Parhoobam kꞌʌʌnjö haawain Hẽwandamta hiseg nʌm
4
Hĩs mua pãrag jëeu hookꞌim:
¿Jãgwiata pãar jãg pãach heepaijã kꞌõinaajã kꞌaba hiek pꞌitꞌuurga tꞌʌnʌm dʌ̈i,
chikꞌam dʌ̈i kꞌĩir masi dʌrdʌrnaa jũrr bëhbë haajerráma?
Mua hoowai jãan sĩi pãach tꞌãar hee jãg pãachdëu nem waum kꞌõsimpaita waum kꞌõchkꞌa tꞌʌnʌm gaaimuau.
2 Pãraun chikꞌam nemta pãach dën hapim kꞌõsi haajem haajem;
maimua mag pãachdëu nem hig nʌm pöd paarpaba haawaijã,
par hiekꞌaupai chikꞌam tꞌõojem hakꞌiin,
chadcha tꞌõopʌ̈ikꞌam ha hiekꞌaajerram hanʌm.
Pãach kꞌãai bigaaum kꞌʌʌndam puesto hajapcha kꞌãijã wai nʌm hoowai magjã kꞌõchkꞌaba,
jũrr pãachta garpabam haig chan nem pʌaba sĩerrjëem haajem.
Magʌm gaaimuata pãach heepaita juurhi pꞌiidʌ tꞌʌnʌmjö tꞌʌnaabahab.
¿Pari kꞌan jãgwi mag pãachdëu nem hig nʌmjã pöd paarpaba haajẽ?
Hẽwandamag jëeuba haawaima.
3 Maimua mag hichig jëeuwaijã hirua deeba haajem.
¿Jãgwi?
Ya mag pãachdëu nem hig nʌm paarpabaadeewai hagua sĩi pãach hö kꞌõchagpierr nem wawaagta hig nʌmjã hichdëu kꞌapꞌʌ sĩewaima.
4 Pãran Hẽwandam hiek hʌ̈kꞌa nʌm hanʌmta,
sĩi hi hiek hʌ̈kꞌaba haajem kꞌʌʌnjö jãg pãachdëu kꞌõchagpierr nem wau nʌm gaaimua,
hʌʌi jaai paraamta deeum dʌ̈i sĩejemjöta tꞌʌnʌm.
¿Pãrau kꞌaugba nʌ,
pãachdëu mag hamau nem wau nʌmta dʌ̈i waum kꞌõchkꞌaawai jũrr Hẽwandamta hiseg nʌm?
Har sĩi hamach kꞌõchagpierr nem waaujem kꞌʌʌn dʌ̈ita kꞌapeerkꞌaawain jũrr Hẽwandam dʌ̈ita hiekkꞌõr paarpa nʌm.
5 Mamʌ Hẽwandamau maach hich dʌ̈ipaita naapim kꞌõsi sĩewai hich hiek gaaijã,
“Mua mʌch Hakꞌaar pãrag dee chirʌm chan sĩi parhoobam kꞌĩirjug hauwi magʌm nem kꞌaigbampa wau wënʌrramkꞌĩir kꞌabam” ha sim. (Zac 8:2; Dt 4:24; Ex 20:5)
6 Mamʌ Hẽwandam maach dʌ̈i hö wajaug kꞌitaawai,
mag wënʌrramkꞌĩirjã hichdëuta maach juag hoojem.
Hõor dʌ̈i hich mag kꞌitʌm higwi,
hichdëupai hich hiek pꞌãpitarr gaai,
“Har mʌjã higba hamach juapaaupaita wënʌrraajem haajem kꞌʌʌn chan mʌchdëujã higba chitʌm” ha sim.
“Magarrau hamach serbiibag kꞌap mʌchdëu nem jaau chirʌm wawaagjã mʌch juapadam hiigjem kꞌʌʌnan chadau,
mʌch garmuajã ham juag hoojem” ha pꞌãpijim Hẽwandamau. (Pr 3:34)
7 Magua Hẽwandamagta hidëu hichdëu hampierr hapibat pãach dʌ̈i.
Magnaa meperag pãach tꞌʌ haum hugua,
tꞌetꞌe tꞌierrkꞌabat.
Mag hichdëu pödba habaawai hirua pãar högkꞌawi pãar hogdʌ pʌaju.
8 Hẽwandamta pãach haig dʌ̈i pꞌẽs tꞌʌ̃r hahau habat;
magbaawai hichdëujã pãrau hich hig nʌm kꞌap pãar dʌ̈i hogdʌba nʌrraju.
