Hãba Jesús gaaita dich kꞌĩirjug sĩuju haai nʌm
12
Mag warrgarm kꞌʌʌn jöoin kꞌapan Hẽwandamau nem jaau sim chadcha haju hʌ̈kꞌa narr gaaimua hamau nem waumatarr kꞌapꞌʌ naawai maachin sĩi kꞌapꞌig wëtumjö warag naagta wëtju,
pekau waujujã kꞌĩirjuba ni bʌ̃ʌr habarm gaaimua Hẽwandamau maachig waupi jaau simjã waubam haba.
Magju kꞌãai dichdëu nem waum kꞌõsimpai wauju kꞌĩirju nʌm gaaimua pöd Hẽwandamau waupi simta wauba kꞌãijã ham hugua,
magʌm kꞌĩirjugta warre tꞌum hisegju haai nʌm.
Magba hakꞌiin magʌmua maach bʌ̈ gaai pʌʌrbaadëpꞌʌmjö haawai pöd Hẽwandamau kꞌõsimjö habaju.
Kꞌajëe hamkꞌĩirjö maach na nem hinag pöm tꞌʌnaawiajã magʌmʌgjã hooba,
2 hãba Jesús gaaita dich kꞌĩirjug sĩuju haai nʌm.
Hichdëuta warrjã hʌ̈u maachig Hẽwandam hiekjã hʌ̈kꞌapiwi mʌg hatagjã parta hʌ̈kꞌa naajim hapibaju,
hich Hẽwandamau maach dʌ̈i wauju jaautarr tꞌum chadcha hoopiju haawai.
Hich Jesuuta chi kꞌaigbacharam kꞌʌʌnjö pakuls gaai hʌdʌraa hich tꞌõopibajieb,
chigagjã higba,
mag hich tꞌõopibarmua hõor peerdʌ hatꞌaawai hichpa honee hich mag sĩerraju kꞌapꞌʌ sĩerr haawai.
Hichta hĩchab hich Haai jup sim kꞌu juupjem gaai dʌ̈i hi juachaar garcha hãba jupimawi hich mag sĩerrʌm.
3 Magua,
kꞌar pãach kꞌa tꞌeeg chukꞌunaa kꞌa honeg chukꞌu nʌm haig kꞌĩirjubat,
jãga Jesuujã hõor kꞌaibagkꞌam kꞌʌʌn jua machag kꞌĩu hãwatjĩ.
Hichdëujã maach kõit magtarr haawai pãach pꞌitꞌurg haawaijã magʌm gaaimua hoob “Jãg chan mua tag pödbam” hamiet.
4 Pãar dʌ̈i chan hagtꞌa mag maach Pör Jesús dʌ̈i harrjöcha kꞌaba naawai hajués nem kꞌaigbam waupi nʌm waubam paarjã hagtꞌa hõrau pãar kꞌëchba nʌm.
5-6 Mamʌ mag hi dau haug wautarrjöcha kꞌaba nʌmta,
Hẽwandamau hich hiek gaai maach wawí simjã ya pãrau kꞌĩir hakꞌoo wai nʌm.
Pãadë hũrbat hichdëucha hich hiek gaai maach wawimamua hiekꞌatarr hiek.
Mag sim:
“Hiewaa,
muan mʌchdëu kꞌõsim kꞌʌʌnan nem kꞌaigba haawaijã hajapꞌata wawiejem;
maimua mʌch chaainkꞌabaadëm kꞌʌʌn gaaijã mas deejem,
mʌch dakꞌĩir kꞌaigba haawai.
Maagjeewai hiewaa,
mua pʌch gaai mas deewai,
wa sĩi pʌchig nem hagcha kꞌãijã jawaag pʌch dau haug waupiewai,
hoob hiseg chitam;
pʌch kꞌaigba habarm paar mua pʌchig meeukꞌa hiekꞌaawaijã hoob warag,
‘Mag pʌchdëu jaau simjö chan mua pödbam’ ha hiekꞌam” ha sim Hẽwandamau maachig hich hiek pꞌã sim gaai. (Job 5:17; Pr 3:11-12)
7 Maguata muan pãragan Hẽwandamau pãach gaai mas deewaijã sĩi kꞌĩu jʌmbat ha chirʌm;
maach hich chaain haawai hirua maach dʌ̈i magju haai sim.
¿Pãrau hoowai chaainau nem hãrbarm paar chi dënnaanau wʌba haajẽ?
