอย ดาคึย? แฮะ คัะ ฆยามซา?”

28 เฆ วี ต็อห, “ฆูณ เย, อี มูห หมาย แม, อัน แฮะ ดาคึย, แฮะ คัะ ฆยามซา.” เฆ วี โฆม ดี อาต อัน.

29 ปัน ตี อัน วี ยอด วา อัน, อี จืร อาเบนยาม ตึอน, อี มูห ฆอน มา อัน. อัน วี ต็อห, “วี ตี มูห วา เบ, ปี กาลาง เบ ดี โอว?” อัน บอ ต็อห, “แตห เฌาพรา เฆฌู แม, วา โอว.” 30 อัน แฮะ ฮอต กาลาง ปาย ตี น็อห อัน บอ แบน ซี ยาม. อัน วี เลห แคง โฮว อู เฌณ, วี ลึบ ปอ อู โฮง บอ ปรา ดี ยาม.

31 ปัน ตี อัน วี ดีหล็อห นา อัน, วี ลึบ แคง โฮว. อัน แฮะ วี ปีโปลม น็อห อัน, จัร เฆ แดเจณ อัน เบลห ปี ดี โฮม.

32 เฆ วี เบลห ปี ดี โฮม อาโยว อู โปละ, แตห อัน โฮม อัน อู วี. บอ เฆ อีกัด อาโยว, เฆ เบลห ปี ดี โฮม ปอ โปละ. เฆ หมาย อี กอย แคง กาง อัน, เฆ วี โฮม ปอ อู โปละ. โคว, เฆ ดูอี อาโมยว แอฆึบ อาว ปึอน โฮม รึม โดบ เฆ ดูอี อาโมยว เฮา. เฆ ดูอี แอฆึบ, เฆ ตู คัม ดี โฮม รึม โดบ อี เฮา. 33 เฆ ยี กอย ลาย ดาม โดบ อาซาก เฆ. อีกัด เฆ กอย นา อาต, บอ วา เตียะ เฆ, อัน กอย ดี ปัน. เฆ บอ ยึร อาตี, เฆ วี ลาย ยอด, วี อาม. 34 เฆ บอ ดึห ปี ดี โฮม โดง กอย อาโยว, เบลห ดี อาต อีกัด อัน. ปี ดัว เฆ ดี อาเบนยาม ตึอน, อึณ กืน หลึอม พัน บูน แคะ ปี เบลห เฆ ดี อีกัด อัน. ปาย ตี เฆ บอ กอย รึม, โฮม โบม, เดียง อึม มางูน.