2 PEDRO
Biek numiim hẽsap Pedroou pꞌã deepʌ̈itarr
Salud
1
Mʌʌn Simón Pedroou,
hich Jesucristooucha hich hi jaaumkꞌĩir jʌr hautarr;
muata pãrag mʌg hẽsap pꞌã deepʌ̈i chirʌm,
pãraujã maach hich Jesucristooucha jʌr hautarr kꞌʌʌnau hʌ̈kꞌa nʌm hiekpaita hʌ̈kꞌa naawai.
Pãrau mag hʌ̈kꞌa nʌmʌn,
maach Hẽwandam hanaa maach peerdʌ haaujem Jesucristo tꞌumaam kꞌʌʌn dʌ̈i nem hagcha haajeewai,
hiwiir hãbam kꞌʌʌnagpaita mag hich hiek hʌ̈kꞌapim kꞌõsi kꞌaba,
tꞌumaam kꞌʌʌnagta hagdaujö hʌ̈kꞌapim kꞌõsi haajeewaiu.
Magua maach hich Jesucristo dʌ̈icha wënʌrraajerr kꞌʌʌn kꞌaibag chugpatarrjö pãar maar kꞌãai hẽudeecha hʌ̈kꞌatarr kꞌʌʌn kꞌaibagjã hichdëuchata chugpatarr haawai,
maach tꞌumaam kꞌʌʌn honeg hãbata nʌm,
hãbam hiekta hʌ̈kꞌa naawai.
2 Pãar kõit jëeu chiraajem,
jãg pãachdëu warag Hẽwandam kꞌaug wëtum dʌ̈i maach Pör Jesujã kꞌapꞌʌcha paaukꞌamam gaaimua hʌ̈u pãar dʌ̈rrcha heeg hoonaa pãar kꞌõinaa pꞌë wai sĩemkꞌĩir.
Dichdëu hʌ̈kꞌatarr hiek gaaita warag hubʌ paaukꞌamaju haai nʌm
3 Hẽwandamaun maachig chadcha hich hiek hʌ̈kꞌa nʌm kꞌʌʌnjö hich hatꞌeepai nem hajapꞌa wau wënʌrrajuuta kꞌap hapim kꞌõsi sim.
Magaag hatꞌeyan hich hiiu haawai maadëu nem higju tꞌum warre kꞌĩir kꞌaug sĩubarmjöta hajim:
Nacha maachig Cristota hajapꞌa kꞌapꞌʌ hapijim,
har hichdëu nem hajapꞌam happai waunaa hich hajaugjã hoopi nʌmua maach hichig paa hautarr hag Cristo.
4 Cristo hich mag sim gaaimuata Hẽwandamau maachigjã kꞌapꞌʌ hapi sim,
jãga mʌg hatag paawai maachjã hichjö nʌisiju;
mag hichjö hajaug paaukꞌaju kꞌĩirjugjö chan tag kꞌĩirjug hajapꞌam chukꞌum.
Magta maachjã warm kꞌʌʌnjö kꞌaibag waum kꞌõchgau warag heeg paaukꞌamatarrta hʌ̈u Hẽwandamau maach peerdʌ haujim,
magbarmua mʌg hatag paawai hichjö hajaug paapʌ̈iwi hich dʌ̈i wënʌrramkꞌĩir.
5 Maguata muan pãragan,
pãachdëu hʌ̈kꞌa nʌm hiekta warag hogdʌba tꞌãraucha hʌ̈kꞌanaa Jöoi dau na hagchata wënʌrrat ha chirʌm.
Mag hi dau na hagcha wënʌrranaa kꞌĩirjug paraa haajeet,
kꞌani Hẽwandamau waupim kꞌõsi sĩ maimua kꞌani waupiba sĩ.
6 Mag kꞌĩirjug paraanaa pãach kꞌĩirjug hee nem kꞌaigbam wauju kꞌĩirjug bëe nʌm waum kꞌõchgau pꞌirir tꞌʌnaawiajã hoob magʌm kꞌĩirjugta warag pãach gaai hʌ̃rpapimiet.
Magju kꞌãai magʌm kꞌĩirjug dich garmuata mag pödpʌ̈pʌ̈ikꞌam dʌ̈i,
pꞌitꞌurg hauwiajã,
sĩi kꞌĩuta jʌmpʌ̈pʌ̈i habat.
Mag sĩi kꞌĩu hãwatpʌ̈pʌ̈ikꞌam dʌ̈ita Hẽwandam dau na nem kꞌaigbam waujujã hökꞌönaa hi dawagaam nempaita waubat.
7 Magnaa dichjö Hẽwandam hiek hʌ̈kꞌa durrum kꞌʌʌnjã kꞌa kꞌõsinaa bigaaum kꞌʌʌnjã tꞌumaa daupii habat.
8 Cha mʌchdëu pãrag jaau chirʌmjö,
chadcha mag hajapꞌa nem wau nʌmuata warag pãachdëu hʌ̈kꞌatarr hiek gaai hubʌ paaukꞌamamʌn,
magan pãar serbiibajã kꞌaba,
ni sĩi parta maach Pör Jesucristo kꞌaugjierramjã habaju.
9 Mamʌ har mag hʌ̈kꞌatarrjã magʌm nem hajapꞌam wauju hẽkꞌaba haawai kꞌĩirjug bãaubamjö sim woun chan,
sĩi dau kꞌĩsu wa dausĩ warppꞌa nem hoo nʌm kꞌʌʌnau wajap nem wauju kꞌaugba haajemjöta sim,
hich pekau hee nʌrraajerrta hʌ̈u maach Pör Hẽwandamau hich kꞌaibag chugpaatarrjã kꞌĩirjuba.
