¿Jua pʌrju haai nʌ wa jua pʌrju kꞌaba nʌ?
7
Na har pãachdëu mʌrʌg hẽsap deepʌ̈itarr gaai jua pʌrju haai nʌ wa jua pʌrju kꞌaba nʌ ha jëeu narr,
hĩsin chad mua pãrag jaaukꞌim:
Mʌrʌgan,
hemkꞌooin hʌʌin hauba hich jãg hamach happai wënʌrrakꞌiin nem wajaug sim.
2 Mamʌ jãg hamach hõor kꞌabam dʌ̈ijã sĩi parhooba haadëpꞌʌm gaaimuata hemkꞌooinjã hagdaujö hamach hʌʌin dʌ̈i sĩsidnaa chi hʌʌinjã hagdaujö hamach jaain dʌ̈i sĩsid haju haai nʌm.
3 Ya mag hãba nʌisiewai,
chi hemkꞌooirau kꞌõsi haadeewai chi hʌʌiraujã hĩgkꞌaba,
maimua chi hʌʌirau kꞌõsi haadeewaijã hich hagjö chi hemkꞌooiraujã magʌm haba haju haai nʌm,
ya dich hõor dʌ̈ita naawai.
4 Wa chi hʌʌirau kꞌãijã,
“Mʌch mor haawai mʌ jayaujã kꞌaugba sim” ha hiekꞌaju kꞌaba sim,
warramjö pʌch happai kꞌaba sĩewai.
Ni chi hemkꞌooiraujã pöd,
“Mʌch mor mʌch gaai wai chiraawai mʌchdëu kꞌõsi haadeewaita magju haai chirʌm” haju kꞌaba sim,
pʌjã hĩchab pʌch hapꞌam kꞌaba haawai.
5 Mag jũrr hagdaujö chikꞌam dënkꞌa naawai,
hãbmua kꞌõsi sim haig pöd hiwiir hãbmua,
“Mua kꞌõchkꞌabam” haju kꞌaba sim.
Pãrau kꞌapes haba hãwat hauju haai nʌmʌn,
kꞌãaidam kꞌapanaa kꞌãijã maach Hẽwandamag jëwaagpaawai hagdaujö sʌrkꞌa hauju haai nʌm ha hiekꞌawian chadau sʌrkꞌaju haai nʌm.
Pari ya mag jëeu dichdimaawain chadau hũwaai pãachdëu waum kꞌõsim haig waubat.
Heeu magba hakꞌiin,
kꞌãai kꞌapan pãar magʌm kꞌaugba nʌisiewai jũrr meperau deeum dʌ̈i kꞌãijã pekau waupidukꞌam.
6 Mag chirʌm chan,
mag hichiita hẽwannaan tꞌum pãach hʌʌin haupetat haba,
wa chi hʌʌinag kꞌãijã tꞌum jaain jʌrkꞌabat haba chirʌm.
Mag kꞌõs hamʌn hʌ̈uma;
mag kꞌõchkꞌabamʌn hich hagjö nem wajaug sim.
7 Mʌch hödiiupain muan pãarjã tꞌumaa mʌchjöta pãach happai naapim kꞌõsi chirʌm.
Mamʌ Hẽwandamau maachig hagdaujö hich jua tꞌeeg deejem,
mag deebarmua hagdaujö dichig deemarrpierr hich hatꞌeeta nem waumkꞌĩir.
8 Pari mua har hagtꞌa hamach hapꞌa tꞌʌnʌm kꞌʌʌnag maimua kꞌoopaa hʌʌinagjã hagjö,
“Mʌjö pãar hich jãg pãach happaita wënʌrrakꞌiin hʌ̈u hakꞌam” ha chirʌm.
9 Mamʌ pãrau pãach hö kꞌõchag pöd hãwatbaju nʌm kꞌai,
warre pãach hʌʌidamcha hatꞌat;
maagwai hʌʌinaujã hagjö warre pãach jaaindam haupetat.
