– Ãmõgwerà janepytery pewarà omã'ẽtà ere Jõvijã wasu kasia revejẽ ajikuwa Janejare'e Remimuurerà rõmõ aiko remẽ. Omãnõ e'ãve a'evoa rè omã'ẽtà kupa. Aepo a'e aporegeta aje ywete, e'i Jesu wemimo'ekwerà kõ pè.

Awyjepa rã'ĩ imogeta kõ ãmẽ.

2 Ãmẽ 6 'arà paire, Jesu yvytyry yvate'e mã'ẽ rè ojiupi oo. Peturu weraa oupi. Ãmõ, Tiaku. Ãmõ, Juwão. Yvytyrapyte 'aryvo ekoi kupa, a'e kõ rõmõ'ĩte. [Emimo'earà kõ mõ ãmẽ opyta yvytyry ypy pè ãrõ kõ.]

Ãmẽ Peturu kõ Jesu rè omã'ẽ upa remẽ, py'awarà mõ Jesu ojimotee ovake kõ. 3 Ijyru serenyny katuay upa. Isuky katu tesõ upa.

4 Ãmẽ karamoe remẽwarà kõ ojisa ipyri. Tãmõ Eriasi. Ãmõ, tãmõ Moisesi. A'e yveve ojimoikatu ijupe kõ.^a Jesu reve oporegeta kupa upa. A'evoa rè omã'ẽ moapy rõmõ oo upi mãe kõ.

5 Ameve Peturu e'i Jesu pè:

– Ikatuay ike jaiko, jõvijã! Nepota remẽ, oroinõtà moapy rõmõ tapyina kõ aã ike. Ãmõ, ene neupewarà. Ãmõ, tãmõ Moisesi pewarà. Ãmõ, tãmõ Eriasi pewarà oroinõtà, e'i tite.

6 Ojimonyi tesõ kupa. Ajawyi Peturu manyvo ne'i. [Ajawyi tapyina reinõa rè kõrijõ oporegeta.]

7 Ajaire yva rãtasĩ owyjy ijatypa kõ. A'e pupe wyi kee jaa ojenu ijupe kõ:

– Era'yray ãwĩ! Eremiauvay tè ãwĩ! Tapejapyaka katu ikõ ijayvu rè nẽ! ejaa ojenu.^b

8 Ãmẽ omã'ẽ mijẽ erokwa kupa remẽ, Jesu rõmõ'ĩte ekoi ky'y. Nomã'ẽi ãmõ kõ rè kupa ky'y.

9 Ãmẽ ajaire yvytyry re wyi owyjy uu kupa ky'y. Owyjy iko kupa remẽ, e'i Jesu ijupe kõ:

– Age'e pemã'ẽ ee mã'ẽ tapemome'u e'ã rã'ĩ. Amãnõtà. Amãnõ maire apoera tarà mijẽ. Ãmẽ tè katu pemome'utà ky'y, e'i ijupe kõ.

10 Nomome'ui ãmẽ kupa. Ajamã'ẽ ovote ojimogeta ywete aepo jaa rè kupa ipi.

– Manyvo jaa pè paepo e'i? e'i ojimogeta kupa.

11 Ajaire e'i Jesu pè kupa:

– Manyvore põ tãmõ Moisesi remikusiwarerà rè poromo'e mãe kõ, kee e'i: “Tãmõ Eriasi rã'ĩ totuu Janejare'e Remimuurerà renone”, e'i kupa? Manyvore põ aepo e'i kupa? e'i kupa.^c

12 E'i Jesu ijupe kõ:

– Aje oporegeta kupa. Aje tãmõ Eriasi totuu enone rupi poroerojivy Janejare'e kyty. Ajamã'ẽ kee jaa ojikusiwapa teve maekwerà rè tapeja'a: “Janejare'e Remimuurerà ojimojane mã'ẽ omomorijau ywetetà kupa. Werõarõtà kupa”, ejaa. 13 Kee a'e pejẽ ajamã'ẽ tapekuwa. Ovãema ipe tãmõ Eriasi vo 'ejẽ mã'ẽ. Ajamã'ẽ omoãtãre'ã ai tè ereko kupa. Janejare'e ayvu ojikusiwa amãtejẽ maekwerà rupi katu tè a'evo wereko kupa, e'i Jesu ijupe kõ.

