1 CORINTIOS
Nacharam hẽsap Pabloou Corintopienag pꞌã deepʌ̈itarr
Salud
1
Mʌʌn Pabloou,
maach Pör Jesucristo hiek jaaujem kꞌamkꞌĩir hich Hẽwandamaucha jʌr hautarr.
Cristo gaaimua maach kꞌodam Sóstenes dʌ̈imua
2 mʌg hẽsap pꞌã deepʌ̈i chirʌm,
pãar jam Corinto pꞌöbör heem iglesia hee Hẽwandam hiek hʌ̈kꞌa nʌm gaaimua maach kꞌodkꞌanaa har Cristo gaaimua sĩi hãba hi hatꞌeepai wënʌrrʌmua hi pꞌöbörkꞌa nʌm kꞌʌʌnag,
maimua mag tag har parhooba hamach nʌnʌidʌmpierr maach dënjö maach Pör Jesucristoog jëeujem kꞌʌʌnagjã hagjö kꞌap hamkꞌĩirta mʌg hẽsap pꞌã deepʌ̈i chirʌm.
3 Muan maach Haai Hẽwandamagjã jëeunaa maach Pör Jesucristoogjã jëeu chiraajem,
pãar hʌ̈u wai nʌm dʌ̈i hĩchab kꞌõinaa wai wënʌrramkꞌĩir.
Jesucristo gaaimua Hẽwandamau maach dʌ̈i hʌ̈u hanʌm
4 Muan jëeub kꞌaba hich mag Hẽwandamag hʌ̈u hajim ha chitaajem pãar kõit.
Jãg Jesucristo gaaimua Hẽwandamau pãach hʌ̈u wai sim paarjã hĩchab mua hʌ̈u hajim haajem.
5 Hich jãg Jesucristo gaaimuata Hẽwandamau hʌ̈u hich hiek jaau kꞌaug hapiwia kꞌĩirjug pömjã deebarm haig,
pãrag pꞌatkꞌon pömta deebarm kꞌãaijã hʌ̈uchata hajim pãar dʌ̈i.
6 Mag deebarmua Cristoou maach peerdʌ haaujem ha pãrag jaau chirarrjã chadcha mʌchdëu jaautarrjö habarm pãar dʌ̈i.
7 Mag gaaimua hĩchab pãrau mʌg jẽb gaai maach pör Jesucristo bëeju nʌ nʌm horajã nem kꞌĩirpierr Hẽwandamau waupiju hayaam nem wawaag hichdëucha hag jua tꞌeegjã tꞌum deetarr haawai tag deeum jua tꞌeeg higba nʌm.
8 Mag maach Pör Jesucristo bëem hed ni hãbmuajã pãachdëu nem kꞌaigba wautarr higwia pãach kꞌĩir hiekꞌam hugua,
hich mag Hẽwandamauta pãar hich dʌ̈i hubʌ pꞌë wai nʌrraju.
9 Hẽwandamau hichdëu nem magju ha hiekꞌatarran,
bʌ̃ʌrjã sëukꞌaba chadcha hich mag nem wau sĩerrʌm.
Hẽwandam mag sĩerrʌmuata pãar tꞌʌ̃rkꞌa haujim,
hich Hiewaa hanaa maach Pör Jesucristo dʌ̈ita hogdʌba wënʌrramkꞌĩir.
Hõor hamach iglesia heepai sĩi pappierr tꞌʌnʌmjö tꞌʌnarr
10 Kꞌodamnaan,
muan pãragan maach Pör Jesucristoou hapiejemjö hihãbata habat ha chirʌm,
sĩi jãg dich iglesia heepaijã pappierr tꞌʌnʌmjö kꞌaba.
Magju kꞌãai kꞌajapꞌa kꞌõinaa nʌmua kꞌĩirjug hãbata haajeetꞌʌ̃.
11 Kꞌodamnaan,
mua pãrag mag chirʌmʌn,
mau maach kꞌodam Cloe haiguim kꞌʌʌnau mʌrʌg jaaucheewai mag pãar kꞌõinaajã kꞌaba jũrr chikꞌam hipeer hahau haajem hanaawaita mag chirʌm.
12 Ham hiek mag pãar hee hãaur kꞌʌʌnau,
“Mʌʌn Pablo dënëu” haajem hanʌm;
wa “Mʌʌn Apolos dënëu” habaawai,
jũrr hãbmua “Mʌʌn Pedro dënëu”;
wa magbam kꞌai tagam kꞌʌʌnau jũrr,
“Maran Cristo dënëugui” haajem hanʌm mua maumua hũurwai.
13 Pãrau hoowai,
¿Cristo nem tꞌoopꞌem kꞌapanta sĩ mag hiekꞌaag?
¿Wa mʌch cha pãrag hiekꞌa chirʌmta pãar kõit pakuls gaai meerpꞌë tꞌõjĩwa?
Wa magbam kꞌai pãar pör choowai,
¿pãar mʌ tꞌʌ̃r gaaita pör choojierrá?
