FILEMÓN
Pabloou Filemonag hẽsap pꞌã deepʌ̈itarr
Salud
1
Filemón,
¿jãgpai chirʌ́?
Mʌʌn Pabloou.
Maach Pör Jesucristo hiek jaau chirʌm gaaimua preso chirʌm.
Mag preso chirʌmuata pʌrʌg mʌg hẽsap pꞌã deepʌ̈i chirʌm.
Pʌjã maar dʌ̈i maach Pör Jesucristo hiek jaau nʌm gaai hogdʌba kꞌitaawai,
maach hermano Timoteo dʌ̈imua muata pʌrʌg saludaa chirʌm.
2 Mʌg hẽsap gaai mam hĩchab salud:
maach hʌ̃pꞌʌi Apia hatꞌee;
Arquipo,
maach hipierr dʌ̈i hogdʌba maach Hẽwandam hiek jaau kꞌitaajem hatꞌee;
maimua hĩchab chi hʌ̈kꞌa durrum kꞌʌʌn tꞌum pʌ di haig hãba biirdʌwia Hẽwandamag jëeujem kꞌʌʌn hatꞌeejã hagjö salud deepʌ̈i chirʌm.
3 Maach Haai Hẽwandamag jëeunaa hĩchab maach Pör Jesucristoogjã jëeu chirʌm pãar kõit,
pãar hogdʌba tꞌʌa wai wënʌrrʌm dʌ̈i hĩchab pãar kꞌõinaa wai wënʌrramkꞌĩir.
Filemón gaaimua Pablo honee hatarr
4 Filemón,
Hẽwandamag jëeu chirʌm haig mʌchdëu pʌ kꞌĩirju hatꞌaawai warag pʌ higwia hirig hʌ̈u hajim ha chiraajem.
5 Mua chadcha hirig hʌ̈u hajim haajem,
mʌchdëu hũurwai pua tꞌum Hẽwandam hiek hʌ̈kꞌa durrum kꞌʌʌnjã daupiinaa maach Pör Jesucristo dʌ̈ijã hubʌ chitʌm ha hũurjeewai.
6 Hĩchab mua pʌ kõit Hẽwandamag jëeu chiraajem,
cha maachdëu hʌ̈kꞌa nʌm hiek deeum kꞌʌʌnag jaaumam dʌ̈i pʌchdëupaijã jãga Jesucristo gaaimuata maachin Hẽwandam dʌ̈i hʌ̈u wënʌrraajẽ ha tꞌumaa hajapꞌa kꞌap hamkꞌĩir.
7 Pua mag maach Hẽwandam hiek hʌ̈kꞌa durrum kꞌʌʌn tꞌum kꞌa kꞌõsi haajem ha jaau nʌm gaaimua,
mau chirʌm hãba,
pua hĩchab mʌ tꞌãar honee hapi sim.
Hʌ̈u nʌm hermano.
Puata hʌ̈u maach hermanonaan dʌ̈i hö hajapꞌa ham kꞌĩir jãsenkꞌa chirʌm gaaimua hamjã kꞌĩir honee durrum.
Onésimo kõit Pabloou Filemonag chaigpatarr
8 Mag pua tꞌumaam kꞌʌʌn kꞌa kꞌõsi haajeewai,
pʌch chog harr Onésimojã hagjö warm kꞌʌʌnjö pua daupii haju haai sim.
Cristoou hich hi jaaumkꞌĩir mʌ jʌr hautarr haawai mua pʌrʌg warre hi daupii habá ha jaauju haai chirʌm.
9 Mamʌ muata hajués pʌrʌg hi daupii hapi chirʌm ham hugua,
maach numijã hagdaujö chikꞌam kꞌa kꞌõsi nʌmjö hi kꞌa kꞌõsi hamkꞌĩir,
sĩi hikꞌõrjã kꞌaba pʌrʌg magam hig chirʌm.
Mʌ ya jöoiraa chirʌm.
Mag chirʌm hãba,
Cristo hiek jaau chitʌm gaaimua preso chirʌm.
10 Mag chirʌmuata pʌrʌg chaigpa chirʌm Onésimo kõit.
Hiita chadcha mua mʌch chaaijö wai chirʌm,
mʌch mʌg preso chirʌmuata hʌ̈u hirig maach peerdʌajem hiek hʌ̈kꞌapi hautarr haawai.
11 Warran chadcha Onésimo pʌ chog sĩi pʌ hatꞌee pꞌidkꞌaajem hajim.
Mamʌ mag sĩerrta pʌ haigmua dʌr mawi,
dʌ̈rrʌ̈ʌ pʌ hatꞌee tag pꞌidkꞌaba,
sĩi tag hich higpibajujö sĩsijim.
Magjieb mamʌ ya hiruajã maach dënjö Cristo hiek hʌ̈kꞌabaarwai,
mʌ mʌg chirʌm haigjã hʌ̈u dʌ̈rrcha hirua mʌ hoo wai kꞌërʌʌ hawia,
pʌ hatꞌeejã deeu hirua pꞌidkꞌaju mua kꞌapꞌʌ chirʌm.
12 Mag deeu pʌ chogkꞌa sĩeimamkꞌĩir,
hũmaai mua pʌ haar hi pʌ̈i chirʌm.
Mamʌ mag mua pʌch haar hi pʌ̈ibapäaiwai,
mʌchchata pʌch haar barbaimamjö hajapꞌa hi wai chirsí pʌch dʌ̈i.