Warre dich hõor dʌ̈icha nʌisiewai hʌ̈ucha sĩebahab,
sĩi magʌm kꞌõchag haadëpꞌʌmjã hich mag hãwat wënʌrraju kꞌãai.
10 Pari ya har hamach hõor dʌ̈i nʌm kꞌʌʌnag mua mag chirʌm.
Ya ma chan sĩi mʌch hiiupaijã kꞌaba,
maach Pör Jesuu mag jaaupi sĩewaita mag jaau chirʌm:
Pʌch chi hʌʌiraujã hoob pʌch jaai pʌa hʌrram.
11 Mamʌ pʌch jaai pʌawiajã,
tag deeum jaaijã hauba,
hich magta hʌrraju haai sim.
Mag hich mag pʌch happai hʌrramapꞌa hʌmʌn,
magan deeu pʌch jaai dʌ̈ita pꞌʌʌrbaju haai hʌm.
Maagwai pʌch chi hemkꞌooiraujã pöd pʌch hʌʌi pʌaju kꞌaba,
ni deeum hʌʌijã hauju kꞌaba sim.
12 Mag tag deeum nemdam mua pãrag jaaum hig chirajim;
ya ma chan maach Pör Jesuu jaaupi sim kꞌabam,
maan sĩi mʌch kꞌĩirjug heepaimʌu.
Mamʌ mʌchdëu kꞌĩirjuawai chadcha magta haju haai sĩewaita pãrag jawaagpam:
Maach hermanonaan heem hãbmua kꞌãijã hʌʌi wai sim,
pari mag hʌʌirau Hẽwandam hiek hʌ̈kꞌaba sim;
mag kꞌitʌmuata hich jayag hich pʌapimapꞌa sim chan,
mag hermanoou pöd mag hʌʌi pʌaju kꞌaba sim.
13 Wa magba hʌʌi hãb Hẽwandam hiek hʌ̈kꞌa sim jayau kꞌãijã jũrr Hẽwandam hiek hʌ̈kꞌaba sim;
mamʌ hich hʌʌi ya hag dʌ̈i kꞌaug sĩewai hich pʌapimapꞌa sim chan,
mag hʌʌiraujã pöd mag hemkꞌooi pʌaju kꞌaba sim.
14 ¿Jãgwi?
Chi hemkꞌooirau hʌ̈kꞌaba sĩewia kꞌãijã ya jũrr hich chi hʌʌi gaaimua Hẽwandamau tag sĩi bigaaum kꞌʌʌnjöcha kꞌaba hʌ̈u hi heeg hoo sĩewaima.
Wa magba chi hemkꞌooirau kꞌãijã wajapꞌa hʌ̈kꞌa simta jũrr chi hʌʌirauta Hẽwandam hiek hʌ̈kꞌaba sim kꞌai,
hich hagjö chi jayau pöd pʌaju kꞌaba sim.
Magba hakꞌiin Hẽwandamau hich jaai gaaimua hʌ̈u hijã hagjö heeg hoo simta pʌaju.
Wajapcharan mag chi Hẽwandam hiek hʌ̈kꞌa sim gaaimuata warm kꞌʌʌnjã hichjö Hẽwandam dënkꞌapiejem.
Magba hakꞌiin pãar chaainjã sĩi bʌ̃ʌrjã Hẽwandam hiek hʌ̈kꞌaba haajem kꞌʌʌn chaainjöta sĩsid haju.
Mamʌ hʌ̈u hãbmua hʌ̈kꞌa kꞌërʌm gaaimua ya hĩchab hamjã hich dënkꞌaímʌ hich dënkꞌa haaujem Hẽwandamau.
15 Mamʌ mag jũrr hiwiir hãbmua Hẽwandam hiek hʌ̈kꞌaba sĩewai chi hʌ̈kꞌaba sim garmua pʌam kꞌõchag tꞌʌnʌm kꞌai,
hidëu pʌch pʌapibá.
