Jerusalenpien hatꞌee pꞌatkꞌon pꞌietarr
8
Hermanonaan,
hĩs jũrr mua pãrag jaaum kꞌõsi chirʌm,
jãga Hẽwandamau Macedonia durr iglesia nʌm heem kꞌʌʌn hʌ̈u wai sĩ.
2 Haman chadcha pꞌitꞌuurga haadëp naab pari honee naajem.
Dau hapꞌʌʌ naajeeb pari hamachdëu pꞌatkꞌondam hoo nʌm heem chan mag deemapꞌamjã haba haajerram.
Hamaun paraam kꞌʌʌn dënjö dʌ̈rrchata deenaa maimuajã deem kꞌõsita deejerram.
3 Hamau mag deemamjã hamachdëu deeju harrpierrpai kꞌaba,
hamachdëu deeju harr hatchata deejem.
Mua mag jaau chirʌmʌn,
mʌchdëucha kꞌapꞌʌ chiraawaiu.
4 Mag dee nʌm chan muata deepi jaauwia kꞌaba,
sĩi hamach kꞌĩrauta mag deejem.
Hamach garmuata,
hamaujã hagjö hamach hermanonaan Jerusalenpien hatꞌee hamach paat deeju haai nʌnʌm nʌʌ paawaita mua hamag,
“Pãachdëu mag kꞌõs nʌm kꞌai,
magan hʌ̈u sim” ha chirajim.
5 Maimua chadcha muan hamau jãgcha habajupii chirajim.
Nacha hamachdëupaita sĩi deeum kꞌʌʌnjö maach Pör Jesuugta wir haig hamach tꞌʌsĩepʌ̈ijierram,
hirua nem kꞌõsimpai wawaag.
Maimuata jũrr sĩi mua nem jawaata hoo nʌisijim,
Hẽwandamau hamachig hapi simjö.
6 Maguata muan pãragjã Macedoniapien dënjö ofrenda deem kꞌõsi deebat ha chirʌm,
hö hãkꞌãragjã chukꞌu.
Magamkꞌĩir Titoogjã jaau chirʌm,
pãar haar hich maju nawe,
jãg hichdëuta nacha pãrag ofrenda jʌr pꞌiepi jaaubaaderr hich jãg warag tꞌumaa hãba jʌr pꞌie haumkꞌĩir.
7 Pãar chadcha chi wajapꞌam kꞌʌʌnau,
tꞌãraucha maach Pör Jesucristo hiek hʌ̈kꞌaag.
Maach Pör Jesús hiek kꞌaugnaa hiekꞌaa kꞌapꞌʌ hiekꞌamamua hag hiek jawaagjã pãran chi wajapꞌam kꞌʌʌnau;
maimua nem wajapꞌa waum kꞌõchkꞌa nʌm dʌ̈i hĩchab mʌchdëu pãrag jaautarrjö wir haig dich kꞌapeen kꞌa kꞌõchag hatꞌeejã hagjö chi wajapꞌam kꞌʌʌnau.
Mag nem tꞌumaam hatꞌee chi wajapꞌam kꞌʌʌn haawai chamʌg ofrenda deepi jaau nʌmjã dʌ̈rrcha deebat.
8 Mag chirʌm haig chan mua hajuésta deebat haba chirʌm.
Mag chirʌm haiguin sĩi pãraujã Macedoniapien dënjö dee kꞌaugamkꞌĩirta mag chirʌm.
Pãrau mag deebapʌ̈im gaaimua maach kꞌodnaan Jerusalén pꞌöbör hee hapꞌʌʌ kꞌitꞌëem kꞌʌʌnau kꞌapꞌʌ haju,
sĩi par hiekꞌaupai kꞌaba,
chadchata pãrau ham kꞌõsi nʌm.
9 Pãrau ni hãbmuajã meraa kꞌaba nʌm,
jãga maach Pör Jesucristojã Hẽwandam dʌ̈i hãba sĩerr haawai dau hapꞌʌʌ kꞌaba sĩerrta hich kꞌĩrau mʌg jẽb gaai bëewia dau hapꞌʌʌ hajĩ maach gaaimua.
Pari juau hogtꞌom mag hich dau hapꞌʌʌ hapitarran,
hich magbarm gaaimua jũrr Hẽwandamau maachta hich Cristo dʌ̈i hãba wënʌrramkꞌĩir hajim.
Magua Cristo gaaimua maach kꞌodkꞌa nʌm kꞌʌʌn dau hapꞌʌʌ hoowai ham dau haug kꞌaug paraa habat.
10 Mʌg cha mʌchdëu jaau chirʌm hatꞌee sĩi mua pãar wawim hig chirʌm.
Naam añoouwe pãachdëuta nacha hermanonaan Jerusalenpien hatꞌee pꞌatkꞌon pꞌieju hapꞌöbaadëwi chadcha pꞌiepꞌöbaaderr haawai,
11 pãachdëu deeju hayaampierr hagdaujö deemamua pãachdëu deeju hapꞌöbaadeewai deem kꞌõsi narrjö hich jãg deem kꞌõsi deepetat.
12 Pãrau ofrenda deewaijã deem kꞌõsita dee nʌmʌn,
bʌ̃rʌʌ hawiajã dʌ̈rrcha dee nʌm dʌ̈i hãba Hẽwandamau haum kꞌõsi hauju.
Hirua maachdëu chukꞌu nʌm hatchajã jëeuba,
maachdëu wai nʌmpierrpaita jëeu sim.
13 Magba hakꞌiin wa dich kꞌapeenag nem deem kꞌõchgau jũrr dichdëu nem hig nʌmta chukꞌum haju.
Mua pãar magpimapꞌa chirʌm.
