Hẽwandam Hakꞌarau hich jua tꞌeeg jiigjem
12
Kꞌodamnaan,
hĩs jũrr mua pãrag kꞌapꞌʌ hapim kꞌõsi chirʌm,
jãgata Hẽwandam Hakꞌarau maach hich hiek hʌ̈kꞌa nʌm kꞌʌʌnag hich jua tꞌeegjã deejẽ,
nem kꞌĩir pogkꞌe waumamkꞌĩir.
2 Pãrau kꞌapꞌʌ nʌm,
warr hagtꞌa pãrau Hẽwandam hiek kꞌaugba naawai sĩi hʌdʌraa jãg juau nem parhoobam wautarragta pãach hëudʌ harrpi nʌmjö haajeejim,
hagʌmʌgta jëeu nʌmua.
Pãrau kꞌapꞌʌ nʌm hĩchab,
warrgar pãrau hẽwandamnaan haajerr kꞌʌʌn chan pöd hiekꞌaba,
meujã meraa sĩsidʌm,
chadcha Hẽwandam chaar kꞌaba sĩsid haawai.
Pari hĩs ya pãrau Hẽwandam chaar hiekta kꞌapꞌʌ naawai hichdëun chadau pãrag hich hiekꞌa simjã kꞌapꞌʌ hapiju hich Hakꞌaar gaaimua.
3 Magua hĩs kꞌĩirjuawai,
hãbmua kꞌãijã chadcha Hẽwandam Hakꞌaar jua tꞌeegauta hi hiek jaau nʌrrʌm kꞌai,
pöd Jesús tꞌʌ̃r tꞌʌ̃rnaa kꞌaigba hiekꞌaju kꞌaba sim.
Maimua hich Hẽwandam Hakꞌarauta hiekꞌapibam chan,
pöd hãbmua,
“Jesuuta tꞌumaam kꞌʌʌn Pöröu” ha hiekꞌabaju.
4 Hẽwandamau chadcha hich chaainag hich jua tꞌeeg kꞌĩirpierr deejem,
hagua hich hatꞌee nem waumkꞌĩir.
Pari mag simʌn,
hich Hẽwandam Hakꞌaar hãbpai simuata mag deejem.
5 Hẽwandamau maachig nem waupi simua jũrr bigaaum kꞌʌʌn chogkꞌamkꞌĩirta pꞌidagjã kꞌĩir pogkꞌe waupiejem.
Mamʌ magʌmjã tꞌum hich Hẽwandam Hakꞌaar hãbpaimuata mag waupiejem.
6 Hẽwandamau maachig nem waupiju hayaam pöm kꞌĩir pogkꞌe wai sim;
pari hãba hichdëupaita mag nem kꞌĩir pogkꞌe wawaagjã tꞌumaam kꞌʌʌnag hich juapá deejem.
7 Magta Hẽwandamau hich chaainag hamachpierr hich Hakꞌaar jua tꞌeeg kꞌĩir pogkꞌe deemaajem,
magʌm gaaimua chi hʌ̈kꞌa durrum kꞌʌʌn tꞌumta wajapꞌa wënʌrramkꞌĩir.
8 Hẽwandamau hich Hakꞌaar gaaimua hãaur kꞌʌʌnag hichdëu kꞌõsimjö hõor wawieg nem kꞌĩirjug kꞌaug hapiejem.
Maagwai hãaur kꞌʌʌnag hagjö nem kꞌĩirjug kꞌaug hapi sim,
hich hiek hõrag jaau kꞌaug hamkꞌĩir.
9 Maagwai hãaur kꞌʌʌnag hich hag Hakꞌaraupai kꞌapꞌʌ hapiejem,
Hẽwandam ham dʌ̈i sim haawai dich juapaaupai pöd nem waubajöjöomjã hich jua tꞌeegauta wauju kꞌapꞌʌ hapiejem.
Hãaur kꞌʌʌnag hĩchab hich haguapai hõor mor mas sĩsidʌmjã monaaumkꞌĩir hich jua tꞌeeg deejem.
10 Hãaur kꞌʌʌnag hag na hõrau mag hooba haajemta hõor dauderraa waumkꞌĩir hich juapá deejem.
Hãaur kꞌʌʌnag hich hiekta deeum kꞌʌʌnag jaau kꞌaug hapiejem.
Maagwai hãaur kꞌʌʌnag hĩchab kꞌĩirjug deejem,
Hẽwandam hiekta jaau wënʌrrʌm hanʌm kꞌʌʌnau nem jaau nʌm hũurwai chadcha hich Hẽwandamauta hiekꞌapi sĩ wa sĩi dösãt hiekta jaau wënʌrrʌ́ ha kꞌaug haumamkꞌĩir.
Hãaur kꞌʌʌnag hĩchab deeum meu bʌ̃ʌrjã mʌig heegar hiekꞌaba haajem meupa hiekꞌapimaajem.