[Aepo e'i Jesu remẽ, emimo'ekwerà kõ okuwa Juwão poromojãmorĩ mã'ẽ pewarà mõ aepo e'i.]

14 Ãmẽ Jesu kõ ovãe mijẽ yvytyry ypy pè, wemimo'earà kõ pyri, kõi opyta ãrõ mãe kõ pyri. Ãmẽ ovãe ipyri kõ remẽ, aty wasu rè omã'ẽ, wãrõ mãe kõ pyri. Ãmõ, tãmõ Moisesi remikusiwarerà rè poromo'e mãe kõ mõ ve ipyri kõ tui. Ojiayvuvaja vaja kupa upa. 15 Ãmẽ aty wasu omã'ẽ Jesu rè remẽ:

– Jesu si ovãema! Ja'e ikoty ãmẽ! e'i kupa.

Oo kuise'ẽ õvaisĩ ãmẽ kupa.

16 Ãmẽ Jesu e'i ijupe kõ:

– Moma'e rè põ pejiayvuvaja vaja eremimo'earà kõ reve pekupa? e'i ijupe kõ.

17 Ãmẽ ipytery pe wyi kwaima'e mõ kee e'i ijupe:

– Poromo'earà, era'yry eporijauesa, aã aeru nekoty mã'ẽ! Ãjãgai omomorijau ywete ipi. Nomomoregetaokari ipi. 18 Ojimokasi ee remẽ upi upi omomo imoyvyapi teve ipi! Enyaju ajaire ojãimisu'u su'u ipi! Ajaate nipikasi 'eteay ky'y. Ajawyi a'e ipe neremimo'earà kõ pè, “Pemoẽ ãjãgai eãkarã pupe wyi imoisyry”, a'e ipe. Ajamã'ẽ nokuwai imoisyrya kupa! e'i Jesu pè.

19 Ãmẽ Jesu ijãgyo aepo renu.

– “Aje” napejẽi eayvukasia pè mãe kõ! e'i ijupe kõ. Age'e rõwã tesõ aiko pepyterà rupi ky'y. Manyvo remẽ ywete sipõ pekuwatà ky'y eayvukasia? e'i. Ãwĩvotà tè põ peiko? e'i ijupe kõ.

Ajaire e'i tuu pè:

– Eeru awi nera'yry ekoty, e'i.

20 Weru ãmẽ tuu ikoty. Ãmẽ ãjãg omã'ẽ Jesu rè remeve, omomo ja'yry imoyvyapi tomãnõ mãnõ. Otore tore iko ãmẽ. Enyaju teve iko. 21 Ãmẽ Jesu e'i tuu pè:

– Mapejõ kwaray rõmõ tesõ põkõ ãwĩvo nera'yry? e'i ijupe.

– Ija'yrĩ remeve ãwĩvo ekoi, e'i tuu. 22 Ãmõ 'ary pè tata pupe ãjãg omomo momo ijuka ipi. Ãmõ remẽ yy pupe omomo teve ipi. A'evo 'evo ekoi ipi. Oreporijauesa rejupa ãmẽ, nekuwa remẽ! e'i Jesu pè.

23 Ãmẽ Jesu e'i ijupe:

– Manyvore põ, “Nekuwa remẽ”, ere sõ ije! e'i. “Aje” ere jẽsi Janejare'e kasia pè. Janerako'i ee remẽ, nuvei iwasu mã'ẽ ijupe! e'i Jesu ijupe.

24 Ameve tuu e'i Jesu pè:

– “Aje” a'e. Ajamã'ẽ epãtavõ rejupa, age'e ywesõ “aje ywete” ta'e ãmẽ! e'i.

25 Ãmẽ jane ijatyry mãe kõ ojimoaty omãjã ee upa. Ãmẽ Jesu omã'ẽ ee kõ remẽ, ijayvukasi ãjãgaiwerà pè, ja'yry omomorijau mã'ẽ pè.

– Ãjãg, noporomoapyaokari mã'ẽ! Noporomomoregetaokari mã'ẽ! Aã ja'yry wyi eẽ ejisyry eo ikenẽ! e'i. Awyje ikõ epoi iwyi eo nẽ! e'i Jesu ãjãgai pè.

