1 PEDRO
Nacharam hẽsap Pedroou pꞌã deepʌ̈itarr
Salud
1
Mʌʌn Pedroou,
Jesucristooucha hich hi jaaumkꞌĩir jʌr hautarr.
Pãar pãach durr chaaur parhooba haaidʌ durrum kꞌʌʌnag muata pãrag mʌg hẽsap pꞌã deepʌ̈i chirʌm:
Ponto hanʌm durram kꞌʌʌnag,
Galaciapienag,
Capadociapienag,
Asiapienag maimua Bitiniapienagjã hagjö;
hajapcharan maach meeun tꞌum maach peerdʌajem hiek hʌ̈kꞌa nʌm gaaimua durr chaaur dʌr durrum kꞌʌʌnagma.
2 Hermanonaan,
hõor jua hökgau pãar mag chikꞌam durr dʌr durrab mamʌ,
pãarjã hagjö hich Hẽwandamaucha jʌr hautarr kꞌʌʌn kꞌabahab,
hichdëu warrgarwe kꞌĩirju wai sĩerrjö chadcha pãar peerdʌ hautarr haawai.
Magtarr haawai pãarta hich Hakꞌarag hich hatꞌee kꞌĩet pꞌë haupijim,
Jesucristo meewai bag hãrtarrau pãach hajaug paabapäaiwai hich hipierraa wënʌrramkꞌĩir.
Hẽwandamau warag pãar hʌ̈u heeg hoonaa kꞌõinaata pãar wai sĩepim kꞌõsi chiraajem.
Jesucristo dʌ̈icha naaimajuuta kꞌĩirjuajem
3 Mua hʌ̈u hajim ha chirʌm maach Pör Jesucristo Haai Hẽwandamag,
hʌ̈u hichdëuta maach dau haug kꞌaugwi maach hakꞌaar dich pekau hee chi kꞌëchamjö narrta hʌ̈u peerdʌ hauwi hich chaainkꞌa hautarr haawai.
Mag hi chaainkꞌa nʌmʌn,
hʌ̈u Jesucristojã deeu pꞌiidʌtarr gaaimuata mag hi chaainkꞌa naawai,
4 jãg nʌʌ hawi hich Hẽwandamau hich sim haar maach pꞌë hauju jaau simjö hich dʌ̈i chadcha wai jootꞌʌjujã kꞌapꞌʌ nʌm.
Mam paaukꞌabaimam chan tag meejã meeba,
kꞌaibagjã chukꞌu,
ni jöoiraa paajã kꞌaugba hich magta nʌisiju.
5 Pãraujã pãach tꞌãrauchata Hẽwandam hiek hʌ̈kꞌa naawai hirua hich jua tꞌeegauta pãar tꞌʌa wai sĩeju,
mʌg hatag deeu Cristo bëewi maach hich haarcha pꞌë harr nʌm hora.
Mag pãar pꞌë hatꞌaadëm hedta pãachdëu nem hajapꞌam paarpaju kꞌĩirjuajerrjã tꞌumaa chadcha pãrau wai nʌisiju.
6 Maguata pãar pãachdëu hʌ̈kꞌa nʌm hiek gaaimua gaai machgau hökꞌĩirjuu haju hawiajã maan kꞌũchpaiu.
Magwiajã chadcha Hẽwandamau pãach dʌ̈i mag hajapꞌa haju kꞌapꞌʌ naawaita magʌmjã higba chadcha pãar honee nʌm.
7 Mamʌ mag pãar pꞌitꞌurg hau nʌmʌn,
pꞌĩr chaar kꞌap haag hõtdau hee chach hoojemjö,
pãrau chadcha hich hiek tꞌãraucha hʌ̈kꞌa nʌ ha kꞌap haagau.
Mag pꞌitꞌurg hau nʌmjã hi hisegba hʌ̈u hãwat nʌmʌn,
magan maata pꞌĩr chaar kꞌãaijã hʌ̃rcha balee sim,
pꞌĩr hawiajã mʌg hatag chukꞌu haadëju haawai.
Mamʌ mua jaau chirʌmjö mag hãwat nʌmʌn,
magan deeu Cristo bëem hedjã hich Jöoirauchata kꞌapanag dakꞌĩir pãar tꞌö hiekꞌaju,
mag hʌ̈u hãwattarr jũrr.
8 Pãrau mʌ dënjö Jesucristo kꞌĩircha hoobajieb mamʌ,
pãrau hi kꞌõsinaa hi hiekjã hʌ̈kꞌa nʌm.
