2 Ejimorypa eremiau, Janejare'e pè aporegeta neupewarà mõ remẽ, kee a'e ipi: “Ivo katu ikõ toiko nẽ. Owaray wete ikõ toiko nẽ”, a'e neupewarà mõ. Akuwa nepiryvypy katu neiko ipi.

3 Janejimorypa kõ Jesu koty rewarà kõ mõ uu eresa remẽ, nerewarà omome'u ije kupa. “Aje ywete Jesu rekoa aje ywete mã'ẽ rupi katu ekoi ipi”, e'i neupewarà mõ kupa. Aje a'evo neiko ipi. Ajawyi eroryvay nere aepo renu. 4 Eãkarãgwerà kõ pewarà mõ, “Jesu rekoa aje ywete mã'ẽ rupi katu ekoi kupa”, e'i mã'ẽ ojenu eupe remẽ ywesõ eroryvay ipi.

5 Ejimorypa katu, nepota katu Jesu koty rewarà kõ pãtavõ ipi, ãwisõ neremisa e'ã kõ teipe kupa mijã remẽ. Okwa nerena rupi Jesu ayvu mojenu kupa remẽ, nepãtavõ kõ jẽ ipi. 6 A'e kõ ojivy ike rupi okwa kupa remẽ, nerewarà omome'u oreupe kupa ipi. Kee jaa nerewarà ojenu oreupe: “Orerauvay Kaiju. Oja'a katu orere”, e'i oreupe kupa. Orojimoaty ike Jesu koty rewarà kõ rõmõ remẽ aepo e'i imomewa oreupe kupa ipi. Ajawyi nerewarà akuwa. Ajare kee a'e nemokasia rõmõ. Ãwitõ neja'a katu ee kõ okwa kupa remẽ ipi, ãwĩvo jẽ ereko kõ Janejare'e morya rõmõ, a'e ene. 7 Wena pe wyi ojisyry Jesu rekoa mojenu kupa remẽ, ava nomoma'enõi imono kõ ipi. Nopotai ojipãtavõoka Jesu rè nojirovijai mãe kõ pè kupa. Ajawyi aepo a'e ene. 8 Ajamã'ẽ jane sipãtavõ kõtà, Jesu koty rewarà kõ tè jane rewarà mõ. [Ma'e. Simomyta kõtà janepyri okwa kupa remẽ ipi. Ojisyrytà kupa remẽ, ja'umã'ẽ mõ sime'ẽ ijupe kõ toeraa iwa kupa ipi.] A'evo remẽ jane ve maevo sõ tite sipãtavõ kõtà, Janejare'e ayvu aje ywete mã'ẽ mojenua rè oo kupa remẽ. I'ete a'evo jaiko remẽ.

9 Na'evoi Tioterepi ajamã'ẽ. Jypy remẽ itõkõ kareta akusiwa penena pè Jesu koty rewarà kõ pè remẽ, Tioterepi noenu tari oreayvu ãmẽ. “Ije ywesõ eayvukasi”, e'i tite kõ oupewarà mõ. Ajawyi noenu tari. 10 Ajawyi aa penena kyty remẽ, eayvukasità ijupe. Kee ekoi. Poromovyvyrai tè iko. Iwari wari teywete orekoty. A'evo kõrijõ tè rõwã ekoi ajamã'ẽ. Kee ekoi teve. Jesu rekoa mojenuarà kõ okwa remẽ, nomomyta kõi opyri ipi. Nomomytaokari teve tesõ ãmõ kõ pè. Ava mõ omomyta Jesu koty rewarà kõ remẽ, Tioterepi omoisyry jẽ tesõ pepytery pe wyi ipi. A'e a'evoa rè eayvukasità ijupe.

11 Ajawyi kee a'e ene, ejimorypa, eremiau. Ivo katuay mã'ẽ jẽ sikõ terekuwa reiko nẽ, a'e ene. Nivoi mã'ẽ tereã'ã e'ã ikenẽ, a'e ene. Ivo katu ekoi mãe kõ tè Janejare'e ãkarã rõmõ ekoi ipi. Nivoi mãe kõ nojimoryi Janejare'e rè ipi.

12 [Age'e Jesu koty rewarà mõ okwatà penena rupi, Temetiriu eu ijupe mã'ẽ.] Pirujẽ Jesu koty rewarà kõ remimoe'e tè Temetiriu, aje mã'ẽ rupi tè ekoi ipi rewarà mõ. Eremimoe'e teve. Nekuwa aje ywete aporegeta ipi. Ajawyi nekuwa eayvu rupi ivo katu mã'ẽ tè Temetiriu. [Tereja'a okwa remẽ ãmẽ ee.]

13 Uve teipe eayvu rã amome'utà neupe mã'ẽ mijã. Ajamã'ẽ napotai age'eve kareta jikusiwarerà rupi amome'u neupe mã'ẽ. 14 Apota aa neresa kuise'ẽ jẽ. Ajawyi jajesa remẽ tè eayvu e'e pè tè aporegetatà neupe, ije ywete.

15 Janejare'e ikõ tanepy'amopiryvypy katu nẽ. Ãmõ, janejimorypa kõ ikewarà kõ opota nere ojimory eremikusiwarerà rupi. Ije ve apota ajimory mokopewarà janejimorypa kõ reve eremikusiwarerà rupi. Aepo ere ijupe kõ, ijãvijõ kõ jẽ.

[Awyjepa aepo a'e kõrijõ tè.]