Melquisedec pꞌadkꞌa sĩerrarrjö Jesuuta hich mag Pꞌadkꞌa sĩerrʌm
7
Mag maach Pör Jesucristo Melquisedecjö sim ha chirʌmʌn mʌgau:
Maach jöoin Abrán kꞌararr hagtꞌa hʌ̈u pʌʌrba kꞌitʌm jaar,
Melquisedecta pꞌöbör Salem hanʌm heem rey hanaa hĩchab pꞌadkꞌa sĩejim haajem,
hich Hẽwandam cha hʌ̃gtꞌaa pꞌuu nʌmua pꞌadkꞌapitarr.
Mag jaar biek hãb jöoi Abrán reinaan dʌ̈i wërbʌwi hich garmua reinaan pödpʌ̈iwi hurum hee,
chi Melquisedec hi kꞌĩirpꞌee mawi hãba tꞌẽubaimam haig,
hi bendiciemamua hirig,
“Hĩsmua hatag hʌ̈u pʌ Hẽwandamau heeg hoo wai chitaju” hajim hanaabá chi Abranag.
2 Magbaawai Abranau mag reinaan dʌ̈i wërbʌwi hichdëu ham pödpʌ̈iwi,
ham juagam nem pꞌë hurarr heem chi décima parte deejim haajem chi rey Melquisedeeg.
Mag rey tꞌʌ̃r Melquisedec haawai,
“tꞌumaam kꞌʌʌn dʌ̈i hagcha nem waaujem rey” haawaiu.
Mag chi pꞌöbör tꞌʌ̃r Salem haawai,
maach meúan “kꞌõinaa” ha simʌu.
Mag “kꞌõinaa” hanʌm pꞌöbör heeta reikꞌa sĩerr haawai chi Melquisedec higwia hõrau “hõor kꞌõinaa pꞌë wai sĩejem rey” haajeejim.
3 Hẽwandam hiek pꞌã sim gaai bʌ̃ʌrjã jaauba sim,
kꞌai hajĩ hi haai wa kꞌai hajĩ hi hãd,
bʌ̃ʌrjã ham jöoinjã jaauba sim.
Hagjö bʌ̃ʌrjã hi tꞌaabatarrjã jaauba,
ni hi meetarrjã jaauba sim.
Hajapcharan mag pꞌadën peer Hẽwandam Hiewaa Cristo dʌ̈i hagjöota sim;
maguata hichjã Cristojö hich magta pꞌadkꞌa sĩerrajim.
4 Pãadë hũrbat jãga sĩejĩ Melquisedec:
Hí chan sĩi parhoobam pꞌad kꞌabajim.
Mag nʌm dʌ̈i hĩchab chi Melquisedecta jöoi Abrán kꞌãaijã hʌ̃rpai sĩerr haawai chi Abranau,
hichjã chi tꞌetꞌem harr hãba,
mag reinaan dʌ̈i wërbʌwi hichdëu gan haumarr heemjã hirig chi décima parte deeb kꞌaba deejim haajem.
5 Pãrau kꞌapꞌʌ nʌm,
Moiseeu ley pꞌã pʌarr gaai jaauwai,
Levinaanta pꞌadnaankꞌa nʌm kꞌʌʌnaun,
tagam kꞌʌʌn hamach kꞌapeen israelnaan tꞌum jöoi Abrán chaain hewagam kꞌʌʌnkꞌa nʌm gaaimua wir haig hamach kꞌodnaan hãba,
hichiita hamau nem wai nʌm heem chi décima parte hamag jëeub kꞌaba jëeuju haai naajim haajem.
6 Mamʌ chi Melquisedec Levinaan tꞌʌ̃r heem kꞌaba harr haawai chadcha Moiseeu jaautarrjö hich paatëm chi décima parte jëeuju kꞌaba sĩejim jöoi Abranag.
Mag pꞌadkꞌa sĩerrjã Levinaan kꞌaba sĩejieb mamʌ,
hichiita Abranag jëeubaawai jöoirau deejim haajem hich dën heem chi décima parte.
Mag Melquisedeeu hi bendiciewai,
ya Hẽwandamau hag nawe hich bendicietarr hãba,
Abranau hʌdʌraa deeu hich bendiciepijim hanaabá.
7 Maadëu kꞌapꞌʌ nʌm,
chi hich garmua warm bendicii simta chi bendición hau sim kꞌãaijã hʌ̃rpai sim.
Ham mag narr haig,
¿kꞌaíu mag Melquisedecta Abrán kꞌãaijã jua heegpai sĩejim habarju?