Chi hʌ̈kꞌa simua hʌ̈kꞌaba simʌg pöd,
“Pua chan mʌ pʌaju kꞌaba sim” ha hiekꞌaju kꞌaba sim.
Hich mag hogdʌba wënʌrrʌm chan kꞌõinaa wënʌrrabaju.
Pari Hẽwandamau maachig kꞌõinaata wënʌrrapi jaau sim.
16 Magua mag chi hʌ̈kꞌaba sim garmuata dich hiseg nʌmjã,
hökꞌar dich dënjö hʌ̈kꞌapi hauju hawi hogdʌmapꞌam gaaimua kꞌõinaa kꞌaba wënʌrrʌm kꞌai,
hich garmuata hidëu pʌch pʌapibá.
Magba hakꞌiin hich mag kꞌõinaa kꞌaba wënʌrraju.
Chadcha mag hʌ̈kꞌaju hawiajã,
jãga pua mag hirua hʌ̈kꞌaju kꞌapꞌʌ sĩ,
mag gaaimuapai mag kꞌaigba nʌmta hogdʌba wënʌrraag.
17 Pari muan iglesiapierr hõor nʌnʌidʌm kꞌʌʌnag mʌgta chirʌm:
Mʌrʌgan pãachdëu Hẽwandam hiek hʌ̈kꞌaawai narrjöta naaju haai nʌm.
Mamʌ mag wënʌrrʌmua Hẽwandam Hakꞌarau pãachig hich jua tꞌeeg deemarrpierr hi hatꞌeeta nem waubat.
18 Pua Hẽwandam hiek hʌ̈kꞌaawai judionaanau hamachta Hẽwandam chaainkꞌa nʌm kꞌap hamkꞌĩir haajemjö mehëu pꞌʌʌrbich chirarr kꞌai,
hich mag chirsí.
Wa pꞌʌʌrbichba kꞌãijã chirarr kꞌai,
hoob pꞌʌʌrbichpim.
19 Judionaan dënjö pꞌʌʌrbich sim kꞌai,
hʌ̈u sim;
pari pꞌʌʌrbichba sĩewiajã hich hagjö nem wajaug sim.
Mamʌ Hẽwandamau magʌm gaaimuata maach hig sim habam.
Magarrau chadcha wajapꞌa simʌn,
Hẽwandamau hich hiek gaai jaau sim hipierraa nʌmʌn chadau wajapcha sim magʌm pꞌʌʌrbich nʌm kꞌãaijã.
20 Hẽwandamau maachig hich hiek hʌ̈kꞌapi haauwai maach narrjö hich magta naaju haai nʌm.
21 Hirua pʌrʌg hich hiek hʌ̈kꞌapi haauwai pʌ sĩi chikꞌam chogkꞌa sĩerr kꞌai,
kꞌani pua tag kꞌĩirjuju.
Pari pua hoowai hʌ̈u pʌ pʌch patrón jua heemua höbërju hayaa hoo wai sim kꞌai,
hoob par daúapai hoom.
22 Pari Hẽwandamau hʌ̃rcha magʌm kꞌĩirjupiba sim.
¿Kꞌan jãgwi mua mag chirʌ́?
Pʌ hich mag chikꞌam chogkꞌa sĩsiwiajã,
hichiita pekau maadëu hoomaug sim chogkꞌa sĩerr jua heemta maach Pör Cristoou pʌ peerdʌ hautarr haawaima.
Pari mag chikꞌam chog kꞌaba harr hawiajã,
mag Cristoou pʌ peerdʌ hautarr haigmuan pʌʌn jũrr hi chogta kꞌa sĩsim.
23 Pãran tꞌum Jesucristo bag hãrtarrauta Hẽwandamau pãar përkꞌa haujim;
maagwai ya pãran hi dënëu.
