11
Mʌg mʌ hiekꞌabaadëm nau lököom dënjö pãach jʌ̃gaag kꞌaba kꞌãijã hiekꞌabapʌ̈imjã pãrau warag sĩi mʌ hiek hũrkꞌiin hʌ̈u hakꞌam.
2 Hẽwandam dau na chikꞌamnag pãach kꞌũgurpimaaugau pãach dʌ̈i mʌ nem hanem chitaawai muan pãragan,
hãba hʌʌirau hich jaai hauju dʌ̈ipai hiek dee wai simjö Cristo dʌ̈ipaita nʌisit ha chirʌm,
mag hich dʌ̈ipai naawai pekau chukꞌu harrjö pãach hich haar pꞌë haumkꞌĩir.
Pãrau magta hamʌn mʌchjã dʌ̈i honee chiraju maach Pör Jesucristo na.
3 Mua chan warrgarwe nemkꞌõriu Evaag sëukꞌawia kꞌũgur hautarrjö pãarjã hagjö sĩi parhoobam kꞌʌʌnau nem jaau nʌm hʌ̈kꞌam kꞌõchgau hʌdʌraa pãach kꞌũgurpiwia jũrr pãach kꞌĩirjug hãba Cristo gaai kꞌĩirju nʌmta hisegpimapꞌa chirʌm.
4 Jãga jãg parhoobam kꞌʌʌnau pãachig Jesús higwia hi hiek jaau nʌm hanʌmta mua jaaujemjö kꞌaba warag chaaurta jaau nʌmjã pãrau magʌmjã haba hʌ̈kꞌanaa,
Hẽwandam Hakꞌaar mua jaautarrjã wai nʌmta makꞌʌʌnau jũrr hi higwia chaauraa jaaubaicheewai majã hʌ̈kꞌa nʌ.
Magnaa hĩchab jãga jãg maach peerdʌajem hiek hanʌmjã chadcha hagjöojã kꞌaba simta pãrau bʌ̃ʌrjã magʌmjã haba hʌdʌraa pãachig jaaupi nʌ.
5 Hamachdëupain hamta Jesuu jʌr hautarr kꞌʌʌn chaar haawai mʌ kꞌãaijã hʌ̃rpai nʌm hanaawai pãrau hamau nem jaau nʌmta hʌ̈kꞌa naabma;
pãrau ham dʌ̈i mag naab pari mʌ chan ham kꞌãyau sĩi heegpai kꞌaba chirʌm.
6 Tale sĩi hiekꞌaju haig chan nem meu kꞌaug kꞌãijã kꞌaba chirʌm;
pari mag hawiajã Cristo hiek jawaag chan hamjö kꞌaugba kꞌaba chirʌm.
Mua jaau chirʌm hũrwia hʌ̈kꞌatarr kꞌʌʌnauta jaauju haai nʌm,
chadcha mua jaau kꞌapꞌʌ chirʌ́ wa jaau meraa chirʌ́.
7 Mua hoowai,
jãg pãachta Hẽwandam dʌ̈i wajapcha naamkꞌĩir mʌchta dau hapꞌʌʌ parhooba pꞌidkꞌa kꞌitʌmua sĩi hich jãg jëeujã jëeuba maach peerdʌajem hiek jaau chitarrau warag mʌchdëupaita pãar kꞌaibag waubarmjö hajim.
8 Chadcha sĩi hich jãg par pãrag jaaum kꞌõchgau dewam iglesia heem kꞌʌʌn jua heem pꞌatkꞌonan mua haujim chadcha,
mag hatꞌaawai jũrr pãragta jëeuba haag.
9 Mʌ jam pãar haar chiraawai hiwiir hãbjã mua nem hig chirʌm gaaimua jũrr dau hapꞌʌʌ haba haajeejim,
hermanonaan Macedoniamua bëetarr kꞌʌʌnau mua nem hig chirarrjã mʌrʌg deechëtarr haawai.
Mʌ hich magta chitʌmta,
mua chan sĩi mʌchig nem deepim kꞌõchgau jũrr bigaaum kꞌʌʌnta hamachdëu nemdam hig nʌmjã chukꞌu hapimapꞌa chitʌm.
Mʌ hich mag chitaawai mʌg hatagjã hich mag chitaju,
bʌ̃ʌrjã pãar jua heem nemdam jëeuba.
10 Pãrau kꞌapꞌʌ nʌm,
mua chadcha Cristo hiek chaarta jaau chitʌm.
Mag chitaawai kꞌapꞌʌ habat hĩchab,
hãbmua mʌrʌg,
“Cristo hiek jaau chitʌm paar pꞌatkꞌon jëeub kꞌaba jëeubá” hawiajã mua chan jëeuba hich jãg parta jaau chitaju.
Mʌch kꞌĩrauta mag jaau chitaawai mʌchin honee chirʌm,
pꞌatkꞌon jëeuba hawiajã.
11 ¿Pãrau kꞌĩirjuawai hamau jaau nʌmjö pãar hoomaaugauta mua mag pãar pꞌatkꞌonjã haubam ha hiekꞌa chirʌ́?