8 Chadcha mʌig heegar chi décima parte jëeujem kꞌʌʌnan hĩchab maachjö dajẽkꞌu deetarr kꞌʌʌnau;
mamʌ Hẽwandam hiek chi pꞌãm gaai Melquisedec jaau simʌn,
chi hiwamta jaau sim,
bʌ̃ʌrjã meejimjã haba.
9 Mag Abranau Melquisedeeg chi décima parte pꞌaagwai hewag pawi Levinaan kꞌaju kꞌʌʌn hagtꞌa tꞌaababa naajieb mamʌ,
ya warre ham kõitpata pꞌagbapʌ̈imjö hajim.
Magua hĩs hewag pawi hoowaijã hamach paarmua chi décima parte jëeuju kꞌʌʌnaupata warre Melquisedeeg pꞌagjierram haju haai nʌm,
ham tatꞌöoyau ham kõit pꞌagtarr haawai.
10 Chadcha mag Melquisedeeu Abrán kꞌĩirpꞌee mawi hi bendiciewai chan hagtꞌa chi Levinaan hãbjã chukꞌu hajieb mamʌ,
hichí hich gaaimuata hewag pawiajã makꞌʌʌn Levinaan paarpaju hajim.
Magta,
hich Melquisedecta chi Abrán kꞌãaijã hʌ̃rpai sĩerr haawai hichta hĩchab Levinaan kꞌãaijã hʌ̃rpai höbër sim.
11 Ya hag kꞌur hewag nassi pawi Hẽwandamau Moiseeg ley deewiata chi Levinaanjã pꞌadnaankꞌa nʌisijim.
Chi Levinaan heem pꞌadkꞌa narr kꞌʌʌn,
nacharam pꞌad Aarón kꞌararr hag chaain hewagam kꞌʌʌn hajim.
Mamʌ makꞌʌʌn pꞌadnaanau mag ley gaai jaau sim hʌʌrkꞌa nʌm kꞌʌʌn hajaug paajerr hakꞌiin,
Hẽwandamau deeum pꞌad hich Hiewaa makꞌʌʌn kꞌãaijã hajapcharam pʌ̈ibakꞌam.
Mag hirua pʌ̈itarr chan Aaronjö kꞌaba,
hag kꞌãaijã hajapcha Melquisedecjömta pʌ̈ijim;
ma hich Jesucristo hajim.
12-13 Mamʌ Hẽwandam hiek pꞌã sim gaai jaauwai,
mag pꞌad hiiur,
Cristo,
Levinaan kꞌod kꞌaba Judanaan heemta höbërju hatarr haawai,
chadcha hich magta hajim,
mag Judanaan heem chan pꞌad hãbjã höbërba haajerrta.
Mag Cristo pꞌadkꞌabaadeewai Levinaan heem pꞌadnaan tag serbiiba hapꞌöbaadëjim.
Magbaadëm dʌ̈i hĩchab Cristoou hiek hiiur jaaubaadeewai mag ley warrgarm pꞌadnaanau hʌʌrkꞌapiejerrjã tag maadëu nem higba haadëjim.
14 Mag pꞌadnaan kꞌapiewaijã,
mag Judá chaain hewagam kꞌʌʌnag chan pꞌadnaan kꞌaju haai nʌmjã haba harr haawai,
maadëu kꞌapꞌʌ nʌm,
hãba maach Pör Jesucristo hich happaita Judanaan heem pꞌadkꞌa höbërjim.
15-16 Mag pꞌad hiiur Hẽwandamau maach hatꞌee pʌ̈itarrjã sĩi mag ley nachgarm gaai jaau sĩerrjö kꞌaba,
Melquisedecjö Levinaan kꞌod kꞌaba simta bëetarr haawai,
merag chukꞌu sim,
chadcha magbarm haig mag hich pierrumua warre chi pꞌadnaanau waaujerr pꞌidagjã ya tag wauju kꞌaba haadëm dʌ̈i chi leijã tag sĩi warramjö kꞌaba sĩsim.
Hirua chadcha cambieju haai sĩejim,
hí mag makꞌʌʌnjö kꞌũchpai pꞌadkꞌawi meeg hatꞌee kꞌaba hich mag meejã meeba pꞌadkꞌa sĩerraagta bëetarr haawai.
17 Hí mag hichta hich mag pꞌadkꞌa sĩerraju higwi,
Hẽwandamau hirig,
“Pʌʌn hich jãg Melquisedec pꞌadkꞌa sĩerrarrjö,
hich mag pꞌadkꞌa chitʌm hiekꞌau” hajim. (Sal 110:4)
18 Chadcha magta Moiseeu ley deetarr gaai pꞌadnaan kꞌapiju jaau sim leijã warre Hẽwandamau chaaur hausĩubarmjö hajim,
hõor peerdʌ hawaagjã serbiiba sĩerr haawai.