Chadcha mag kꞌai,
magan sĩi mʌg jẽb gayam kꞌʌʌn kꞌĩirjug higba,
hãba hi hiekpaita hũrbat.
24 Hẽwandam gaaimua kꞌodamnaan,
pãachdëu Hẽwandam hiek hʌ̈kꞌaawai narrjö hi na hich mag wënʌrratꞌʌ̃.
25 Daupeen har hagtꞌa hõor meraam kꞌʌʌnag hiekꞌaag chan,
maach Pör Cristoou mʌrʌg jaauba harr haawai,
wajappai hiekꞌaju chukꞌu chirʌm.
Pari mʌrʌgan mʌgta sim:
Mʌjã hĩchab maach Pör Cristoou juapá deewia hi dʌ̈i hubʌ chitʌmuata jaau chiraawai pãrau hʌ̈kꞌaju haai nʌm.
Hũrbat:
26 Hĩs hewagan warag pꞌitꞌuurga paaukꞌamaawai mʌrʌgan maachin cha maach nʌmjöpaita hich jãg wënʌrraju haai nʌm.
27 Hʌʌi wai chirʌm kꞌai,
hoob pʌch hʌʌi pʌam.
Hẽwan chirʌm kꞌai,
hoob jöpkꞌarraa hʌʌi hauju kꞌĩirjum.
28 Pari pua hʌʌi hauju kꞌĩirjubaadëwi warre hag dʌ̈i jua pʌrmʌn pekau kꞌabam.
Wa chi hʌʌirau kꞌãijã hich jaaipaju dʌ̈i jua pʌrwiata pamʌn,
hich hagjö pekau kꞌaba sim.
Magba ya pãach hõor dʌ̈i paaukꞌabaadeewai,
warr pãach happai haawai naajerrjö kꞌaba,
pꞌitꞌuurga haju.
Mag pãach pꞌitꞌur hapimaaugauta mua pãrag mag jaau chirʌm.
29 Hĩchab mua pãrag magam hig chirʌmʌn mʌgau keena:
Kꞌĩir heyaa habat,
mʌg jẽb gaai chan ya tag maach pöm wënʌrrabaju.
Mag ya maach Pör Cristo bëeimʌʌ sim haawaita,
hʌʌi paraa chirawiajã,
dich hʌʌi dʌ̈ipaita hogdʌba kꞌëkꞌëu haju kꞌãyau,
hʌ̃rcha maach Pör Cristo hatꞌeeta nem wajapꞌa wauju haai nʌm.
30 Hökꞌĩirjuu nʌm kꞌʌʌnjã,
maach Pör Cristo bëeimʌʌ sim kꞌapꞌʌ haawai hoob hatcha kꞌoopaan sʌrkꞌa nʌm kꞌʌʌnjö hamiet.
Maimua har honee nʌm kꞌʌʌnjã,
mag hi bëeimʌʌ sim kꞌapꞌʌ naawai,
hoob dau lököo hamiet.
Hamach pꞌatkꞌonau nem për hau nʌm kꞌʌʌnjã,
hoob hag dʌ̈i hich mag hëumeeju kꞌĩirjumiet.
31 Mʌg jẽb gaaim nem hatꞌee pör wajapꞌa haajem kꞌʌʌnjã,
magʌm nem chukꞌumjö hãba Hẽwandam hatꞌee nem waujuuta hẽkꞌabat.
Maadëu kꞌapꞌʌ nʌm,
mʌg jẽb gayam nemen tꞌum höwia hich mʌg durrjã chukꞌu haadëju.
32 Magua mua chan pãrag mʌg jẽb gayam nemta hʌ̃rcha kꞌĩirju nʌʌ hapimapꞌa chirʌm.
Hẽwannaan hʌʌinpan kꞌãyau jua par nʌm,
maach Pör Cristo hatꞌee hʌ̃rcha nem wajapꞌam waunaa hi dau na wajapꞌa wënʌrrajuuta kꞌĩirju nʌʌ haag.
