1 เฌาพรา วี ฮาว โดง กอย นาง ซารา, โบง ปี ดึอม กาลาง อัน. 2 ปัน ตี นาง ซารา แด บาดีก ซันเท. ดอ ฌัม อาคราว ปี ดึอม กาลาง อัน เฌา, นาง ซารา วี ฆึอด ฆอน อีมาย ดอ แฮะ กัด กาเซา อีมาย อัน. อึณ บอ แบน โตต ปี กาลาง อัน เฌา คา อาต นู. 3 ฆอน นาง ซารา ตี, อาบราฮัม แตห อัน จืร อาแซก.^a 4 อึณ บอ ฌัม ซีแง อึณดา, อาบราฮัม วี ดึห ฆอน อัน, ซัวะ แวน ฮูน ลัะคานา อัน, แตห อึณ ปี แปะ แฮะ จัร เฌาพรา อัน โบง. 5 ดอ ปึอน อัน ฆอน อีมาย ตี, อาซาก อาบราฮัม ตึอน แฮะ โนะ อู มาย็อห ซีนัม.

6 นาง ซารา วี ต็อห, “เฌาพรา แฮะ แตห โอว กาณัห ดอ ตี นี. อาเซ ยึร ลอง อัน ตี, อัน บอ ดาคึย ปี โอว.” 7 อัน วี กาลาง ปอ อู โมยว. อัน ต็อห, “เซ อึณ มึห ดูอี อี ต็อห ดี อาบราฮัม ลอง นาง ซารา ดี เฮียง ฆอน, อึณ ตู หมึอม หณึม. โอว ยี แฮะ ปึอน ฆอน อาบราฮัม ดอ แฮะ กัด อัน.”

8 ฆอน นาง ซารา ยี แกร ดี ตาง, อัน บอ แวน ปู. ซีแง อัน ตี เฆ โบง บลอย ตาง, เฮียง อี โฮม. 9 อู ซีแง นาง ซารา ตึอน ยี ยึร อาซามาน. อัน มูห ฆอน อาบราฮัม ฆาย นาง ฮาฆา, อี มูห อาโมยว ดูอี แอฆึบ. อัน บอ โทม โฆรห ปี แนนัะ อาซามาน ดี อาแซก อัน. 10 ปัน ตี อัน ต็อห ดี อาบราฮัม, “แตห แม ซูต หมาย ตี บอ ฆอน อัน, แตห ฆาย เลห ฮาว ตัะ กาง เอ. ฆอน อัน อาว ปึอน ปลูะ ฆูณ อัน ปี ฆอน โอว.”

11 อาบราฮัม ตู อึง โฆรห ตี. อัน กาเว อาซามาน, อี มูห ฆอน อัน. 12 เฌาพรา ยี กาลาง โฆรห ดี อาบราฮัม ตึอน ต็อห, “แกวะ แตห น็อห แม กลึร ลอง ฆอน แม ฆาย หมาย แม. แตห แม โทม โตต ปี กาลาง นาง ซารา ดี แม. บอ เฆ ฆอน อาแซก ตึอน, เฆ ดี แบน หลูกหลาน แม. 13 บอ ฆอน แม, อี มูห ฆอน หมาย แม, โอว ดี แตห อัน แบน ฆูณ ดัง เฆ ดูอี อาโมยว ตาง.”

14 อัน เฌา แฮะ ฮอต กาลาง ปาย ตี ซีณวัห อาบราฮัม เจว ยีต. อัน บอ ดึห ปี ดี โฮม, ดึห บอ อึม, ฮับ แคง กาเปา ตาง. แฮะ ฮอต, อัน บอ ดึห โกรวกราม ตี บอ ฆอน อัน, เบลห ดี ยัะ นาง ฮาฆา. แฮะ ฮอต, อัน ซูต ฆาย เลห แคง โดง กอย อัน. นาง ฮาฆา ยี วีน ดี แล แคง แปร กาฮ็อห อี จืร บีราเซบา.

15 อาว เหลณ อึม อี กอย แคง กาเปา อัน บอ โตต. อัน วี เบลห ฆอน อัน นา ครึม การาม. 16 อัน วี ฮาว ปอ อี แจก, ตูต กาเครียะ โดง กอย ฆอน อัน. อัน ทาง, “โอว อาว คัม ดี ยอด ฆอน โอว ปัน ดี ยัม อัน.” ดอ กอย เครียะ อัน, อัน วี จูห ดี ยาม.

