Hẽwandam hõor dʌ̈i hajaug kꞌitaawaita maachin hʌ̈u peerdʌajem
2
Warran pãran pãachdëu nem kꞌaigba waaujerr gaaimua pöd Hẽwandam haar höbërju kꞌaba naajim,
sĩi pãach pekau heepaita narr haawai.
2 Pãraun sĩi Hẽwandam kꞌaugbam kꞌʌʌnau nem waaujemta waaujeejim,
har mʌig heegarpain hichta hʌ̃rpai sĩerrʌm kꞌõchagpierr,
hajapcharan dösãt hipierrma,
hichdëuta hõragjã warag Hẽwandamau nem kꞌõchkꞌabamta waupim kꞌõsi haajem hipierr.
3 Maarjã warran tꞌum hich magta naajim,
sĩi dichdëu nem waum kꞌõchagpierr;
nem magju habarmʌn parhoobam kꞌĩirjug dich kꞌĩirjug hee bëe nʌmta hagpierr waaujeejim,
warr tꞌaabaawaijã hich mag pekau heeta tꞌaabatarr kꞌʌʌn haawai.
Chadcha maach mag wënʌrrarr gaaimua maran sĩi parhooba tagam kꞌʌʌnjö Hẽwandam jua machag hãwatju haai naajim.
4 Mamʌ hʌ̈u Hẽwandamau hõor tꞌumaam kꞌʌʌn dau haug kꞌaug paraanaa hich garmua hõor kꞌõsi kꞌitaawai,
5 mag maach kꞌaibag gaaimua haubaju hayaa narrta hich jãg hichdëu deeu Cristo pꞌiriu hautarrjö maachjã hich haar hauwi hich mag Cristo dʌ̈i hãba wënʌrraju kꞌʌʌn kꞌapijim.
Mag Hẽwandam hõor dʌ̈i hajaug kꞌitʌm gaaimuata maachin hʌ̈u peerdʌwi nʌm.
6 Ya mag Cristo dʌ̈i hãba hich mag wënʌrraju kꞌʌʌnkꞌa naawai chadcha meewi narrta deeu pꞌiriu hautarrjö nʌm dʌ̈i ya hʌ̃gtꞌar hich dʌ̈icha hohoodö nʌmjöta nʌm.
7 Mag Hẽwandamau maachigta nacha Cristo hiek hʌ̈kꞌapiwi hich dënkꞌa hautarran,
hĩs hewag pawiajã jãga chadcha hichdëu maach kꞌõsi sĩ ha kꞌap hapinaa,
mag Cristo dënkꞌa nʌm gaaimuata chadcha hichjã maach dʌ̈i hajaug kꞌitʌm kꞌap hapieg hajim.
8 Pãran mag Hẽwandam hajaug kꞌitʌm gaaimuata hʌ̈u Cristo hiek hʌ̈kꞌawi peerdʌwi nʌm;
pari mag nʌm chan sĩi pãach kꞌĩrauta peerdʌju hẽkꞌatarr gaaimua kꞌaba,
hich Hẽwandamau hich garmuata pãar peerdʌ haum kꞌõsi harr haawaita hʌ̈u pãar peerdʌ haujim.
9 Hẽwandamau maach peerdʌ hau nʌm chan dichdëu nem wau nʌm gaaimua kꞌabam,
magba hakꞌiin magʌm gaaimuata peerdʌjim ha hiekꞌaju.
10 Mamʌ warrgarwe Hẽwandamau kꞌĩirju wai sĩerrjö hich hatꞌee mag nem hajapꞌa wau wënʌrramkꞌĩirta Cristo gaaimua maach peerdʌ hautarr haawai,
maadëun chadcha nem hajapꞌamta wauju haai nʌm;
pari majã dich peerdʌ haumkꞌĩir kꞌaba,
sĩi Hẽwandamau mag kꞌõsi sĩewaita mag wauju haai nʌm.
Cristo gaaimuata maachin hʌ̈u Hẽwandam dʌ̈i dau parii wënʌrrʌm
11 Keena,
judionaan kꞌabam kꞌʌʌn,
kꞌĩir heyaa habat.
Warr pãrau Cristo kꞌaugju naweran,
maar meeunau maachta mehëu tꞌʌʌ nʌm hawi pãar judionaan kꞌabam kꞌʌʌnan sĩi saak hoomjöta haajeejim,
maachjö mag dauchach chukꞌu nʌm hawi.
Pari mag nʌmʌn maachjã Hẽwandam dakꞌĩir pãarjö tꞌãar hãkꞌãrag sĩi maach hinaamjö nʌmta maagjeejim.
Mamʌ hĩsin,
magʌm gaaimuapai Hẽwandamau maach hauba haajem kꞌapꞌʌ naawai,
jãg sĩi Hẽwandam dʌ̈i hajapꞌa haag hawi jãg maach mor dauchach nʌm chan bʌ̃ʌrjã maadëu higbata sim.