14 Mag kꞌãai sĩi hagdaujö pãachdëu nem hig nʌmta tꞌum paraa hapim kꞌõsi chirʌm.
Pãrau nem wai nʌm jũrr warm kꞌʌʌnau chukꞌu nʌm kꞌai,
magan hamag dee sim;
maagwai jũrr pãrau chukꞌu habarm hed hamau wai nʌm kꞌai,
hich hagjö pãrag deeju.
Mag nʌm haig sĩi hagdaujö dichdëu nem hig nʌmdam haugchëba wai nʌnʌid haju.
15 Cha mua jaau chirʌm higwia,
Hẽwandam hiek pꞌã sim gaai jaauwai,
“Kꞌöju pöm hautarr dën heemjã sobba,
ni kꞌöjudam bʌ̃rʌʌ hautarrjã waaurwia haugchëbajim” ha sim. (Ex 16:18)
Tito hich kꞌapeen dʌ̈i pʌ̈itarr
16 Mua Hẽwandamag hʌ̈u hajim ha chirʌm,
hichdëuta mua pãar kꞌĩirju chirʌmjö Titoogjã pãar kꞌĩirjupi sĩewai.
17 Mua hich Titoog pãar hoon mamkꞌĩir jaaubaawai hʌ̈u mʌ hipierr maju haadëjim.
Mag nʌm dʌ̈i hichdëujã nawe pãar hoon mam kꞌõchag sĩerr haawai hĩsin chadau hirua hich daúacha pãar hoon mam.
Pari mua hoowai hirig petá haba harr hakꞌiinjã,
hichiita hich kꞌĩraujã maju sĩejim.
18 Tito dʌ̈i mua deeum hermano pʌ̈i chirʌm.
Jãguan hĩchab mʌg maach peerdʌajem hiek jaau gaai kꞌitʌm gaaimua mau iglesia nʌnʌidʌm hee tꞌumaam kꞌʌʌnau hi hëugar wajapꞌa hig hiyʌ̈ʌ haajem.
19 Mag nʌm dʌ̈i hĩchab,
mʌg pꞌatkꞌon jʌr pꞌie wënʌrraag maar juag hoomkꞌĩir tagam iglesia heem kꞌʌʌnaujã hiita jʌr haujierram.
Mag pꞌatkꞌon jʌr pꞌie wënʌrrʌmʌn hapꞌʌʌ kꞌitꞌëem kꞌʌʌnag deepäaigau,
magbaawai hamaujã maach Pör Jesuuta wajapꞌa hig hiyʌ̈ʌ nʌm dʌ̈i chadcha maachdëu hamach kꞌõsi nʌm ha kꞌap hamkꞌĩir.
Magta mʌg hermanodam maar daumaai nʌrrʌm.
20 Magba maach happaita wënʌrrakꞌiin,
pꞌatkꞌon dʌ̈rrcha harrum haawai,
heeu hãbmua kꞌãijã wa marau hag heem haujim haju.
21 Pari hãbmuajã mag kꞌĩirjum huguata hãba nem wajapꞌa waujupaita kꞌĩirjuajem,
Hẽwandam dau na maimua sĩi mʌg jẽb gaai maach hagdaujöpai tꞌʌnʌm kꞌʌʌn dakꞌĩirjã hagjö.
22 Pãar haar Corintoog mʌch maba habaawai mʌch jũrr dewam hermanodamta hagjö ham daumaai pʌ̈i chirʌm.
Jãjã hagjö hichdëu nem wajapꞌa wau kꞌitʌm gaaimua mua hi kꞌapꞌʌ chirʌm,
jãan hermano chaardamau.
Magʌm hĩs chará hichdëujã ya pãar wajapꞌa wënʌrrʌm kꞌapꞌʌ sĩewai hʌ̃rcha hirua pãar hoom kꞌõchkꞌa sim.
23 Hãbmua kꞌãijã Tito higwia pãachig,
“¿Jã kꞌaiuma?”
habaawai,
jũrr mʌ higwia,
“Jãan Pablo kꞌaperau,
pãach juag hoom kꞌõchgau hi dʌ̈i hãba pꞌidkꞌaajem kꞌabahab” habat.
Wa jũrr hi kꞌapeen har hi dʌ̈i numí wëtum kꞌʌʌn higwia kꞌãijã,
“¿Jãkꞌʌʌn chijã kꞌʌʌnauma?”
habaawai,
“Jãkꞌʌʌnan mau Macedonia durr iglesia nʌnʌidʌm heem kꞌʌʌnau jʌr hauwia pʌ̈itarr kꞌʌʌnau” habat,
“hĩchab wajapꞌa maach Cristo hiek hig hiyʌ̈ʌ haajem kꞌʌʌn.”
24 Hermanonaan Corintopien,
chamʌ kꞌʌʌn wounaan pãach haar bardʌtkꞌaimaawai,
pãachdëu ham kꞌõsi nʌm chadcha hamach daúacha hoomkꞌĩir,
ham dʌ̈i wajapꞌanaa ham jãsene habat.
Pãrau ham dʌ̈i magmʌn,
magan mʌg Macedonia hee iglesiapierr tꞌumaam kꞌʌʌnauta pãrau mag ham kꞌõsi nʌm kꞌakꞌapdö haju,
pãachdëu mag hamach dʌ̈i wajapꞌa hatarr jaautꞌurtarr hũrwia.
Mag hamʌn magan mʌjã hĩchab parcha honee kꞌaba habarm pãar gaaimua.