17 เฌาพรา ยี โทม โฆรห ปี แดะ ฆอน ตี. อามู อามาด เฌาพรา อู กาดัง อี กอย ฆางหราว วี แดะ นาง ฮาฆา ตึอน, ต็อห ดี อัน, “อึย แม นาง ฮาฆา, แม โลว มาเซ? แกวะ โยว. เฌาพรา แฮะ ฮอต โทม โฆรห ปี กาลาง ฆอน แม โดง กอย อัน. 18 แตห แม ยีต, ดึห ฆอน แม, จอย อัน ฮาว. โอว ดี โบง แตห อัน แบน ฆูณ ดัง อาโมยว ดูอี ตาง.”

19 ปัน ตี อัน เฌา โบง แตห งาย อัน บลาง. อัน บอ ยึร อึม คึม. อัน บอ ฮาว ต็อะ อึม, ฮับ แคง กาเปา อัน, วี ดัว บอ ฆอน อัน เดียง แพ.

20 เฌาพรา ยี กอย รึม โดบ ฆอน ตึอน. อัน แกร ดี ตาง, กอย แคง แปร กาฮ็อห, แบน ดูอี บัณ อัะ. 21 อัน กอย แคง แปร กาฮ็อห อี จืร พาราน. มา อัน บอ เหรต ดัว อีบึณ ดี อัน อี ตัห มืง แอฆึบ.

22 ดอ อัน ตี อึณ มึห คูนดีคัม อาบีเมน ฆาย โบว อี อึบ ดา ซึก อัน อี จืร อาพีซอน. ฆาย ตัห กาลาง โฆรห ดี อาบราฮัม. ฆาย ต็อห, “แม บอ โบง มาเซ, เฌาพรา กอย รึม โดบ แม บอ จอย แม. 23 โคว, แตห แม ดัว กาดีก ซัดฌา ดี โอว, แตห บอ เฌาพรา โทม. ซีณ ดอ ตี นี ฮาว นา อาต, แตห แม โบง นา หมึอม ดี โอว บอ ดี หลูกหลาน โอว. โอว แฮะ แบน ฆึก แม. ปาย ตี แตห แม วี แบน ฆึก โอว, แบน บอ ฆึก เฆ ดูอี แคง มืง โดง กอย แม แบน แคต.”

24 อาบราฮัม วี ต็อห, “โอว ดี ดัว กาดีก ซัดฌา ดี แม.”

25 อาบราฮัม ยี กาลาง ดี คูนดีคัม อาบีเมน ลอง หมาย อัน. เฆ แฮะ แคร อึม คึม อู โปละ, ตู แตห อี เฮา ต็อะ อึม. 26 คูนดีคัม อาบีเมน ตึอน ยี ต็อห, “โอว ตู นับ อาเซ แฮะ โบง ปาย ตี. แม มืร ตู ต็อห มาเซ ดี โอว, บอ อี เฮา ตู ดึอม กาลาง มาเซ ลอง อัน ตี.”

27 ปัน ตี อาบราฮัม วี ดึห มาบู เฆ มามัก, ดัว ดี คูนดีคัม อาบีเมน, แตห อี นับ, ฆาย แฮะ ลาย โพรม. 28 ปัน ตี อัน วี เบลห อูน ฆอน มาบู บู โดว. 29 คูนดีคัม อาบีเมน วี ดีหมอด ต็อห, “มาเซ อึณ มูห ลอง ดาง อัน ตี? เหมา อึณ ปาย แปะ แฮะ ดึห แม ฆอน มาบู บู โดว ตี?”

30 อัน วี ต็อห, “ฆอน มาบู บู โดว ตี, แม โลว ดึห. โอว ดัว เฆ ดี แม, แตห อึณ แบน ลักซานา อัน, แตห ดอน อี นับ, กาเดา อึม คึม ตี, อึณ มูห กาเดา อึม คึม โอว.”

31 โกบ แฮะ ลาย ดัว เฆ กาดีก ซัดฌา ดี ตี, เฆ แฮะ แตห อึม คึม ตี จืร บีราเซบา.^b โคว, โดง ตี เฆ แฮะ ลาย ดัว กาดีก ซัดฌา.

32 ปาย ตี บอ อาบราฮัม บอ คูนดีคัม ลาย โพรม ดี แตห โดง ตี จืร บีราเซบา. แฮะ ฮอต, คูนดีคัม อาบีเมน ฆาย โบว อี อึบ ดา ซึก อัน, ฆาย วี เวณ แคง มืง พีลีที. 33 อาบราฮัม มืร ซัม เฮ เทเรบ อู กาดัง ดี โดง จืร บีราเซบา ตี. โดง ตี อัน บอ กรึบ เฌาพรา อี อีม เซเซ. 34 วาย อัน ตี อาบราฮัม วี กอย เหลณ แคง มืง พีลีที ตึอน, แบน แคต แคง มืง ตี.