Pekaúa jua pꞌʌisimjö sĩsidʌm kꞌʌʌn,
hirigta hidëu pãach pekau hʌpibat.
Pãar jãg Hẽwandamau kꞌõsimjö nem waum kꞌõsinaa hĩchab parhoob pãach kꞌõchagpierr nem waum hiigjem kꞌʌʌnjã,
hidëu hirigta pãach tꞌãar hajaug paapibat.
9 Pãach pekau pöm nʌm kꞌĩirjuwia,
gaai machgau hicharaucha bĩenaa hidawaa habat.
Jãg pãach pekau hee naajeewai honeenaa hiukꞌaau haajerr kꞌĩirjuwia,
jũrr hicharaucha hö jãsehne bĩewia hökꞌĩirjuu habat.
10 Deeu pʌaba muan pãragan,
pãach serbiibag kꞌap Hẽwandamagta chaigpa nʌmua pãach dau haug kꞌaugpibat ha chirʌm.
Mag kꞌaita pãar deeu hajaug paapʌ̈iwi mʌg hatag pawiajã tꞌumaam kꞌʌʌn dakꞌĩir hirua pãar hajaug pꞌëju.
Dich kꞌapeen jaauju kꞌaba nʌm
11 Hermanonaan,
hoob dich kꞌapeen hëugar hiek kꞌaigba hiekꞌamiet.
Mag dich kꞌapeen jaau simuan jũrr Hẽwandamau Moiseeg hich hiek pꞌãpitarr gaai dich kꞌapeen kꞌa kꞌõsi hapi jaau simta warag serbiibag pꞌënaa hichdëuta kꞌapcha sim ha sim.
Mag sim haiguin mag hiek gaai jaau sim kꞌãai hich hiekta hajapcha sim ha sim.
12 Mamʌ chadcha kꞌaita hich haar hauju wa kꞌaita hisegju ha jaauju wounan hãbpaita sim;
ma Hẽwandamau.
Hich mag Hẽwandamauta mag dich kꞌapeen daupii hapi jaau sim leijã deetarr haawai,
¿hichdëuta kꞌapcha sĩebá?
Magtarrta,
¿jãgwi maach hagdaujöpai tꞌʌnʌm kꞌʌʌnauta dich kꞌapeen jaauju haai nʌ?
Dich juapaata tꞌö hiekꞌaju kꞌaba nʌm
13 Pãar har sĩi pãachdëu nem waum haig nem waaujem kꞌʌʌn,
mʌ hiek hũrbat:
Pãar hiekꞌaawai,
“Hĩs wa nan kꞌãijã maach chum deeum pꞌöbör hee wëtwi jũrr jamta año hãb pꞌidkꞌaju” ha hiekꞌaajem,
“pꞌatkꞌon pöm ganaag.”
14 Mamʌ mag nʌm chan pãach mag hiekꞌatarr noramjã hagtꞌa monakꞌa naaju wa ya meewi naaju kꞌãijã kꞌaugba nʌmta mag hiekꞌaajem.
¿Pãrau jʌʌntꞌumie bau wëjöm hooba haajẽ?
Mag bau wëjoowi deeu nʌʌpai hawi hoowai,
¿chukkꞌu tꞌʌnaaba haajẽ?
Maachin jãgta kꞌitꞌëem;
maadëu hiwiir hãbmuajã dich tꞌõju hed kꞌaugbam.
15 Jãg pãach juapaaupaita nem tꞌum waaujemjö hiekꞌaju kꞌãai,
¿jãgwi pãrau sĩi,
“Maach Pör Hẽwandamau kꞌõsnaa maach monakꞌa wai simʌn,
maachdëu kꞌĩirju nʌmjö wauju” haba haajẽ?
16 Pari magba pãrau chan pãach dajẽkꞌu kꞌitꞌëemjã kꞌĩirjubanaa,
hökꞌar naspawi nem waujupata kꞌĩirjuwia,
pãachta warag tꞌö hiekꞌaajerram.
Jãg dich juapaata tꞌö hiekꞌa nʌm chan Hẽwandamau kꞌõchkꞌaba sĩerrʌm,
hichta tꞌö hiekꞌaju haai nʌm tꞌö hiekꞌaba haawai.
Jãg nʌm kꞌʌʌn chan hamach mag nʌmjã hoob pãrau Hẽwandamau kꞌaugbamjö sĩi kꞌĩir hokꞌoopʌ̈iju hamiet.
17 Pãadë hũrbat:
Nem hajapꞌa haju haai sim kꞌapꞌʌ simjã wauba simʌn,
magan mag sim haigjã warag Hẽwandamau hoowai pekaukꞌa höbër sim.