33 Mamʌ mag kꞌãyau jũrr hʌʌi paraam magcha jua par kꞌaba sim Hẽwandam hatꞌee,
hí hichdëuta hamachdëu nem hig nʌmjã kꞌapꞌʌ hagpierr nʌnʌʌu hawia hich hʌʌi dʌ̈ijã hogdʌba sĩsipꞌʌm haawai.
Wajapcharan hʌʌi paraa simʌn tꞌoopꞌem numí simjöta sim,
Hẽwandam hatꞌeejã nem waunaa hich hʌʌi dʌ̈i sĩsip haagjã hagjö.
34 Hʌʌijã hĩchab hich hagjöta sim.
Chi hich hap simua hãba maach Pör Jesucristo dau na nem wajapꞌa wauju kꞌĩirjugta kꞌĩirju sim,
hich mor maimua hich hakꞌaarjã Hẽwandam hatꞌeeta wai sĩewai.
Pari jaai paraamua magbaju,
hirua degam nem gaaijã pʌrnaa hĩchab hich jayau nem mag habaawaijã hagpierr haadëp sim haawai.
35 Mua mag chirʌm chan sĩi pãar jaain jʌrpimaaugaujã kꞌaba,
pãach hʌ̈u wënʌrramkꞌĩirta mag chirʌm;
mag hõor dʌ̈i paawaijã magʌm gaaimua hamach hapꞌam kꞌʌʌnjö jua parcha kꞌaba haawai pöd Hẽwandam hatꞌee wajappai nem waubaju kꞌapꞌʌ chiraawaita mag chirʌm.
36 Pari hãbmua kꞌãijã,
“Ya mʌ chi jöoi chiraawai mʌch hʌʌidam hauwia hag dʌ̈ita mʌ hʌ̈u chirsiju” ha kꞌĩirju sim kꞌai,
hichdëu kꞌĩirju simjö haju haai sim.
Magan hichdëu hiek dee wai sim hʌʌi dʌ̈i warre jua pʌrju haai sim;
mag jua pʌrbarm pekau kꞌabam.
37 Pari deeum hagjö chi jöoi hẽwan sim,
magua kꞌĩirju sĩi hawia,
“Mʌ hich jãg mʌch hap hʌʌin kꞌĩirjã kꞌaugba chitaju” hamʌn,
magan mag hichdëu kꞌĩirju simjö haju haai sim,
hʌʌi hauba;
magjã nem wajaug sim.
38 Wajapcharan mʌgta sim:
Ya pãach jaai hawaag,
wa hemkꞌooirau kꞌai hichdëu hiek dee wai sim dʌ̈i warre jua pʌrwiata pamʌn nem wajaug sim.
Mamʌ jaai hauba,
maimua chi hemkꞌooiraujã hʌʌi hauba,
pãach happai wënʌrrʌmjã pekau wauba wënʌrraju hawia jua pʌrba hakꞌiinjã wajapcha sim.
39 Hʌʌi jaai paraamʌn,
chi jaai meebam haiguin hich jaai gaai jʌ̃gadau jʌ̃ simjöta sim,
pöd pʌajujã kꞌaba.
Magarrau chi jaai meebaadeewain chadau hich hap sĩsiewai deeum jaai hauju haai sim.
Pari majã parhoobam kꞌʌʌn dʌ̈ijã kꞌaba,
hagjö Hẽwandam hiek hʌ̈kꞌa sim dʌ̈ita jua pʌrju haai sim.
40 Pari mua kꞌĩirjuawai mag kꞌoopaa hʌʌi tag jaai hauba hich happai nʌrrakꞌiin,
hí honeecha hʌrraju.
Maau mʌ kꞌĩirjugan.
Mua pãrag mag hiekꞌa chirʌmʌn,
mʌchdëupai kꞌĩirjuawaijã chadcha Hẽwandam Hakꞌaar mʌch gaai wai chiraawaita pãrag mag chirʌm.