8 Mamʌ pãrau hoowai pãachdëu nem kꞌaigba wau nʌm paarjã Hẽwandamau bʌ̃ʌrjã pãar chig haba ni wawijã wawiba sim kꞌai,
magan pãar chan hich chaain chaar kꞌaba haawaita mag hirua sĩi pãrag hoobamjöo sim.
9 Pãrau kꞌapꞌʌ nʌm,
warr maach daii haawai,
maach dënnaanau maach wʌawai wa wawí kꞌãijã wawiewai,
maadëu chadcha ham hökꞌö haajeejim.
Maagjerrta ¿jãgwi maach Haai hʌ̃gtꞌar simua maach dʌ̈i maagwai maadëu högkꞌabaju haai nʌ?
¿Hichdëuta maach hich haarcha höbërju hayaa hapinaa hich mag hiiu wënʌrrapiejem kꞌabá?
10 Maach dënnaanau maach daii haawai mag maach wawiejerran,
sĩi kꞌũchpai mʌg jẽb gaai nʌm hora dich hajapꞌa hamkꞌĩirpaita maach wawiejeejim,
hamachdëu hoowaijã magta chadcha hʌ̈u sĩewai.
Mamʌ Hẽwandamauta maach gaai mas waunaa maach wawí kꞌãijã wawí simʌn,
mʌg hatag pawiajã dich hajapꞌa hamkꞌĩrau;
hajapcharan hichjã hajapꞌa kꞌitaawai maachjã hichjöta hajapꞌa hapim kꞌõsi sim.
11 Hiin chadcha dich hiekꞌaa hũrbag gaaimua maach wʌawai chan hʌ̈u kꞌaba sĩejem;
maach gaai masi sĩejeeb mamʌ,
magʌm gaaimua hʌ̈u hiekꞌaa hũur kꞌaaugwain dich chitʌmpierr chitʌmjã hʌ̈u maach kꞌõinaa chitaajem.
Hẽwandamau nem jaau sim sĩi par jʌ̃gʌupai hũrju kꞌaba nʌm
12 Jãg pãach pꞌitꞌurg hau nʌm gaaimua tag pödbajujö sĩi kꞌa tꞌũu piu hũhũraamjönaa sĩi warag bʌ̈ duuijujö tꞌʌnʌmjã,
deeu hũwaai kꞌĩir hubʌnaa bʌ̈pajã hubʌ tꞌierrkꞌa nʌmjö kꞌa honee habat,
mag pꞌitꞌurg hau nʌmjã hʌ̈u hãwataag.
13 Magnaa hĩchab kꞌa tꞌũumjö durrum kꞌʌʌn daarjã hich Hẽwandamau kꞌõsimjö hajapꞌata nʌrrjëe habat,
bigaaum kꞌʌʌnaujã pãach hoowi hagjö hamkꞌĩir.
Pãrau magta hamʌn,
Hẽwandam dʌ̈i hajap kꞌaba nʌm gaaimua mag kꞌa tꞌũumjönaa bʌ̈ hãkꞌãraamjö nʌm kꞌʌʌnjã pãach hoowi deeu monaau nʌisimjö hamjã hĩchab pãachjö Jöoi dau na kꞌajapꞌa wënʌrraju.
14 Tꞌumaam kꞌʌʌn dʌ̈i kꞌõinaa wënʌrrajuuta kꞌĩirjunaa maach pekau paarpapijöjöom nem tꞌum warre hisegbapʌ̈it.
Magʌm nem tꞌum hisegwi hich Hẽwandamau kꞌõsimjö hi hatꞌeepai kꞌaba nʌm kꞌʌʌnau chan pöd hi haar höbërwi hi kꞌĩir hoobam.
15 Magam hugua Hẽwandamau pãach dʌ̈i hich garmua nem hajapꞌa ham hig sim chan hoob hʌdʌʌr hokꞌoopimiet;
ni hãbamʌgjã hoob pãach hee sĩi pakꞌër kꞌaigbamjö höbërpimiet.
Hʌdʌraa magta hapimʌn,
mag hoowi deeum kꞌʌʌnaujã hi dënjö haadeewai,
bigaaum kꞌʌʌn gaaipata warag bën hãkꞌãraamjö dʌrbabaadeewai,
hõor pöm Hẽwandam dʌ̈i hʌ̈u narr kꞌãijã kꞌaigba haju.