12 Chadcha warr chan pãrau Cristo kꞌaugba naajim.
Maar judionaan heeta Hẽwandamau mag maach peerdʌajem pʌ̈iju jaautarr haawai mag Cristo gaaimuata hich haar maach hauju hayaa nʌmjã maraun kꞌapꞌʌ naajim.
Pari mag nʌm hee pãrau chan bʌ̃ʌrjã magʌm kꞌaugba,
ni maar jöoin dʌ̈i Hẽwandamau hiek deetarrjã kꞌaugba,
pãran sĩi deeum meu haawai mag Hẽwandamjã kꞌaugba,
ni hichdëu pãach peerdʌ haujujã kꞌaugba sĩi hokꞌoota wënʌrrajim.
13 Pari ya hĩs chan magba Cristoou maach tꞌumaam kꞌʌʌn kõit hich bag hãrpitarr gaaimua pãarjã hich dënkꞌa wai sĩewai mag pãar hokꞌoo narrta ya hĩsin chad maach tꞌum hãbata Hẽwandamau hich dënkꞌa wai sĩejem.
14 Maguata hĩsin Cristoouta maach kꞌõinaa pꞌë wai sĩejem,
chadcha maar meeun pãar meeun dʌ̈i kꞌĩet nʌmta hĩsin hichdëuta maach tꞌum kꞌod hãbamjö habapʌ̈im,
sĩi maach jãrr serrkau tꞌuur simjö sĩerrta kꞌʌt sĩewerbpʌ̈imjö habaawai.
15 Mag Cristoou hʌdʌraa hich tꞌõopibarmuata mag Moiseeu ley pʌatarr gaai nem kꞌĩir pogkꞌe hʌʌrkꞌapi simjã warre serbiiba hapʌ̈ijim.
Magta warr chan mag chikꞌamnagjã hooba hagdaujö dich cuenta nʌrrjëe harrta,
hõor hãbpaimʌg paapʌ̈iwi warre chi hiiunkꞌapʌ̈ijim.
Magbarm haig hĩchab ya tag warramjö kꞌaba,
maach heepaijã kꞌõinaa nʌisijim.
16 Mag pakuls gaai hich tꞌõopibarmuata hĩchab mag maach kꞌĩir hau wënʌrrʌmjö narrjã Cristoou warre hajaug paapʌ̈iwi Hẽwandam dʌ̈ijã kꞌõinaa hapinaa hõor hãbpaimjö hapijim.
17 Mag Cristo bëetarran mag maach kꞌõinaa wënʌrraju tꞌumaam kꞌʌʌnag jawaanta bëejim:
Har pãar Hẽwandam kꞌaugbagau hi warp narr kꞌʌʌnag jawaan,
maimua maar meeun pãar kꞌãai bʌ̃ʌr hi kꞌapꞌʌpai narr kꞌʌʌnagpa jawaanta bëejim.
18 Mag maach tꞌum hi hiek hʌ̈kꞌa nʌm kꞌʌʌnaun,
hich hãbam Hẽwandam Hakꞌaarpaita wai naawai,
Cristo gaaimuata hʌ̈u hĩsin judionaan wa judionaan kꞌaba hawiajã Hẽwandam chi Haai dʌ̈i kꞌapeerkꞌa wënʌrrʌm.
19 Mag hi dʌ̈i kꞌapeerkꞌa naawai pãar chan ya sĩi chikꞌam durr gaai jooba nʌmjö kꞌaba,
hĩsin ya sĩi dich meeun hapꞌa hãbam dö hee jooba nʌmjöta nʌm.
Maguata mʌg maach Hẽwandam hõorkꞌa tꞌʌnʌm kꞌʌʌnan tꞌum hagdaujöpai nʌm nem tꞌumaam hatꞌee,
ya hi chaainkꞌa nʌm gaaimua hãba kꞌodkꞌa tꞌʌnaawai.
20 Pãran hĩchab sĩi Hẽwandamau hich hatꞌee di hëwaag dipá jʌr wai simjöta nʌm.
Hich Jesuucha hich hi jaaumkꞌĩir jʌr hautarr kꞌʌʌn warrgar hĩchab Hẽwandam hi jaaujerr kꞌʌʌn dʌ̈i chi dipákꞌa nʌm.
Maagwai pãar jũrr chi dipá daígkꞌa naawai makꞌʌʌn hʌ̃rta chi hëu simua bʌ̈rkꞌa harrum.
Maagwai hag heegar chi big pömaam chi dihãdkꞌa sim hich Jesucristoou.
21 Hajapcharan jãg di hëu nʌm haig pa jʌ̃kꞌapʌ̈pʌ̈igmampierr warag hʌ̃gtꞌaag bãau hahaug maajemjöta nʌm maachjã.
Hõrau warag Cristo hiek hʌ̈kꞌamampierr hichdëuta hichdëu kꞌap maach gaaimua mag di hëu harrumjö simjã warag nem pöm bãau harrum,
hich sĩejem dikꞌa hawaag.
22 Mag pãar judionaan kꞌabam kꞌʌʌnjã Cristo dënkꞌa naawai maach tꞌumaam kꞌʌʌnta hãba Hẽwandam Hakꞌaar sĩejem dikꞌa nʌm.