19 Mag leíu pöd hõor hãbjã Hẽwandam na hajaug paa hauba haajeejim.
Mamʌ ya hĩs Cristo maach kõit hiekꞌaajem chaar wai nʌm gaaimua maadëu kꞌapꞌʌ nʌm,
ya hĩs chan tag warramjö kꞌaba sim;
hĩsin Hẽwandamau maach hich haar höbërju hayaa hapinaa maach dakꞌata sĩejem.
20 Mag Moiseeu ley pꞌã pʌarr gaai jaau simjö Levinaan pꞌad kꞌapiewai chan Hẽwandamau bʌ̃ʌrjã juraa hiekꞌaba,
sĩi ham haaijã pꞌadnaan harr haawaita hich mag pꞌad kꞌapiejeejim.
21 Mamʌ Hẽwandamau maach Pör Cristoog pꞌad kꞌapiewai chan magba,
hichdëuchata hich tꞌö hiekꞌamamua Cristo higwi,
“Pʌʌn hich jãg pꞌadkꞌa chitʌm hiekꞌau” hajim.
“Mʌchdëuta mag juraanaa hiekꞌa chiraawai naspawiajã mʌ mag hiekꞌabajim habam” hajim Hẽwandamau. (Sal 110:4)
22 Mag Jesuuta hich mag maach kõit hiekꞌaajem pꞌadkꞌa sĩsierr haigmua,
hichdëuta chadcha kꞌap hapiejem,
hĩs Hẽwandamau maach dʌ̈i hiek dee simta nacharam ley Moiseeg deetarr kꞌãaijã hajapcha sim,
mʌg hiek hiiuriuta Hẽwandam dau na maach hajaug paapäaijeewai.
23 Mag hagtꞌa Jesús bëeba haawain pꞌadnaan kꞌapanta hiigjeejim,
hãb meebaadëm jũrr deeumua hag pꞌidag haumaag.
24 Mamʌ mag pꞌad hiiur Jesús chan meejã meeba hich mag sĩerraawai,
mag hi meebaawai hãbmuajã hi pꞌidag hauwi jũrr maach kõit jëeujujã habam.
25 Maguata hich gaaimua Hẽwandam jʌr nʌm kꞌʌʌnan,
hirua peerdʌ haub kꞌaba peerdʌ hauwi hich mag hich dënkꞌa wai sĩsiejem.
Mag hichjã hich mag hiiu sĩerraawai hich hiek hʌ̈kꞌa nʌm kꞌʌʌn kõitjã hich mag hichdëuta Hẽwandamag jëeu nʌrraju.
26 Magua hichta chadcha maachdëu hig narr pꞌad kꞌabahab,
maach kõit hiekꞌaajem chaar.
Hich chan nacharam kꞌʌʌnjö kꞌaba haawai bʌ̃ʌrjã pekau chukꞌu kꞌitʌm;
kꞌaibagjã chukꞌu,
ni bʌ̃ʌrjã chikꞌam kꞌaigba hajöjöopaijã kꞌaba,
maachjö pekau pömkꞌam kꞌʌʌn heemjã kꞌaba sim.
Mag sĩewai hichta nem tꞌum hʌ̃gtꞌarm magwe tꞌʌnʌm kꞌãaijã hʌ̃rpai hapijim Hẽwandamau,
hich dʌ̈i hãba.
27 Magba haawai hi bëeju na pꞌadnaan tꞌʌnarr kꞌʌʌnaun hed hëepierr nemchaain kꞌëchnaa nacha hamach pekau kõit jëeuwiata jũrr hõor pekau kõitjã jëeujeejim.
Mamʌ Jesuu chan hamjö kꞌaba haawai,
nemchaainjã kꞌëkꞌëch haba,
hichta biek hãbpai hʌdʌraa hõor pekau kõit hich tꞌõopijim.
Mag biek hãbpai hichta tꞌõopitarrau ya tag hõor pekau kõit nemchaain tꞌõoju kꞌaba haadëjim.
28 Warran Moiseeu ley pꞌã pʌarr gaai jaau simjö pꞌadnaan kꞌapieg jʌr haauwaijã maachjö pekau pöm kꞌitꞌëe harr kꞌʌʌnta jʌr haaujeejim.
Mamʌ mag ley jöoi deetarr kꞌur nassi pawi Hẽwandamau hichdëupai hich gaai juraanaa hich Hiewaa bʌ̃ʌrjã pekau chukꞌu kꞌitʌmta tꞌumaam kꞌʌʌn Pörkꞌapinaa maach kõit hiekꞌaajem kꞌapitarran,
mʌg hatag pawiajã hichta pꞌad chi hajapcharamkꞌa sĩerrʌmua dajẽgjã dajẽgba hich mag maach kõit hiekꞌamkꞌĩir hajim.