16 Pãach hee hiwiir hãbmuajã hoob dich hõor kꞌabam dʌ̈i chan kꞌapes hamiet;
hoob Hẽwandamau waupim kꞌõsimʌgta sĩi hoobamjö ham kꞌõchgau warr jöoingar Esaú harrjö hamiet.
Esaú hichta chi naam harr haawai hichdëuta hich haai nem tꞌum jʌ̃akꞌam;
mamʌ mag jʌ̃aju harrta sĩi jãsogau tꞌach tꞌëp hãbpaim dʌ̈i jũrr hich heeumʌgta hichdëu nem jʌ̃aju harr tꞌum tꞌʌsĩepʌ̈ijim hanʌm.
17 Maimua pãrau kꞌapꞌʌ nʌm,
jãgajĩ hagtarr kꞌur ya hich haai meegpaawai deeu hũwaai kꞌĩirju hauwi.
Hich haai juagam nem jʌ̃ag hirig hich bendiciepiewaijã jöoirau hirig hich bendición deebajim hanʌm,
hag nawe mag lenteja tꞌëp hãbam paar hisegtarr haawai.
Parii dauhi pömjã hãrjieb mamʌ,
pöd hich haai juagam nem jʌ̃aju kꞌaba hich mag sĩsijim hanaabá.
Magua pãraujã hoob Esauu hich bendición hokꞌoopitarrjö nem bʌ̃rʌʌm gaaimua Hẽwandamau pãachig nem deeju harr hokꞌoopimiet.
18 Keena,
pãadë hũrbat,
mua pãrag jaaukꞌim:
Hĩs mʌg Cristo gaaimua Hẽwandamau maach hich dënkꞌa hawaag maach dʌ̈i hiek deebarm chan warr maach jöoin dʌ̈i hiek deetarrjö kꞌaba sim;
hĩsimʌn hiek hiiuriu.
Warrcha Hẽwandamau maach jöoin dʌ̈i hiek deewain sĩi durrsĩ Sinaí hanʌm bʌ̈kꞌʌrrta wëtpi jaaujim haajem,
maigpaimuata hich hiekꞌa sim hũrmkꞌĩir.
Hamau hamachdëuchata maigmua hoo naajim hanaabá chi durrsĩ sĩi huurdʌ wëjömjö tꞌʌnʌmta sĩi hedjã kꞌĩssu tꞌʌnʌm;
mag nʌm dʌ̈i hed kꞌõorga sĩi pꞌũ tꞌeeg wë tꞌʌnʌm dʌ̈i maach nem hökꞌö pagtꞌʌm daujö pꞌʌrjẽer hahaukꞌamjã hoo naajim hanaabá.
19 Hamau maach kꞌãai hamach jʌ̃gʌucha chi trompeta hiekjã hũrnaa hich Hẽwandamcha hiekꞌa simjã hũr narr haawaita warre hamach tꞌãar heyaa jaaumam hũrwi tag hi hiekcha hũrmaaugau hirig,
“Aay Hẽwandam,
marau pöd pʌ hiekꞌa sim hãwatbam” hajierram hanaabá.
20 Kꞌani hamau hũurwai warre ham tꞌãar heyaata “Chijãg pãach nʌm haigpai naaba mʌg durrsĩ gaai bʌ̈ tꞌʌg sim wounan hichiita tꞌõob kꞌaba warre tꞌõopʌ̈iju haai sim nemchaai hawiajã,
mokou bar wai nʌmua wa tꞌutkꞌërëu kꞌãijã” ha hũrbaawaita mag jãpꞌierr naajim hanaabá.
21 Mag chadcha sĩi maach nem hökꞌö tꞌʌnarr haawaita hich Moiseeujã hĩchab,
“Mʌchjã jãpꞌierr hajaugau kꞌa duui chirʌmgui” hajim hanʌm.
22 Mamʌ hĩs hewag Hẽwandamau maach dʌ̈i hiek deewai chan hamagamjö sĩi mag warp durr bʌ̈kꞌʌrrpaimuata hich hiek hũrpi jaaubajim.
Maachin ya mʌig heegarwe Sión pꞌöbörpienau;
hajapcharan hʌ̃gtꞌar wëtju kꞌʌʌnma,
Hẽwandam pꞌöbör Jerusalén hee hich dʌ̈icha naaimaju kꞌʌʌn.