Mag kꞌabam.
Hẽwandamau kꞌapꞌʌ sim mua chadcha pãar jãsene chitʌm.
12 Pari mua hichiita hich jãg pꞌatkꞌon jëeujã jëeubata hõrag jaau chitaju.
Magba Cristo hi jaau chitʌm paar mua ham dënjö jëeukꞌiin,
magan mag hoowai ham honee haju,
ya hamach pꞌidkꞌa nʌmjöta mʌchjã pꞌidkꞌa chirsim hawia.
13 Pari jãkꞌʌʌn ham jãg wënʌrrʌm chan hich Jesuucha hich hiek jaaumkꞌĩirjã jʌr hauba harrta sĩi hamach hiiupaita mag jaau wënʌrrʌm;
mag nʌmta jãg hõor kꞌũgur wënʌrraajem.
14 Chadcha hich dösãt chaarjã Hẽwandam chog kꞌĩir tꞌegwia jãg nʌrraajeewai,
chi wounaanjã jãg wënʌrrʌm hoowai maach dauderraa haju kꞌaba nʌm.
15 Hich chi mepeerjã hí mag sĩerraawaita hi higar tꞌʌnʌm kꞌʌʌnjã hõor wajapꞌam kꞌʌʌnkꞌa wënʌrraba haajeeb,
dich kꞌapeendampai kꞌũguraag.
Pari mag nʌrrjëem kꞌʌʌnan,
hamach jãg nʌrrjëem paar Hẽwandamau ham gaai jua kꞌʌabaju.
Cristo gaaimua Pablo dau haug waaujerr
16 Na mʌchdëu jaau chirarrjö hũwaai pãrag mag chirʌm:
mʌ chan lököo kꞌaba chirʌm.
Pari pãachdëu hoowai mʌ lököomjö chirʌm kꞌai,
magan warag hidëu lököomjö mʌ hiekꞌapibat;
lököom kꞌʌʌn dënjö wir haigpai mua mʌch tꞌö hiekꞌa hookꞌim.
17 Mag mʌch tꞌö hiekꞌaagpam chan maach Pör Jesucristoou mʌrʌg mag hiekꞌapi sĩewaita mag hiekꞌaagpamjã haba,
sĩi mʌch lököomjö hiekꞌa chirʌm gaaimuata mag hiekꞌaagpam.
18 Jãg hõor kꞌapan sĩi hamach nem wau nʌm higwiapaita hamach tꞌö nʌmjö muajã mʌchdëupai mʌch tꞌökꞌim.
19 Pãran chadcha pör höpꞌërm kꞌʌʌn haawai nem tꞌum kꞌapꞌʌ sĩsidʌm;
pari mag nʌmta magbamjö jũrr lököo kꞌitꞌëem kꞌʌʌn hiekjã hũrm kꞌõsita hũrnaa
20 har sĩi pãachta jũrr hamach chognaan kꞌapim kꞌõsi haajem kꞌʌʌnagjã pãrau bʌ̃ʌrjã magʌm haba haajerram.
Har sĩi pãach tꞌachdam wai nʌmjã tꞌum kꞌöpʌ̈inaa warag nem jëeujem kꞌʌʌnagjã magʌm haba pãach kꞌũgurmaajem kꞌʌʌnagjã pãrau bʌ̃ʌrjã magʌm haba nʌm.
Har hamachta chi pörnaan hawi pãach serbiibag pꞌeejem kꞌʌʌnagjã magʌm haba,
maimua pãach dʌ̈i mag nʌm kꞌʌʌnaupai hamach hiek hʌ̈kꞌamkꞌĩir pãach pꞌãrmam kꞌʌʌnagjã pãrau bʌ̃ʌrjã magʌm haba haajem.
21 Chadcha mag hiekꞌaju chigaa chirʌm;
pari mua hoowai mʌchigpain hatcha hitꞌũuta pãrag hiekꞌaajeejim.
Pari hamau hamachta Jesuucha jʌr haujim hawia hamachta tꞌö nʌm kꞌai,
magan muajã hĩchab mʌch tꞌöju haai chirʌm.
Mag hiekꞌabapʌ̈im haig chadcha lököomjöta mʌ hiekꞌabapʌ̈im.
22 Pari hamau hamachta hebreonaan meu hiekꞌaajem hawia hamach tꞌö nʌm kꞌai,
muajã hagjö hiekꞌaajem.
Hamta israelnaan kꞌai magan mʌjã hich haruu.
Hamjã jöoi Abrán kꞌararr hag chaain hewagam kꞌʌʌn dën kꞌai,
mʌjã hĩchab hi chaain hewagam kꞌʌʌn bi heemʌu.
23 ¿Hamta Cristo chognaan hanʌ́?
¡Hih!
Mʌ chará ham kꞌãaijã Cristo chog chaarcharau.
Mua kꞌapꞌʌ chirʌm,
mag hiekꞌabapʌ̈im haig lököomjöta mʌ hiekꞌabapʌ̈im.