Maguata hatcha honeg nʌm hiekꞌau pöd pãrau pãach honegjã jaauju kꞌaugba nʌm,
jãga naaimaju kꞌai ya hich dʌ̈icha naaimaawai.
9 Mag pãrau pãach daúa hi hooba naab mamʌ,
jãg hi hiek hʌ̈kꞌa nʌm chan par kꞌabam.
Jãg hich hiek hʌ̈kꞌa nʌm gaaimuata hʌ̈u hirua pãar peerdʌ haubajieb.
10 Warrgarwe Haai hi jaaumienau jaaujeejim,
jãga Hẽwandamau mag hõor peerdʌ hauju.
Mamʌ mag hajap estudiewi dʌ̈rrcha hag hiek hig hiyʌ̈ʌ haajerrjã hich maagwaiwe chan mag hamachdëu jaau nʌmjã pöd hajappai kꞌaugba haajeejim,
jãga Hẽwandamau magju.
11 Mamʌ hich Hẽwandamau hich Hakꞌaragta hamag nem jaaupiejerr haawai chadcha chi Hakꞌarauta mag Cristoou hõor peerdʌ hawaan bëeju nawejã hi higwi,
“Woun hãb bëewi hõor hee hapꞌʌʌ habarmuata nem tꞌum pödpʌ̈iwi hichta hʌ̃gtꞌar mawia tꞌumaam kꞌʌʌn kꞌãai chi jua tꞌierrkꞌa sĩsiju” ha jaaujeejim hamag.
Hamachdëu mag hũrbaawai warag hajapchata kꞌapꞌʌ ham hiigjeejim,
chijãg wounchata mag bëeju ha jaau sĩ maimua mag pierrwaijã jãagwaichata barchëju ha kꞌap haag.
12 Mamʌ mag nʌm hee hich Hẽwandamau hamag kꞌapꞌʌ hapiejeejim hĩchab,
mag hamau woun bëeju jaau nʌmjã hamach daúa hoobaju;
hajapcharan maach hĩs hewagam kꞌʌʌn hatꞌee bëejuuta mag jaaujeejim.
Maagjerr haawai hĩs maach peerdʌajem hiek jaau nʌm kꞌʌʌnaujã,
hich hag Hẽwandam Hakꞌarauta maachig jaaupibaawai,
hich mag woun bëeju jaaujerr hiekta maraujã jaau wënʌrrabahab.
Hĩsin mag hõor peerdʌ haaujem hiek maadëu kꞌapꞌʌ nʌm hee,
Hẽwandam chognaan angelnaanaujã hagtꞌa kꞌaugba naawai,
hamau kꞌaugam kꞌõchaaga haajem,
jãga mag Hẽwandamau hõor peerdʌ haaujẽ.
Hẽwandamau kꞌõsi simjöta wënʌrraju haai nʌm
13 Maach Pör Jesucristo mag chi jua tꞌierr haawaita muan pãragan,
hichdëu pãachig nem mag haawai hi hipierraa haagta kꞌĩir kꞌaug nʌisit ha chirʌm,
hichdëu pãach jʌraan bëem hed Hẽwandamau pãach dʌ̈i hajapꞌa haju kꞌĩirjugjã hogdʌba,
ni Hẽwandamau waupiba haajem nemjã wauju kꞌĩirjuba.
14 Ya pãar Hẽwandam hipierraa haagta hi chaainkꞌa naawai hoob hʌdʌʌr warrgar pãachdëu hi kꞌaugju nawe nem kꞌaigbam waaujerragta deeu pãach gaai hʌ̃rpapimiet.
15 Magju kꞌãai maach Pör Jesucristo gaaimua maach peerdʌ hautarr Jöoijã pekau chukꞌu sĩerraawai pãarjã pekau wauba pãach wënʌrrʌmpierr hãba hi hatꞌeepaita nem waubat.
16 Kꞌĩir heyaa habat,
Hẽwandamau hich hiek gaai,
“Mʌjã pekau chukꞌu chitaawai pãarjã mʌjö pekau chukꞌu habat” ha sim. (Lv 11:44-45)
17 Kꞌapꞌʌ habat hagjö,
Hẽwandamaun mʌig heegar hamachdëu nem waaujerrjöta haju tꞌumaam kꞌʌʌn dʌ̈i.
Mag simʌgta pãrau Haai hichë naawai mʌig heegarmua hʌ̃gtꞌar wëtju kꞌĩirju durruwe hi dau na nem kꞌaigbam wauju hökꞌö habat.
