Aã kareta Janejare'e 'Ãg omotekokuwa Juwão tokusiwa imono Jesu koty rewarà kõ pè maekwerà. Patimu eu ypõ'õgwerà mõ pè. A'e pè temimopã'ãgwerà rõmõ Juwão tui remẽ, okusiwa kareta upa. Kee rewarà mõ. A'evo remẽ Romã pewarà jõvijã wasu ijayvukasiay jane kõ pè. “Ije tè kuwasi emoe'e pejarà rõmõ pekupa”, e'i epe wayvukasiay rõmõ. “Nemoe'ei mãe kõ amomorijauokatà”, e'i. Ajamã'ẽ aepo e'i epe remẽ, Jesu koty rewarà kõ “erõvijã ywete” ne'i'ãi ijupe kupa. Jesu pè kõrijõ tè aepo e'i kupa. Ajawyi jõvijã wasu omopã'ãoka kõ. Ajamã'ẽ ãmõgwerà okyje iwyi. Ajawyi e'i oupe kupa: “Kee aikotà jõvijã wasu tejuka e'ã. Ejurukwerà pègà tè amoe'e rã'ãgatà. Ajamã'ẽ epy'a pè Jesu tè amoe'età”, e'i kupa.

Iteetejẽ Juwão okusiwa, Jesu omojisaoka ijupe maekwerà. Wayvu 7 rõmõ okoty rewarà atyry kõ pewarà omojikuwaoka ijupe tokusiwa (J.Jim. 2.1–3.22). Ãmõ, kãramõwarà rã omojikuwaoka amãtejẽ teve, okoty rewarà kõ ojimomorijauvaytà remẽwarà rã omoikatu tokusiwa. Ãmõ, Janejare'e Jõvijã wasu rõmõ ojikuwatà pirujẽ jane kõ pè remẽwarà rã teve. Ãmõ, manyvo oõvajãrà kõ omomatà remẽwarà rã. Ãjãgai rõvijã tẽ tesõ omomatà, emĩgwai kõ revejẽ remẽwarà rã omojikuwaoka Juwão pè tokusiwa. “Pirujẽ amojisaoka neupe mã'ẽ ekusiwa imono eayvu renuarà kõ pè imokasia kõ rõmõ”, e'i Jesu Juwão pè. A'e a'e kõ okusiwa imono Jesu koty rewarà kõ pè ãmẽ Juwão (J.Jim. 1.2).