14 Jãgju kꞌapꞌʌmjö hʌ̈uchata jãg pãar heem kꞌʌʌn mua kꞌapan pör choobajim.
Hãba mua pör chootarr kꞌʌʌnan,
Crispo Gayo dʌ̈ipaita mua pör choojim.
15 Magtarr haawai ni hãbmuajã mʌ tꞌʌ̃r gaaita pör choojim haju kꞌaba sim.
16 (Hãaa,
maimua hĩchab mua pör chootarran,
Estéfanas di haiguim kꞌʌʌnjã mua pör choojim.
Maimua mag tag mua hõor pör chootarr kꞌai,
kꞌĩir hee paba chirʌm.)
17 Mag nʌm dʌ̈i hõor pör choomkꞌĩirjã Cristoou mʌ pʌ̈ibajim.
Hirua mʌ pʌ̈itarran,
sĩi hichdëu hõor peerdʌ haaujem hiek jaaumkꞌĩirta mʌ pʌ̈ijim.
Mag jaau chitʌmjã,
mamʌ mʌchdëu jaau kꞌapꞌʌ chirʌm hawia sĩi tꞌetꞌemnaanau hiekꞌaajemjö hiekꞌamamuajã jaaubajim,
heeu magba hakꞌiin hõor jʌ̃gdaar hũrimʌ hiekꞌabaadeewai warag pakuls gaai Cristo meerpꞌë tꞌõotarr hiekta higba mʌchta tꞌö hiekꞌam hugua hawia.
Cristota Hẽwandam jua tꞌeeg hanaa hi kꞌĩirjugau
18 Jesucristo pakuls gaai meerpꞌë tꞌõotarr hag hiek jaau nʌmʌn,
har mʌg jẽb gaaiwe hokꞌoo nʌm kꞌʌʌnau hũurwai,
sĩi parhooba kꞌĩir lököom kꞌʌʌnau nem jaau nʌmjöta hũurjerram.
Mamʌ mag sim jũrr ya mʌg maach hʌ̈u peerdʌwi nʌm kꞌʌʌnagan,
wajapcharan maachigma,
maachigan maata hante warag Hẽwandam jua tꞌeegau.
19 Hich mag hiek higwia Hẽwandamau hich hiekꞌamam pꞌãpitarr gaai jaauwai,
Hẽwandamau hich higwi,
“Hõor hamach kꞌĩirjugpai tꞌöwia mʌch higba haajem kꞌʌʌnjã warag kꞌĩirjug chukꞌumjö hapʌ̈inaa
hidëu hich pör höpꞌërgau kꞌĩirjug pöm sĩewiajã higba warag mua ham kꞌĩirjug hisegpʌ̈imaju” ha hiekꞌamajim hich Hẽwandamau. (Is 29:14)
20 Magtarr haawai kꞌan wajaug sĩ har hamachta chi kꞌapꞌʌm kꞌapꞌʌm haajem kꞌʌʌn kꞌĩirjug wa chi machnaan kꞌĩirjug kꞌãijã,
maimua kꞌan wajaug sĩ har sĩi hamach kꞌĩirjug jawaag sĩi parhoobam nem hig hiyʌ̈ʌ nʌmua hamach kꞌapeen kꞌĩupaa sĩsiu haajem kꞌʌʌn kꞌĩirjug.
Mʌg jẽb gaai hõor kꞌĩirjug kꞌaug sĩsidʌm kꞌʌʌn kꞌĩirjug Hẽwandamau hichdëu hõor peerdʌ haaujem hiek dʌ̈i hoowain,
sĩi bʌ̃ʌrjã serbiibamjöta sĩsidʌm,
mʌgʌm kꞌĩirjugau hi haar hõor barpieg hirig chan bʌ̃ʌrjã maadëu nem higba sĩsid haawai.
21 Wajapcharan Hẽwandamau hõrau hamach kꞌĩirjugaupai chan hich kꞌaugbaju kꞌapꞌʌ sĩerr haawai hich hiek jaau nʌm hʌ̈kꞌa nʌm gaaimuata hõor peerdʌ haaujem.
Hamau hamach kꞌĩirjugta wajaug tꞌöwi jũrr Hẽwandam hiekta serbiibag pꞌeejeeb mamʌ,
mag hamau serbiibag pꞌë nʌm hʌ̈kꞌa nʌmuata Hẽwandamau hõor peerdʌ haaujem.
22 Judionaanaun sĩi hamach dakꞌĩir hag na hõrau nem hooba haajemta hamach dakꞌĩir waupim kꞌõchkꞌa tꞌʌnʌm;
pari mag wauba haawaita mag maach peerdʌajem hiek jaauwaijã hʌ̈kꞌaba tꞌʌnʌm.
Maagwai jũrr griegonaanau warag nem tꞌum kꞌapꞌʌm haajem kꞌʌʌn hiek hũrm kꞌõchgauta hamachig maach peerdʌajem hiekdam jaauwaijã hʌ̈kꞌaba tꞌʌnʌm.