Maman Hẽwandam chognaan pöoma hamach kꞌapangau sĩi maadëu chi beerjujã kꞌaugba tꞌʌnʌm kꞌʌʌnauta Hẽwandamag jëeupꞌö tꞌʌnʌm.
23 Mam hʌ̃gtꞌarta hĩchab mag hiek hiiur deetarr gaaimua maach dënjö Cristo hiek hʌ̈kꞌawi hich chaainkꞌa tꞌʌnʌm kꞌʌʌn tꞌʌ̃rjã Hẽwandamau pꞌãkꞌa wai sim.
Hich mamta sim hich Hẽwandamjã,
maach tꞌumaam kꞌʌʌnau mʌig heegar haawai dichdëu haajerrpierr hagjö maach dʌ̈i nem hajapꞌa haju Jöoi.
Hichdëuta hĩchab hag nawe jöoin hich hiek hʌ̈kꞌa durrum hötarr kꞌʌʌn hakꞌaarjã hichjö hajaug paakꞌapʌ̈iwi hich dʌ̈i pꞌë wai sim.
24 Mam hʌ̃gtꞌar hich Jesujã dʌ̈i sim haarta maach tꞌʌ̃r sim,
har mag hiek hiiur deewai hich Jöoirau jaautarrjö chadcha hapieg hich bag hãrpitarr woun haar.
Maadëu kꞌapꞌʌ nʌm,
mag hi bag hãrtarr chan warr jöoingar Abel tꞌõowai bag hãrtarrjö kꞌaba harr haawai,
maach pekau chugpaawi Hẽwandam dʌ̈i maach kꞌõinaa hapieg hajim.
Mamʌ chi Abel bagau chan magba,
warag hich naamta hiekkꞌõr hee pʌajim Hẽwandam dʌ̈i.
25 Magua keena,
hĩs Hẽwandamau maachig jaau simjã hoob hasekasba hamiet.
Mag hĩs hichdëu maach dʌ̈i hiek dee simta warr maach jöoin dʌ̈i hiek deetarr kꞌãaijã hajapcha sim.
Magua pãadë hũrbat:
Sĩi Moisés maachjö mʌig heegarmkꞌa sĩerrau Hẽwandam hiek jaau kꞌitʌm hũrba harr paarjã chi hasekasba harr kꞌʌʌn Hẽwandamau sĩi par daúapai hooba ham gaai jua kꞌʌaba deejerr kꞌai,
hĩs mʌg hʌ̃gtꞌarmua hichdëucha maachig hiekꞌa sim hasekasba haawaijã hoob pãrau mag maachta hi jua heemua peerdʌju hamiet.
26 Hich mag Hẽwandam Sinaí durrsĩ gaai Moisés dʌ̈i hiekꞌa sim jaar hich hiekꞌa simua chadcha jẽbpata duuipijim hanaabá.
Mamʌ Hẽwandamau hich hiek gaai jaauwai,
“Deeu mua biek hãbpai mʌg jẽb duuipiju,
mamʌ mag duuibarm chan mʌg jẽbpai kꞌaba hedjã heem magweta duuipiju” ha sim. (Hag 2:6)
27 Mag hirua deeu biekdam hãbpai duuipiju ha simʌn,
sĩi kꞌajapꞌam hʌʌur chaar kꞌaba haawai,
magbarmua warre mʌg durr hoorpʌ̈iwi hedaujãjã chukꞌu hapʌ̈ijuuta jaau sim,
mag maach hi hagkꞌaju higwi.
Mamʌ pãadë hũrbat:
Hichdëu nem wautarr tꞌum hʌʌrppʌ̈iwiajã mag maach wëtju haar hichta chi Pörkꞌa sim durr chan bʌ̃ʌrjã chugpaba hich mag sĩerrʌm hiekꞌau.
28-29 Pãadë kꞌĩirjubat keen:
Mag Hẽwandam hiek hiruan maach kꞌaibagjã sĩi hõt hee pꞌaabapʌ̈imjö warre chukꞌu hapäaijem hanaawai,
mag nʌm dʌ̈i hĩchab hiruata durr jʌ̃a chirʌm chan bʌ̃ʌrjã chugpaa kꞌaugba hich mag sĩerraju hanʌm durrta maach pꞌë hauju hanʌpí,
hirigta hʌ̈u hajim hanaa warag tꞌãar honee jëeuju keena,
hichdëu hichig jëeupiejemjö,
hi dau na nem kꞌaigba waujujã hökꞌö.