Maagwai jũrr hãbakꞌaíg mag warmua hiekꞌatarr,
pari hagjö hich meu kꞌaba simta hich meúata hiekꞌatarrjö,
chi hũrtarr kꞌʌʌnag jaaumkꞌĩir kꞌĩirjug deejem.
11 Mag nem kꞌĩirpierr jig simjö hich jua tꞌeeg dee simʌn,
hich Hẽwandam Hakꞌaraupaita hichdëu deeju hayaam kꞌʌʌnag mag deemaajem,
hichdëu kꞌõsimjöta nem waumamkꞌĩir.
Tꞌumaam kꞌʌʌnta Cristo morkꞌa nʌm
12 Maach moron chadcha tꞌum hãbpaita sĩeb mamʌ,
hag gaai nem kꞌĩir pogkꞌe tꞌʌnʌm.
Hag gaai tꞌʌnʌm:
dau,
jua,
bʌ̈,
kach,
maimua magpaijã kꞌabam.
Pari mag tꞌʌnaab mamʌ,
hichiita hõor mor hãbpaim gaaita mag tꞌʌnaajem.
Hich magta sim hĩchab Cristo morjã:
Maachta hi morkꞌa nʌm.
13 Judionaan wa judionaan kꞌabam kꞌʌʌn,
sĩi chikꞌam chognaan wa hamach cuenta nʌrrjëem kꞌʌʌnpa maachin tꞌum hãba hãbam Hẽwandam Hakꞌaar hauwiata pör choo nʌm,
mag hi Hakꞌaar hatꞌaawai maach tꞌumaam kꞌʌʌnag Cristo mor hãbpai höbeer haumkꞌĩir.
Magua mʌg maach kꞌapan tꞌʌnaab mamʌ,
hãbam Hakꞌaarpaita wai naawai chadcha maachta Cristo morkꞌa nʌm.
14 ¿Pãrau hoowai maach mor gaaipai nem kꞌĩir pogkꞌe tꞌʌnaabá?
Maach mor chan mag nem kꞌĩir hãbpaimuata morkꞌa sim habam.
15 ¿Kꞌanim nemjö bʌ̈ʌu kꞌãijã juag,
“Mʌ chan jua kꞌaba haawai mor gayam kꞌabam” hakꞌiinjãh?
Magju kꞌaba sim,
chadcha hichjã mor gayam haawai.
16 Maimua jũrr kachiu kꞌãijã daúg,
“Mʌjã dau kꞌaba haawai mor gayam kꞌabam” hakꞌiinjãh.
Mag gaaimua chadcha mor gayam kꞌabam haju kꞌaba sim,
hichjã mor gaai sĩewai.
17 Maach mor tꞌum dau hakꞌiin,
¿kꞌaniu hũrkꞌajĩ?
Wa jũrr maach mor tꞌum kꞌãijã kach hakꞌiin,
¿jãga nem tꞌũpꞌamjã kꞌap hakꞌajĩ?
18 Warr maach hompaawaijã hʌ̈uta Hẽwandamau maach magta deebajim.
Hirua hoowai hagdaujö hamach sĩsid hajupierrta sĩumajim maach mor gaai,
hichdëu kꞌõchagpierr,
hamagjã hagjö hamachpierr nem waumkꞌĩir.
19 ¿Jãga hakꞌam kꞌai Hẽwandamau sĩi maach dau,
jua,
wa bʌ̈pai kꞌãijã hompaawia,
tagam nem hompaaba harr hamuan?
Mag harr hamuan maach mor haju kꞌaba sĩekꞌam.
20 Hirua maachdëu nem higju tꞌum maach mor gaai hompaakꞌajim.
Pari nem kꞌĩir kꞌapan maach gaai tꞌʌnaab mamʌ,
hichiita maach moron hãbpaita sim.
21 Daúa hichdëuta warp hoojem hawia juadamag,
“Mua pʌ higbam” haju kꞌaba sim.
Wa magbam kꞌai jũrr pöröu kꞌãijã bʌ̈ʌg,
“Muajã pãar higbam” haju kꞌaba sim,
hichta tagam kꞌʌʌn kꞌãaijã maach mor gaai hʌ̃gtꞌarraacha sĩejem hawia.
22 Magju kꞌãai wajapcha hoowain,
maach mor gayam nem wajappai higbajöjöo sĩsidʌmta tagam kꞌʌʌn kꞌãaijã hʌ̃rcha hiigjem kꞌʌʌnau.
23 Maimua har maadëu dich mor wajappai hasekasbaju hayaam perasta wajapꞌa put heecha wai wënʌrraajem.
Maimua hag kꞌãai wajapcha hʌʌrkꞌaju haai nʌmta jũrr mag hãkꞌaa paraajã haba haajem,
24 ham mag warm kꞌʌʌnjö meer paar wai wënʌrraju higba naawai.