10 Cristo gaaimua kꞌodamnaan,
mag Hẽwandamau pãar hichdëucha jʌr hauwi hich dënkꞌa hautarr haawaita hi dau na mag nem hajapꞌa wau nʌmta kꞌajapꞌam bënjö hidëu pãach gaai tꞌierrpapibat.
Magta nem hajapꞌam happai wau nʌm chan,
meperau kꞌujʌrchëwiajã,
pãrau pãach hʌdʌʌr deebaju.
11 Pãrau magta hamʌn,
maach peerdʌ hautarr hanaa maach Pör Jesucristo haar barimam hedjã hirua pãrag “Pãar hʌ̈u bëejim” hawi,
hich mag hich durr hich dʌ̈i hajapꞌa pꞌë wai sĩsiju.
12 Chadcha maach peerdʌajem hiek pãachig jaautarr pãrau hʌ̈kꞌawi hag hiek gaai hubʌ nʌm hawiajã hichiita cha mʌchdëu jaau chirʌm hiekꞌan pʌaba hich jãg pãrag jaau wai chitaju,
kꞌĩir heyaa wai wënʌrramkꞌĩir.
13 Mua kꞌĩirjuawai mʌʌta hʌ̈u hagtꞌa hiiu pʌʌrba chitʌm haiguin hich jãg pãar wawí hiekꞌa chitaju haai chirʌm.
14 Maach Pör Jesucristoou mʌchigcha jaauwai hi hiek ya mʌ pöm chitabaju haajem.
15 Maguata mʌch meeju nawe mua pãrag hajapꞌa kꞌapꞌʌ hapiju hẽkꞌa chirʌm,
maagwai ya mʌ meebaadëwiajã mag mʌchdëu pãach wawitarr hiekta kꞌĩir heyaa wai nʌisimkꞌĩir.
Hich Jesuucha jʌr hautarr kꞌʌʌnau chadam hiekta jaau wënʌrrarr
16 Ya mua mʌch kꞌapeen hagjö hich Jesuucha jʌr hautarr kꞌʌʌn dʌ̈imua pãrag jaaujim,
jãga maach Pör Jesucristo jua tꞌeeg sĩerrʌ́,
maimua jãga deeu hi bëeju.
Jãg marau pãrag nem jaau nʌm chan sĩi sëukꞌa maach kꞌĩirjug heepaim nem hĩgkꞌaa kꞌabam.
Maran maachta maach Pör Jesuu hich dʌ̈i Hẽwandam durrsĩ gaai pꞌë harrtarr haawai maraun maach daúacha hi jua tꞌeeg hoowi hi hajaugjã maach daúacha hootarr haawaita mag hi jaau nʌm.
17 Maar dakꞌĩir hajim Hẽwandam chi Hayau hich Hiewaa kꞌĩir hajaugau sĩi bʌ̃ʌmjö hapiwi hich Hẽwandam tꞌumaam kꞌʌʌn kꞌãai hʌ̃rʌʌcha sĩerrʌmuata hi higwi jʌʌntꞌumiejö bau wëjöm heemua,
“Chamʌʌta mʌ Hiewaa,
mʌchdëucha jʌr hautarrau;
hiita mʌ tꞌãrau” ha hiekꞌatarr.
18 Hich mag hed mag Hẽwandamau hich juapá hoopiewai,
maachta maach Pör Jesús dʌ̈i mag durrsĩ gaai narr haawai,
mag hedjã heemua woun hiekjö hiekꞌabarmjã maach jʌ̃gʌuchata marau hũrjim.
19 Mag,
warrgarwe Hẽwandam hi jaaumienau bëeju jaaujerr wounta chadcha marau maach daúacha hootarr haawai marau kꞌapꞌʌ nʌm,
chadcha tagam nem hamau jaaujerrjã hag hee höbërju.
Mua kꞌapꞌʌ chirʌm,
pãraujã hagjö hamau jaaujerr hiek kꞌapꞌʌ nʌm;
mag Hẽwandam hiek hamau jaaujerran hĩs hewag pawiajã kꞌĩchag hee hõtdau paa dʌnʌmjöta sim.
Mag hõtdaujö sĩewai,
hag bʌ̈ʌg hoo nʌmjö Hẽwandamau kꞌõsimjöta wënʌrraju haai nʌm,
Cristo chi hedpꞌerr garm pꞌĩdag dʌnʌʌuchë nʌm hora.
Mag hich dʌnʌʌubaichëm hedta,
hedau hãspa tꞌʌnʌisiewai hag bʌ̈ʌg nem hoo nʌmjö,
maach kꞌĩirjugjã haardʌbaadeewai warrgar Hẽwandam hi jaaujerr kꞌʌʌnau pꞌã pʌatarrjã tꞌumaa kꞌapꞌʌ nʌisiju.
20 Magua kꞌap habat:
Hẽwandam hiek hichdëucha hich hi jaaumienag hichdëu nem wauju jaaumamua pꞌãpitarr chan hãbmuajã hichdëu kꞌĩirjuawai magjöo habaawai sĩi hich kꞌõchagpierr jaauju kꞌaba sim.
21 ¿Jãgwi?
Warr pꞌãawaijã hich Hẽwandam Hakꞌarau jaaumamta pꞌãtarr haawaima.
Hẽwandam hi jaaumienau bʌ̃ʌrjã sĩi hamach kꞌõchagpierr pꞌãm kꞌõchgauta pꞌãbajierram.
Hamaun hich Hẽwandamau hamachig kꞌĩirjug deemampierrta pꞌãmaajeejim.