26 Ameve py'awarà mõ ãjãg eamamai. Ja'yry omomo mijẽ imoyvyapi. Ameve opoi iwyi ojisyry oo ky'y. A'evo remẽ, ja'yry omãnõ mãnõ rã'ĩ. Ãmẽ pirujẽ a'evoa rè omã'ẽ mãe kõ e'i:

– Eeee! Omãnõma sipõ? e'i tite kupa.

27 Ãmẽ Jesu opopyy ja'yry imopõ'ã. Ameve ikatupa ky'y.

28 [Ajaire Jesu ojisyry oo ky'y, wemimo'ekwerà kõ reve.] Ãmõ tetã wyry pè oike kupa. Ãmẽ Jesu rõmõ'ĩte ekoi remẽ, emimo'ekwerà kõ uu javo ijupe.

– Manyvore põkõ noromoẽokai sire'e sõ ãjãg ja'yry pe wyi imoisyry? e'i kupa.

29 Ajawyi Jesu e'i ijupe kõ:

– “Aje ywete” pejẽ Janejare'e kasia pè remẽ tè kuwa pemoisyry kuwa ãwĩ rapijarà iwyi! [Ãmõ, napejimi'ui rã'ĩ peporegeta ijupe remẽ teve kuwa,] e'i ijupe kõ.

30-31 Ajaire ojisyry a'e pe wyi oo kupa. Karireja yvy rupi okwa kupa. Jesu opota wemimo'ekwerà kõ motekokuwa wyi nopotai jane kõ rovake oo. Kee e'i Jesu imo'e kõ:

– Kee a'e pejẽ. Yva pe wyi ajo ajimojane mã'ẽ rõmõ ije. Ajamã'ẽ nivoi mãe kõ po pè ereraatà eme'ẽ kupa. Ajamã'ẽ ejuka kupa remẽ, moapy 'arà paire apoera tarà mijẽ, e'i ijupe kõ.

32 Aepo e'i ywe'e ipe Jesu ijupe kõ. Noenui sire'e ijayvu kupa ajamã'ẽ. Nokuwai manyvo jaa tè aepo e'i remẽ. Ajamã'ẽ, “Manyvo jaa põ aepo ere”? ne'i Jesu pè kupa, osĩ iwyi kupa rewarà mõ.

33 Ãmẽ ajaire Jesu rena pè ovãe kupa, Kapanão taa pè. Ãmẽ tetã mõ wyry pè oike kupa. Oikepa kupa remẽ, Jesu e'i ijupe kõ:

– Moma'e rè põkõ peayvu yvu pee rupi peiko? e'i.

34 Nipui kupa ajamã'ẽ, osĩ javo kupa rewarà mõ.

– Ava ywesõ põ janewyi, Jesu remimo'ekwerà rõmõ ekoi? e'i tite kupa.^d

Ajawyi osĩ javo kupa. 35 Ajamã'ẽ Jesu aepo jaa okuwa teãmã. Ajawyi omuu kõ imo'e kõ mijẽ.

– Pepota sõ jo'arà kytywarà mõ peẽ remẽ, temĩgwai vo 'ejẽ tapeiko ajawyi, e'i. Tapepãtavõ ãmõ kõ, pirujẽ, e'i ijupe kõ.^e

36 Ãmẽ Jesu ja'yry mõ omuu okoty to'ã ovake kõ, tomã'ẽ ee kupa. Ojajuvy juvy. E'i ãmẽ ijupe kõ:

37 – Erauvay pekupa remẽ, ja'yry kõ ve peauvaytà. Penory katutà ee kõ pemãjã. Ja'yry rauparà kõ pè “erauparà kõ” a'e ipi, e'i ijupe kõ. Ava mõ erau remẽ, a'e Emuuarerà wau tary ve, e'i ijupe kõ.^f

38 Ãmẽ Juwão e'i Jesu pè:

– Oremo'earà, kwaima'e mõ rè oromã'ẽ, neayvu rupi ãjãg kõ omoẽ imoisyry emijarerà kõ wyi ereko mã'ẽ rè! Neremimo'earà rõwã ipe a'e ajamã'ẽ! Ajawyi, “Mokoo sõ nereko!” oro'e ijupe! I'ete põ aepo oro'e ijupe remẽ? e'i Jesu pè.

