Hagdaujö dich kꞌapeen juag hooju haai nʌm
6
Hermanonaan,
pãachdëu hoowai hãb kꞌãijã Cristo gaaimua maach kꞌodkꞌa kꞌërʌm pekau hee buudimam hoobaawai,
har chi Hẽwandam Hakꞌarau pãachig nem jajaaukꞌampierr haajem kꞌʌʌnau hi kꞌaigpërbat.
Mag deeu hi kꞌaibag heemua höbeer hauju hẽkꞌa nʌm haigjã hitꞌũu wawimamuata hi wawipetat,
deeu hajaug hee sĩsimkꞌĩir.
Mamʌ mag pekau hee burr nʌm kꞌʌʌn wawiewaijã kꞌĩir kꞌapꞌʌ habat,
heeu pãachpata dʌ̈i hagjö hadukꞌam.
2 Pãach hee hãb kꞌãijã problema paarpaawai,
warag pekau hee burrm hugua,
hoob hirig hoobamjö hamiet.
Pãrau chadcha hathaba magta ham kꞌaigpërju hẽkꞌa durrumʌn,
Cristoou dich kꞌapeen kꞌa kꞌõsi hapitarr haawai chadcha magta nʌm.
3 Hãb kꞌãijã sĩi hatcharagaupai hichta warm kꞌʌʌn kꞌãaijã hʌ̃rʌʌcha sim ha sim wounan,
hichdëupaita hich kꞌũgur sim,
hich mag hiekꞌa sim gaaimuapai serbiiba simta mag hiekꞌa sim merag chukꞌu sĩewai.
4 Magju kꞌãai chikꞌamnau nem kꞌaigba wau nʌmta heerpanaa jaauju kꞌãai,
pʌchpaita kꞌĩirjubá,
chadcha Hẽwandamau kꞌõsimjöta wau sĩ ha kꞌap haag.
Mag hirua kꞌõsimjöta nem wau simʌn chad honee haju hawiajã magʌm gaaimuata honee haju haai sim.
5 Mua mag dichdëu nem wau nʌmta hʌ̈u sĩ wa hʌ̈u kꞌaba sĩ ha kꞌap haju haai nʌm ha chirʌmʌn,
Hẽwandam kꞌĩirpꞌee dʌnʌʌutkꞌabaimam hedjã chikꞌamnau nem wautarrta hirua maachig jëeuba dichdëu nem wautarrta jëeumaju haawaita mag chirʌm.
6 Mʌg maach peerdʌajem hiekta bën dö nʌmjö kꞌaug nʌm kꞌʌʌnaun hamachdëu nem wai nʌm heemjã mag hamachig jaau nʌm kꞌʌʌnag deeb kꞌaba dedee haju haai nʌm.
7 Pãachta Hẽwandam dau na chi hajapcharam kꞌʌʌn hawi hoob wir haig pãachdëupai pãach kꞌũgurmiet.
Mʌig maach hagdaujöm kꞌʌʌn happain pãrau hõor kꞌũgurwiajã Hẽwandam chan pöd hãbmuajã kꞌũgur haubam.
Pãrau kꞌapꞌʌ nʌm,
maadëu nem jĩirwain deeum nemjĩir höbërba,
dichdëu nemjĩirtarr kꞌĩirta höbeerjem.
8 Hich hagjöta sĩebahab mʌig heegar haawaijã:
Maadëuta dichdëu kꞌõchagpierr parhooba nem waaujerr kꞌai,
mag dichdëu nem kꞌaigbam waaujerraupaita Hẽwandamag maach haupibaju.
Pari magba Hẽwandam Hakꞌarau kꞌõsimjöta hagpierr nem waaujerr kꞌai,
hich hag Hẽwandam Hakꞌaraupaita hĩchab hich mag maach hich dʌ̈icha hʌ̃gtꞌar wënʌrrapiju.
9 Maguata maach chan mʌg nʌm haig kꞌusëukꞌa pꞌöbaadëm hawi nem hajapꞌa wauju haai nʌmjã wauba hich mag sĩuju haai kꞌaba nʌm.
¿Jãgwi?
Chokꞌõgba magta nem hajapꞌam hapꞌa wau wënʌrrʌmʌn,
Hẽwandamau hoowai hichdëu magju hayaa ham hed mag nem waum kꞌõsi waaujerr jũrr maach dʌ̈i hagjö hʌ̈u haju haawaima.