Mag kꞌãai hʌʌrkꞌabaju haai nʌm perasta wajapcha hʌʌrkꞌaajem.
Pari Hẽwandamau warrgarwejã hich magta deejim,
maadëu hoowai wajap nem higbapaimta hʌ̃rcha jãsenkꞌa nʌmjö wajapcha tꞌʌa paar wai wënʌrramkꞌĩir.
Hich hagjöta sim hĩchab,
maach kꞌodamnaan Hẽwandam hatꞌee pöm nem wauju kꞌaugba kꞌitꞌëem kꞌʌʌnjã.
25 Hẽwandamau makꞌʌʌnjã hich morkꞌa wai sim haawai hagdaujö jãsene hapim kꞌõsi sim,
maagwai hiwiir hãbjã haaidʌba sĩi warag hagdaujö warm kꞌʌʌnau nem higaata hoo naamkꞌĩir.
26 Mag naawai hiwiir hãb kꞌãijã mas haawai tagam kꞌʌʌnaujã dʌ̈i tꞌumaa sentii nʌm.
Wa hãb kꞌãijã nem wajapꞌa waubarm gaaimua honee haawai tagam kꞌʌʌnjã tꞌumaa honee tꞌʌnʌm.
27 Maach Cristo higar nʌm kꞌʌʌnan,
maachta hi morou.
Mamʌ tꞌumaam kꞌʌʌnau hãbam pꞌidagpai wauba naawai dichpierr nem wau nʌm gaaimua hãb sĩi hi juajö sim;
deeum pꞌidag wau sim gaaimua hãb hi bʌ̈jö sim;
hãb hi daujö;
hich mag nʌmua maimua mag tag hich mag tꞌum hi mor hëntër.
28 Hich Hẽwandamaujã hich hiek hʌ̈kꞌa nʌm kꞌʌʌn hee hʌ̃rcha paraa hapijim:
Hich hiek haaidʌ jaaumkꞌĩir hichdëucha jʌr haumam kꞌʌʌn,
hich hiek jaaumamta jũrr warm kꞌʌʌnag jaaujem kꞌʌʌn,
maimua hich hiek jawaag maestronaan.
Mag tag hagjö paraa hapijim:
hichdëu juapá deebaawai hõor dauderraa nem waaujem kꞌʌʌn,
hĩchab hich jua tꞌeegau hõor monaaujem kꞌʌʌn,
sĩi chikꞌam kꞌĩir jãsenkꞌaag nem par daúa hooba haajem kꞌʌʌn,
iglesia hee dirijiijem kꞌʌʌn,
maimua hich Hẽwandam Hakꞌarau hiekꞌapibaawai deeum meúa hiekꞌaajem kꞌʌʌn.
Magʌm kꞌʌʌnta hich hiek hʌ̈kꞌa nʌm kꞌʌʌn hee paraa hapijim.
29 Pari magʌm kꞌʌʌn tꞌum sĩi Hẽwandam hiek haaidʌ jaaujem kꞌʌʌn kꞌaba,
ni tꞌumaam kꞌʌʌnauta mag Hẽwandam hiek jaaujem kꞌʌʌnjã kꞌaba,
ni tꞌumaam kꞌʌʌnta mag Hẽwandam hiek jawaag maestronaanjã kꞌaba nʌm.
Tꞌumaam kꞌʌʌnauta mag Hẽwandam juapaau hõrau hooba haajemjã hõor dauderraa nem waaujem kꞌʌʌnjã kꞌaba,
30 ni tꞌumaam kꞌʌʌnauta mag hõor mor masim kꞌʌʌn monaaujem jua tꞌeegjã chukꞌu nʌm.
Tꞌumaam kꞌʌʌnagta mag Hẽwandam Hakꞌarau bʌ̃ʌrjã hamachdëu meu kꞌaugbamjã hiekꞌapiba,
ni tꞌumaam kꞌʌʌnta mag warmua deeum meúa nem jaautarrjã jũrr kꞌapꞌʌ warm kꞌʌʌnag jaaujem kꞌʌʌnjã kꞌabam.
31 Mag hãbpaimʌgta tꞌum magamkꞌĩir Hẽwandamau hich jua tꞌeeg deeba sĩeb mamʌ,
wajapꞌa kꞌĩirjunaa hi jua tꞌeeg chi wajapcharam kꞌʌʌnta haum kꞌõsi hirig jëeubat,
hagua pãach heejã tꞌumaam kꞌʌʌnta warag Hẽwandam hiek gaai hubʌ paaukꞌamamkꞌĩir.
Pari magʌm kꞌĩirjuju kꞌãai,
hãb hag kꞌãyau wajapcharam sim:
ma,
dich kꞌapeen kꞌa kꞌõsi nʌmʌu.
Maata pãrag jawaagpam.