Hʌ̃gtꞌar Haai hi jëeu nʌm hootarr
4
Mag mʌrʌg tꞌumaa jaau dichtarr kꞌur mua hoowai,
hedjãata puertdijö weeudʌ wëjöm mua hoobaadëjim.
Mag heemua nacha mag mʌchdëu trompeta jẽbag sim hiek hũrtarr hag hödijö simuata mʌrʌg,
“Mau hʌ̃gtꞌar pidú,
mʌg hatag nem tꞌumaa höbëbërg maju mua pʌrʌg hoopikꞌim” ha sĩejim.
2 Magbarm hee hich Hẽwandam Hakꞌarauta mʌ hʌ̃gtꞌar hatꞌaadeewai hich Hẽwandam juupjemta nem pörkꞌau pöoma sim hooimajim.
Hag gaai woun hãb jup sĩejim.
3 Mag pörkꞌau gaai jup sĩerr woun sĩi mokdaudam jaspe haajemjö bʌ̃ʌnaa cornalinajö pꞌupꞌupꞌumjö sĩejim.
Mag pörkꞌau pöm sim bigaau hĩchab pirm pꞌãauraanaa dau bʌ̃ʌʌ esmeraldajö simta jʌ̃a wëjoojim.
4 Mag pörkꞌau pöm sim bigaau deeum hich hagjö pörkꞌau chaaindam daii kꞌitꞌëem kꞌapan veinticuatro hohood pꞌʌʌrdʌ wëjömjã mua hoojim.
Maig hĩchab jöoin kꞌajũa wajappꞌa bäppꞌä jũanaa pörsirjã pꞌĩr dën jũa sĩsid hajim.
Makꞌʌʌn jöoin chi kꞌapanagjã veinticuatro narr haawai makꞌʌʌn pörkꞌau mag veinticuatro narr gaai hich hagpierr hohood wëjoojim.
5 Mag pörkꞌau warm kꞌʌʌn jãrrcha sim haarmua pagtꞌʌm dau pꞌʌr jẽjẽer kꞌabaadëm dʌ̈i hĩchab pꞌipꞌis kꞌabaadëmua sĩi hiyʌ̈ʌmjö haadëp sĩejim.
Mag pörkꞌau pöm sim kꞌĩirpꞌee hõtdau siete paakꞌanaa dʌnʌnʌid tꞌʌnaajim.
Makꞌʌʌn hich Hẽwandam Hakꞌaar hajim.
6 Hich hag pörkꞌau na hĩchab pꞌũasjö simta sĩi dau bʌ̃ʌʌ simjã sĩejim.
Mag pörkꞌau pöm sim bigaau jãrrcha sĩi kꞌanjö sĩsidʌmta kꞌĩir gar maimua hëugarm magwe dau kꞌapan pꞌupꞌup sĩsidʌm jayap naajim.
Mag sĩsidʌmʌn hiiu sĩsid hajim.
7 Chi nacha sĩerr leonjö sĩejim;
mag hẽudeem,
pꞌak hemkꞌöidamjö sĩejim;
mag garm wounkꞌa sĩejim;
maimua hẽudeecharam,
jayapam,
sĩi jimiejãu pöm simta hũrr jörrömjö sĩejim.
8 Mag sĩsidʌmʌn hamach jayapwe sĩi nem hich kꞌapan hagdaujö seis wai sĩsid hajim,
hamachpierr.
Hierr jãgarm magwe dau pꞌupꞌupnaa hʌ̃rjã sĩi dau kꞌapan pꞌupꞌup sĩsid hajim.
Hamach makꞌʌʌnau bʌ̃ʌrjã hijeeuba hedaram magwe Hẽwandam tꞌö hiekꞌamamua,
“Hẽwandam,
pʌjö bʌ̃ʌrjã pekau chukꞌum kꞌʌʌn chan hooba haajem” hanaajim.
“Pʌchta tꞌumaam kꞌʌʌn Pör hanaa tꞌumaam kꞌʌʌn kꞌãaijã chi jua tꞌierriu.
Pʌchta warrgarwejã hich mag sĩerranaa mʌg hatagjã hich mag sĩerraju” ha tꞌö hiekꞌamajierram.
9 Mag sĩi hich kꞌapan sĩsidʌmua maach Hẽwandam hichta hich mag tꞌõojã kꞌaugba mag hich pörkꞌau gaai hoo simʌg jëeu nʌmua,
hʌ̈u hajim hanaa hi tꞌö hiekꞌa naajim.
10 Mag hi tꞌö hiekꞌakꞌakꞌampierr mag jöoin veinticuatro hohood wëjöm kꞌʌʌnau hi jup sim kꞌĩirpꞌee,
“Pʌchta chadcha chi jua tꞌierrau” hanaa hamach pörsir pꞌĩr dën jũa narr jua hee hauwia hirig hʌanaa pꞌõbkꞌakꞌa haajeejim,
mag hichta tꞌõjã tꞌõba warrgarwe hich mag hiiu sĩerrʌmʌg jëeuwai.
11 Mag tꞌʌkꞌöokꞌanaa meukꞌarauta hirig,
“Pʌʌta maar Pör Hẽwandamau;
pʌʌta chadcha chi jua tꞌierr haawai pʌ kꞌĩragta tꞌumaam kꞌʌʌnau heenaa tꞌö hiekꞌaju haai nʌm” hanaajim.
“Pʌchdëu nem tꞌum hompaam kꞌõsi hompaawiata chadcha nem tꞌum tꞌʌnʌm” ha tꞌumeukꞌar majierram.