23 Mamʌ maraun hãba hõrau Cristo pakuls gaai meerpꞌë tꞌõotarr hiekta jaau wënʌrrʌm.
Mamʌ mag hiek judionaanau hũurwain,
hamagan hamau kꞌĩirjuawai Cristo hajim hanaawai meeju kꞌaba sĩerr meetarr haawaita marau hi hiek jaau wënʌrrʌm hũurwaijã sĩi chad kꞌabamjöta hũurjem.
Maimua jũrr judionaan kꞌabam kꞌʌʌnau hũurwai,
hamagan maar sĩi serbiiba kꞌitꞌëem kꞌʌʌnau nem jaau nʌmjöta sim.
24 Mamʌ par hamau mag naawiajã,
judionaanau wa judionaan kꞌabam kꞌʌʌnau hawiajã har hich Hẽwandamaucha tꞌʌ̃r hautarr kꞌʌʌnagan mag Cristo cha marau jaau wënʌrrʌmta hich Hẽwandam jua tꞌeegau,
haguata hõor peerdʌ haaujeewai.
Mag Cristo meebarmua maach peerdʌjuuta Hẽwandamau hag nawe kꞌĩirju wai sĩerr haawai cha marau jaau nʌmjã chadcha hich Hẽwandam kꞌĩirjugta jaau naabahab.
25 Wajapcharan mag Hẽwandam kꞌĩirjug hanʌmjã sĩi serbiiba kꞌitꞌëem kꞌĩirjugjö simta hõor kꞌĩirjug chi wajapꞌam hanʌm kꞌãaijã chi wajapcharamʌu.
Wajapcharan mag Cristo Hẽwandam jua tꞌeeg hanʌmta serbiibamjö hʌdʌraa hich tꞌõopibarmua jũrr mʌg jẽb gayam kꞌʌʌn jua tꞌeeg kꞌãaijã nem jua tꞌeeg hʌ̃rpai sĩsijim.
26 Hẽwandam gaaimua kꞌodamnaan,
pãrau kꞌapꞌʌ nʌm,
pãar heem kꞌʌʌn chadcha pãach kꞌapeen mʌg jẽb gayam kꞌʌʌn daarjã kꞌĩirjug hatꞌee chi machnaan chan kꞌapanjã kꞌaba,
hikꞌötöota durrum dʌ̈i chi tꞌierrnaanjã wajappai chukꞌu,
ni sĩi bigaaum kꞌʌʌnau tꞌö hiyʌ̈ʌ haajem kꞌʌʌnjã chukꞌum.
Pari mag serbiibamjö durrab mamʌ,
pãarta Hẽwandamau higjim.
27 Wajapcharan kꞌĩirjug meraam kꞌʌʌnta Hẽwandamau jʌr haujim,
jũrr mʌg jẽb gaaim kꞌĩirjug hatꞌee chi machnaan hanʌm kꞌʌʌnta jũurwia ham kꞌĩir naaupieg.
Maimua sĩi serbiibamjö sĩsidʌm kꞌʌʌnta jʌr haujim hagjö hich Hẽwandamau,
jũrr makꞌʌʌn gaaimua chi jua tꞌierrnaan hanʌm kꞌʌʌnta kꞌĩir naaupieg.
28 Mag bʌ̃ʌrjã nem higba sĩsidʌm kꞌʌʌnta hõrau kꞌa hisëe haajem kꞌʌʌn dʌ̈i jʌr haujim,
wajapcharan mʌg heegarpai haawain har sĩi pasurjöpai kꞌitꞌëem kꞌʌʌnma,
makꞌʌʌnau jũrr nem wajapꞌamjö sĩsidʌm kꞌʌʌnta hisegpʌ̈iwia ham kꞌãaijã wajapcha haag.
29 Magtarr haawai ni hiwiir hãbmuajã hich kꞌĩirjug kꞌaug chirʌm hawia Hẽwandam na hich tꞌö hiekꞌaju haai kꞌaba sim.
30 Maimua pãachin chadau hich Hẽwandamauchata pãar Jesucristo bʌ̈ hogdʌba pꞌë wai sĩebma.
Hich mag Cristo gaaimuata hĩchab maadëu Hẽwandam kꞌĩirjug wai nʌm;
hi gaaimuata ya peerdʌwia sĩi pekau chukꞌu harrjö nʌm;
hi gaaimua hĩchab Hẽwandam hiek hʌ̈kꞌa nʌmua warag bãau wëtum;
hich Jesucristo gaaimuata Hẽwandamau maach për hautarrjö naawai hi dënkꞌa nʌm;
mag hi dënkꞌa naawai hãba hichigpaita jëeupiejem.
31 Maguata hĩchab Hẽwandam hiek pꞌã sim gaai jaau simjö,
“Hãbmua kꞌãijã wir haig hichpai tꞌö hiekꞌaju kꞌĩirju sim kꞌai,
warag maach Pör Hẽwandamta tꞌö hiekꞌaju haai sim.” (Jr 9:23-24)