18 Warran chadcha pãrau pãach jöoin hi maadëu higba simʌgta hʌ̃rcha hee haajeejim,
pãach dënnaanau pãachig jaau bãautarrjö.
Pari maagjerr ya hĩs Hẽwandamauta hich hatꞌee pãar peerdʌ hatꞌam.
Pãrau kꞌapꞌʌ nʌm,
mag pãar peerdʌ hawaag,
pꞌĩriujã pꞌagba ni pꞌatkꞌonaujã pꞌagbajim,
jãgʌm nem hãrb kꞌaba hãarjeewai.
19 Jãgʌm nemeu pꞌagju kꞌãai,
hich jãg warrgar Hẽwandamau hõrag corderodam chi hajapcharamta jʌrwia hichig ofrendakꞌa tꞌõonaa deepiejerrjö,
jũrr hich Hiewaa Cristo bʌ̃ʌrjã pekau chukꞌu kꞌitʌmta maach kõit tꞌõopijim.
Mag hi tꞌõopitarran hi bag pꞌĩr dʌ̈i pꞌatkꞌon kꞌãaijã hajapcha sim hãrbarmuata maach kꞌaibag heemua höbër hawaag hajim.
20 Mag Cristo hõor kõit tꞌõopijujã hich Jöoirau mʌg jẽb hompaaju nawe ya kꞌĩirju wai sĩejim.
Magtarr haawai pãar dau haug kꞌaugwi hĩs mʌg jaarta chadcha pãrag hich kꞌaugpibarm.
21 Hich mag Cristo kꞌurauta hʌ̈u pãrau Hẽwandam hiek hʌ̈kꞌa durrum.
Mag Cristo tꞌõowaijã,
hich Hẽwandamauta hʌ̈u hi pꞌiriu hauwi,
hich haar hauwi,
hich dʌ̈i jua tꞌeeg hãba hapijim.
Maguata chadcha pãrau pãach tꞌãraucha hi hiek hʌ̈kꞌa durrum,
hich jãg Hẽwandamau Cristojã pꞌiriu hauwi hich haar hautarrjö pãachjã hagjö hich haar hauju kꞌapꞌʌ naawai.
22 Mag nʌm dʌ̈i hĩs maach peerdʌajem hiek chaar Cristoou jaau sim pãachdëu hʌ̈kꞌa nʌm gaaimua,
ya pãar hirua hajaug paabapʌ̈im,
pãach wir haigjã hagdaujö dich kꞌapeen dʌ̈i daupii wënʌrramkꞌĩir.
Ya mag hi jua hajaug paapʌ̈itarr kꞌʌʌn haawai par hiiupai kꞌaba tꞌãrauchata pãach kꞌapeen daupii habat,
dich kꞌapeen hëugar parhooba kꞌĩirjuba.
23 Magaag ya pãar warr pãach naajerrjö kꞌaba nʌm,
mag Cristo hiek hʌ̈kꞌawi hajaug paapʌ̈itarr gaaimua heeu tꞌaaba nʌmjö pekau chukꞌu hi chaainkꞌa naawai.
Mamʌ mag pãar deeu tꞌaabatarr chan pãach hãd bi heemua kꞌaba,
hich Hẽwandamau hich hiek hʌ̈kꞌapi hatꞌamuata mag heeu tꞌaababarmjö hapijim.
Hajapcharan hi hiekꞌauta maach hʌ̃gtꞌar höbërpiejem.
Mag hiek chan bʌ̃ʌrjã chugpaa kꞌaugba hich magta sĩerrʌm.
24 Maguata hich hiek pꞌã sim gaaijã hich hiek hich mag chugpaa kꞌaugba sĩerrʌm higwi magjim:
“Sĩi hich mag hëumee wënʌrraag kꞌaba haawai mʌig heegarin hõran sĩi pabʌ̈ kꞌër kꞌukꞌuur tꞌʌnaawi kꞌʌibaadeejemjöta nʌm.
Par hamau wir haig hamach tꞌöo haawaijã sĩi mag pabʌ̈ kꞌũchpai maar bau tꞌʌnaawi deeu kꞌiugpꞌë kꞌʌibaadëmjöta haajem,
ya meebaadeewai.
25 Magarrau mʌ hiekꞌan chadpama,
bʌ̃ʌrjã chugpaa kꞌaugba hich magta sĩerrʌm” hajim maach Pör Hẽwandamau.
(Is 40:6-8)
Mag hiekta maach peerdʌajem hiekꞌau. Hich mag hiekta pãragjã jaaubajieb.