10 Keena,
maguata muan pãragan,
hʌ̈uta dich kꞌapeen juag hooju haai nʌm haiguin tꞌumaam kꞌʌʌn dʌ̈ita hajapꞌa haju haai nʌm ha chirʌm.
Pari mag nʌm haigjã Cristo gaaimua maach kꞌodkꞌa tꞌʌnʌm kꞌʌʌn dʌ̈ita maadëu hʌ̃rcha hajapꞌa haju haai nʌm.
Pabloou hãbmiecha hõor wawimamua salud deepʌ̈itarr
11 Keena,
pãadë hoobat:
Ya höpʌ̈yaagpaawai mʌch juadamaucha pãrag mʌg hẽsap nem dau dapag pꞌã deepʌ̈i chirʌm.
12 Har jãg hajués pãrag hamach dënjö dich kꞌakꞌua dauchachpi jaau nʌm kꞌʌʌnaun,
sĩi hamach meeun dʌ̈i hiekkꞌõr haumaaugauta jãg nʌm,
mag hamach jöoin hiita pʌapi jaauba naawai Cristo pakuls gaai meerpꞌë tꞌõotarr gaaimua hamachdëu mʌ dʌ̈i nʌmjö hamach hẽudee hẽkꞌam hugua.
13 Pari mag nʌm chan mag dich kꞌakꞌua dauchachpi jaau nʌm kꞌʌʌnaujã hamachdëu ley jaau nʌm gayam tꞌumjã hʌʌrkꞌa hauba nʌmta mag nʌm.
Mag nʌmta hamach garmuan chad pãrag hichiita hamau jaau nʌmjö haju haai nʌm hanʌm,
mag hamach hipierr habaawai hamachdëu jaauwiata pãraujã jãg pãach mor dauchach wai nʌm ha hiekꞌaag.
14 Pari mua chan mag ham dënjö mʌch tꞌöba,
maach Pör Jesucristo chi pakuls gaai dau hapꞌʌʌ harrta tꞌö hiekꞌaajem.
¿Kꞌantꞌee mua mʌchdëupai mʌch tꞌöbaadëju?
Mag mʌch kõit pakuls gaai Cristo tꞌõtarr haawaita hĩs chan warr mʌchdëu nem waaujerrjã tag kꞌĩirjuba,
magʌm nem waumaaugau warag chi meemjöta chirʌm;
hajapcharan magʌm nem chan mʌ hatꞌee chukꞌumjöta tꞌʌnʌm,
ya jũrr Cristo dʌ̈ita chiraawai.
15 Mʌ naan par hamach kꞌakꞌua dauchachpi jaau tꞌʌnaaju.
Mag naab pari maachin dauchach chukꞌu tꞌʌnʌm kꞌʌʌn dʌ̈i hagdaujöpai nʌm Hẽwandam dau na.
Magarrau mʌch paarmuajã dʌ̈i balee sim ha chirʌmʌn,
Cristo hiek hʌ̈kꞌa nʌm gaaimua deeu tꞌaabatarrjö hi dënkꞌa nʌmʌn chad chadcha balee sim ha chirʌm.
16 Pãar tꞌum mag Cristo dënkꞌanaa hichdëu jaaumam hipierraa wënʌrrʌm kꞌʌʌn kõitta muan jëeu chirʌm,
kꞌõinaa hich jãg pãach heeg hoopaar hamkꞌĩir.
Maimua hĩchab tꞌum tagam kꞌʌʌnjã chadcha Hẽwandam chaainkꞌa tꞌʌnʌm kõitjã mua jëeu chiraajem.
17 Keena,
mʌ hajim mua pãrag jaaum hig chirarr.
Mʌigmua hatag chan ni hãbmuajã tag mʌchig mag dich kꞌakꞌua dauchachpi jaau nʌm hiek higpimapꞌa chirʌm.
Magʌm dauchachta higju kꞌãai,
Cristo hiek jaau chitʌm gaaimua hõrau mʌ pʌrnaa wʌ wai nʌmua pedpꞌëmarrta mʌch mor gaai chadcha dauchachjö wai chitʌm.
Jãgʌm hoo nʌm gaaimuata hõrau kꞌapꞌʌ haju haai nʌm,
mʌ chadcha hi chogkꞌa chitʌm.
18 Hermanonaan,
magdampai hajim mua pãrag jaaum hig chirarr.
Muan pãar kõit jëeu kꞌitaajem,
maach Pör Jesucristoouta hich jãg pãach hʌ̈u wai nʌrramkꞌĩir.
Hayoo keena,
Pablo