Mʌchta ham kꞌãyaujã hʌ̃rcha pꞌidkꞌawia chitʌm;
Cristo gaaimua ham kꞌãaijã mʌchta hʌ̃rcha cárcel deg mawia chirʌm;
wajap jʌ̃gad kꞌierrjã kꞌoodaar chitʌm;
mʌʌn ham kꞌãaijã tꞌõjuuta wau chitaajem,
Cristo hatꞌee mʌch mag chitʌm gaaimua.
24 Judionaanau wʌm cinco sĩi mʌ wʌ tꞌʌnʌʌujem.
Mag wʌ nʌmpierr jʌ̃ap hahaugmamua hamach hi haawai treinta y nueve haadeewaita tag wʌba hich maigpai sĩiujeejim.
25 Biek tꞌãrjup sĩi paau mʌ pogwʌ tꞌʌnʌʌujierram;
biek hãb mokoujã mʌ bar wai nʌʌ hawi ya mʌ tꞌõobapʌ̈impii hajierram.
Biek tꞌãrjup kꞌöowia chirʌm biekkꞌa chitʌmua;
mag chitʌmua peer tꞌõwia chirʌm.
Biek hãb chará mag kꞌöo hũrr chitʌmua kꞌãaim hãb hëntër sĩi dö heepai kꞌëuwia hedaarjã hich mag dö heepai hãspa chirajim,
pꞌũas hee döjãrr.
26 Biek kꞌapan biekkꞌawia chirʌm;
pari mag biekkꞌa chitʌmʌn tꞌõjuuta jʌr chitʌmjö haajem:
dösĩg hee kꞌodjörrömua,
kꞌar sĩi nemjĩgmien dʌ̈i tꞌẽeuwai,
mʌch meeunau,
mʌch meeun kꞌabam kꞌʌʌnaujã hagjö sĩi maach kꞌaibag waum hig nʌmua peer tꞌõwi chirʌm.
Kꞌar hĩchab pꞌöbör heejã hõor pꞌogdʌbaadeewai,
sĩi hõor chukag hee chitʌmua,
pꞌũas hee chitʌm haig maimua sëukꞌa sĩi hamach hiiupai jãg Cristo hiek hʌ̈kꞌa nʌm hanʌm kꞌʌʌnaujã hagjö maach tꞌõojuuta hẽkꞌaajerram.
27 Mʌʌta mʌg chitʌm haig wajappꞌa pꞌitꞌurg haunaa dau haugta wau chitaajeeba.
Biek kꞌapan bʌ̃ʌrjã kꞌãijã kꞌãiba sĩi dau kꞌõreu hëe chiraajem;
jãdaúajã masnaa höbichagjã jẽedʌ kꞌitaajem;
biek kꞌapan sĩi Hẽwandam hatꞌee nem waum kꞌõchgau wajappꞌa jĩchagaujã masnaa kꞌajũadam hatꞌeejã dau hapꞌʌʌ kꞌitaajem.
28 Pari magʌm gaaimua mag dau haug wau kꞌitaajeeb mamʌ,
pãar chi iglesia hee tꞌum chi hʌ̈kꞌa durrum kꞌʌʌnta hʌ̃rcha hed hëepierr kꞌĩirju chitaajem.
29 Mʌch mag chitaawaita hãb kꞌãijã Hẽwandam hiek gaai hubʌ kꞌaba hoowai mʌchta hökꞌĩirjuu haadeejem;
hãb kꞌãijã deeum kꞌʌʌnau pekau hee burrpiewain mʌchta gaai machaaga haadeejem.
30 Mʌchpaita wir haig ham dënjö hig hiyʌ̈ʌ haju hakꞌiinjã,
mʌchta wajapꞌa chirʌm haju kꞌãai,
warag mʌch serbiibagta jaauju haai chirʌm.
31 Hẽwandaman tꞌumaam kꞌʌʌnauta hich mag tꞌö hiekꞌaju haai sĩerrʌm.
Hichpaita hĩchab maach Pör Jesucristo Hayau;
magua hirua kꞌapꞌʌ sim,
mʌ mag hiekꞌa chirʌmjã bʌ̃ʌrjã sëukꞌabata hiekꞌa chirʌm.
32 Pꞌöbör Damasco hanʌm hee mʌ hudtꞌuurwai rey Aretaau gobernadorrag jaaubaawai jũrr chi gobernadorrau judionaanag pꞌöbör duubjem hee puertdi nʌnʌidʌmpierr mʌ tꞌʌapijim,
mʌ pʌr hawaag hawia.
33 Pari hʌ̈u maachjö Cristo higar nʌm kꞌʌʌnau mag kꞌaug hatꞌaawai kolaauhi gaai jʌ̃gadau jʌ̃kꞌanaa warre chi pꞌöbör higaau daaugajãr mʌ heeg jiir burrpʌ̈ijierram.
Mag,
ham jua heemua hʌ̈u mʌ peerdʌjim.