13 Mua chadcha mʌch haigmua hogdʌba hi wai chiram kꞌõsi chirʌm,
mʌg maach peerdʌajem hiek jaau chitʌm gaaimua preso chiraawai mʌchdëu nemdam hiigwaijã hichdëuta hau deebarpꞌʌ hamkꞌĩir.
Mua kꞌapꞌʌ chirʌm hĩchab,
pua mʌ hoon bëem kꞌõsi sim.
Mamʌ warpꞌagkꞌam gaaimua pöd bëeba haawai mua jũrr hichta mʌch dʌ̈i sĩepim kꞌõsi chirajim,
mag hirua pʌ kõit mʌ hatꞌee nem wau simta jũrr pʌchdëuchata wau simjö hamkꞌĩir.
14 Mamʌ mau mʌch happai hagtꞌa pʌ hiekjã hũr hauba chan mua mag jũrr hiita hajués mʌch chogjö wai chiramapꞌa chirʌm,
heeu dëgölp pua mag kꞌõchkꞌabaju kꞌãijã mua magbaadëju.
Magju kꞌãai pʌchdëuchata hirig pʌch kꞌĩrau jaaumʌn chadau,
mua hi mʌch haig wai chiraju.
15 Jãg Onésimo pʌ haigmua dʌrtarran,
jãan Jöoirau hich hiiu kꞌãijã jãgpijim,
deeu nassi pawia hũmaai pʌch haar petaawai deeu pʌch dʌ̈i hich mag hi wai chirsimkꞌĩir.
16 Mag pʌch haig wai chirsim chan ya tag sĩi pʌ chogpai kꞌaba,
ya hĩsin warram kꞌãaijã hajapchata sĩsim.
Hajapcharan hiin ya maach kꞌod chaardamau,
hiruajã hĩchab dʌ̈i maach Hẽwandam hiek hʌ̈kꞌa kꞌërsiewai.
Mʌch himeerba muan hi jãsene chirʌm.
Mamʌ puata mʌ kꞌãyaujã hʌ̃rcha hi jãsene haju haai sim.
Sĩi pʌch chog haawaipaijã kꞌaba,
hiruajã maach Pör Jesucristo hiek hʌ̈kꞌa sĩsiewaita hi daupii haju haai sim.
17 Magua mua pʌrʌg mag chirʌm:
Pʌchdëu kꞌĩirjuawai chadcha mʌjã pʌch kꞌapeer kꞌai,
magan Onésimo pʌch haar barm hedjã mʌchchata pʌch haar barbaimamjö honee hi baarpi hatꞌá.
18 Hirua pʌ dʌ̈i kꞌaigba hawia dëbpaar kꞌãijã pʌrʌg paraa sim kꞌai,
mʌrʌgta jëeubá,
mua hi kõit pꞌagpʌ̈iju.
19 Hoob kꞌĩirjum.
Muata pʌrʌg mʌch juadamaucha,
“Mua chadcha pꞌagpʌ̈iju” ha pꞌã deepʌ̈i chirʌm mʌg hẽsap gaai.
Mamʌ pua kꞌĩir heyaa haju haai sim,
dëbpaar chaar kꞌabam mamʌ mua Cristo hiek jaau chitʌm gaaimua pʌchdëujã Cristo hiek hũrtarr haawai puan mʌrʌgjã dëbpaar paar simjöta sim.
Mamʌ mua magʌmjã higbam.
20 Magau kꞌodam Filemón.
Puajã maach Pör Jesucristo hiek hʌ̈kꞌaajeewai,
Onésimo chig haba sĩi warag hi daupii wai chirsimkꞌĩir,
muata pʌrʌg chaigpa chirʌm hi kõit.
Mag pʌjã hĩchab Cristo dën haawai cha mua jaau chirʌmjö habá hi dʌ̈i,
magbarmua warag mʌchpata mʌ kꞌĩirdam honee hapieg.
21 Mua kꞌapꞌʌ chirʌm,
pua cha mʌchdëu jaau chirʌmjö haju.
Magua mua mʌg hẽsap pʌrʌg pꞌã deepʌ̈i chirʌm.
Kꞌapꞌʌ chirʌm hĩchab,
cha mʌchdëu jaau chirʌm kꞌãaijã hatcha pua hi haairaa haju.
22 Mʌ hatꞌee hĩchab didam jʌrwi hajapꞌa kꞌĩir kꞌaug kꞌërbá,
mʌch maawai hag hee chiraimaag.
Mua pʌrʌg mag chirʌmʌn,
jãg hʌ̈u pãachdëu mʌ kõit jëeu durrum gaaimua Hẽwandamau mʌchig pãar hoon mapiju kꞌapꞌʌ chiraawaita mag chirʌm.
Hãbmiecha salud deepʌ̈i narr kꞌʌʌn
23 Mʌ kꞌapeer Epafras hĩchab Jesucristo hiek jaau kꞌitʌm gaaimua mʌig mʌ dʌ̈i cárcel deg kꞌëraajemuajã pʌrʌg salud deepʌ̈i sim.
24 Mag tag hĩchab pʌrʌg salud deepʌ̈i nʌm:
Marcoou,
Aristarcoou,
Demas haajemua,
maimua Lucaaujã hagjö.
Mʌkꞌʌʌnauta dʌ̈i mʌ hipierr hogdʌba maach peerdʌajem hiek jaau durraajem.
25 Magdam jawaag hajim pʌrʌg mʌg hẽsap pꞌã deepʌ̈i chirʌm.
Mʌʌn maach Pör Jesucristoogta jëeu chiraajem pãar kõit,
pãar dʌ̈i hogdʌba hich mag pãar tꞌʌa wai sĩemkꞌĩir.
Hayoo kakë,
Pablo