39 Ãmẽ Jesu e'i ijupe:

– Ãnĩ! Aepo tapejẽ e'ã ijupe, e'i. “Aje” e'i eayvukasia pè mã'ẽ kõrijõ tè mãrãnà jikuwa e'ã oinõ kuwa eayvu rupi! A'evo ekoi paireve, noporegeta ai kuwa'ãi ere ajaire, e'i. 40 Ava mõ nojimoãpãi janere remẽ, a'e janekoty rewarà rõmõ ekoi tè, e'i.^g 41 Kee jaa rè tapeja'a teve. Ma'e remẽ ava mõ kee e'ità peupewarà mõ: “Kiristu remiauvay tè ãwĩ. Ajawyi i'ywa remẽ, yy ame'ẽtà ijupe to'u”, e'ità. Ome'ẽ peupe remẽ, eupe omẽ'ẽ maevo sõ tite. Ajawyi oryvaytà Papa ee epyme'ẽ. Aje ywete aepo a'e pejẽ, e'i Jesu wemimo'ekwerà kõ pè.^h

42 E'i jẽ Jesu ijupe kõ:

– Ja'yry kõ erauvay ipi. Ajawyi akãte'ã ee kõ ipi. Ava mõ sõ omojaiwe kõ eraa weko ai rupi remẽ, ojimomorijau 'atà tè Janejare'e po pè. Ikatu sa'u kuwa na'evoive remẽ ojimomarama amãtejẽ ovote omãnõ, e'i. Ikatu sa'u kuwa a'evo mã'ẽ takuru mitirõwã mã'ẽ wãpasĩ amãtejẽ okuruka rè ero'a pãranã pupe, ja'yry kõ nomojaiweive remeve, e'i.

43-44 – [Kee a'e teve pejẽ. Pejireko katu penemimota ai rupi tapeiko ywe'e tite e'ã.] Ajawyi kee a'e eayvukasia rõmõ. Ma'e remẽ pepo ojavyokatà ivo tekoua pejẽ.ⁱ A'evo sõ peiko remẽ, ikatu sa'u kuwa pejipoeta amãtejẽ ity, Janejare'e rekoa tapejavy ywe'e tite e'ã. A'evo peiko amãtejẽ remẽ tè napeo'ãi kuwa pepo revejẽ jimomorijau wasua rena kyty, (tata wasu noe'ãi mã'ẽ kyty).^j 45-46 Ãmõ, ma'e remẽ pepy rupi peotà peneko ai kyty. A'evo sõ peiko remẽ, ikatu sa'u kuwa pejipyeta amãtejẽ ity, Janejare'e rekoa tapejavy ywe'e tite e'ã. A'evo remẽ tè napeo'ãi kuwa pepy jeovai revejẽ jimomorijau wasua rena kyty, (tata wasu noe'ãi mã'ẽ kyty).^k 47-48 Ãwĩvo ve ma'e remẽ penea pupe nivoi peikotà.^l A'evo sõ peiko remẽ, ikatu sa'u kuwa pejeakwaro amãtejẽ remẽ, Janejare'e rekoa tapejavy ywe'e tite e'ã. Ãmẽ tè peo jẽtà kupa penea wajõ tè Janejare'e rena pè peiko karuaru. Napeo'ãi kuwa penea jeovai revejẽ jimomorijau wasua rena kyty. Ayay kõ'ẽ kõ'ẽtà a'e kyty oo mãe kõ pè. A'evo ve tata poroapy karuaru. Ãmõ, a'evo ve pisu porosu'u karuaru, e'i Jesu.

49 – Kee a'e pejẽ. Pejimomorijautà peiko. Ãwitõ karakuri jaapy tata pupe tojiky'a'o ipi, ãwĩvo 'ejẽtà pejẽ peiko. 50 Kee a'e teve pejẽ. Ãwitõ sautu eekatu ja'umã'ẽ pupe jainõ ipi remẽ. Ãwĩvo ve jane kõ pè ikatuay wete tijaiko ipi. Ajamã'ẽ sautu nomoeei sõ janeremi'õ ky'y remẽ, manyvoa rã rõmõ rõwã kuwa sautu ãmẽ. Ãwĩvotà pejẽ, peayvu yvu peiko remẽ, nowari peiko remẽ. Ajawyi sautu vo 'ejẽ tapeiko, a'e pejẽ, e'i Jesu ijupe kõ.^m