Judionaanta Hẽwandamau hich hõorkꞌa hawaag jʌr hautarr
11
¿Pãrau kꞌĩirjuawai,
Hẽwandamau hich hõor hiseg wai simjö sĩ?
Mag kꞌabam.
Mag hakꞌiin mʌjã hirua nawe hisegpʌ̈ikꞌam,
mʌchjã hĩchab judionaan dʌ̈i tꞌʌ̃r hãba chiraawai.
Mʌʌn maach jöoin Abrán kꞌararr hag chaain hewagam kꞌʌʌn Benjamín haajerr hag chaain dënëu.
2 Hẽwandamau warrgarwe hichdëu hõor jʌr hautarr kꞌʌʌn chan hisegba sim.
¿Pãrau kꞌĩir heyaa kꞌaba nʌ,
warr jöoingar Hẽwandam hi jaaujem kꞌʌʌn pöm kꞌëchtarr jaar jöoi Eliaau Hẽwandamag jëeumamua ya hi hich happaita chirʌm ha hiekꞌatarr?
3 Hirua Hẽwandamag,
“Señor,
pʌ hi jaaujem kꞌʌʌn tꞌumaa wir haig maach meeun judionaanaupai kꞌëchpʌ̈iwia,
pʌrʌg jëeujem deg nem hinag pꞌaajemjã hãrkꞌʌʌipʌ̈iwi,
hãba mʌch happaita chirʌmgui” hajim.
“Mag mʌch happai chirʌm hãba,
mʌjã dʌ̈i tꞌõopʌ̈im hig nʌmgui” hajim. (1 R 19:10,14)
4 ¿Pari pãrau hagjö kꞌaugba nʌ,
Hẽwandamau hirig,
“Elías,
pʌ pʌch happai kꞌaba sim;
pʌ dënjö mʌ kꞌõsi nʌm hiekꞌau bʌ̃ʌrjã Baalag jëeuba harr kꞌʌʌn siete mil pꞌë wai chirʌm” ha hiekꞌatarr? (1 R 19:18)
5 Maagwai hich Hẽwandamau Eliaag magtarrjö,
hĩs hewag pawiajã hĩchab hagtꞌa mag warrgarwe hi hõorkꞌa tꞌʌnʌm kꞌʌʌnan hagtꞌa tꞌʌnʌm.
Pari mag tꞌʌnʌmʌn,
hich Hẽwandamjã hõor dʌ̈i wajapꞌa kꞌitaawai hʌ̈u hich garmuata maach dau haug kꞌaugwi mag hich hõorkꞌa hawaag jʌr hautarr gaaimuata mag tꞌʌnʌm.
6 Mag hõor dʌ̈i wajaug kꞌitaawai hich garmuata maach jʌr hautarr haawai,
pöd hi dau na wajapꞌa naawaita hirua maach jʌr haujim hajujã kꞌaba nʌm.
Mag hakꞌiin,
mag dich wajaug nʌm paarta pꞌag nʌmjö haawai,
ya hich Hẽwandamau hich garmuata maach dau haug kꞌaugjim habakꞌam,
hich hõor kꞌamkꞌĩir.
7 Wajapcharan mʌgta sim:
Judionaan tꞌum chan Hẽwandamau wajaug paapʌ̈ibajim,
hamachdëu nem wau nʌm paarta hirig hamach hajaug paapim kꞌõsi narr haawai.
Hãaur kꞌʌʌn Hẽwandamau hich garmua jʌr hautarr kꞌʌʌnpaita chadcha pekau chukꞌu haajerrjö wajaug paapʌ̈ijim;
pari tagam kꞌʌʌn hichdëu jʌr hauba harr kꞌʌʌnan hichdëuta warag ham tꞌãar tꞌeeg hapijim.
8 Har hagtꞌa mag tꞌʌnʌm kꞌʌʌn higwi hich Hẽwandamau hich hiek gaai jaauwai,
“Mua ham dau kꞌĩpinaa kachpa kꞌĩpi hauju” ha sim,
“hoo nʌmta hoobamjö hamkꞌĩir,
maimua hũr nʌmta hũrbamjö hamkꞌĩir.
Magtarr haawaita hĩs hewag pawiajã hich hagtꞌata sĩsidʌm ha sim Hẽwandamau,
hichig hamach wajaug paapijujã kꞌĩirjuba.” (Dt 29:4; Is 29:10)
9 Maimua hĩchab Hẽwandam hoomapꞌam kꞌʌʌnag mag kꞌĩirjupimaaugau,
jöoi David kꞌararraujã hirig jëeumamua magjim:
“Hẽwandam,
har riknaan pʌch hoomapꞌam kꞌʌʌnag hidëu hamach pꞌiesta hatꞌee tꞌach pöm wauwi kꞌöpibá,
juau hogtꞌom pʌch dau na wajapꞌa naawaita mag pꞌiesta kꞌamkꞌĩirjã pua hamachig nem tꞌum dee chirʌm hamkꞌĩir.
Pari hamachdëupain mag nʌm gaaimua pʌ dʌ̈i wajapꞌa nʌm hanʌm hee,
pʌchdëupai ham gaai mas deebá.
10 Dau pꞌuu nʌmta warag ham dau kꞌĩsumjö hapibá,
hamach kꞌaigba nʌmjã kꞌaugba hamkꞌĩir.
Mag nʌm dʌ̈i hĩchab nem chʌkꞌʌmta wai wënʌrrʌmjö,
hidëu ham hich mag pꞌitꞌurg hau wënʌrrapibá” hajim Daviiu,
Hẽwandam hoomapꞌam kꞌʌʌn higwia. (Sal 69:22-23)
Judionaan kꞌabam kꞌʌʌnjã hʌ̈u peerdʌtkꞌaju haai nʌm
11 Magan jãgáwa.
“¿Judionaanau mag Cristo higba harr gaaimua,
magan warreta Hẽwandamau ham hisegbapʌ̈ib?”
kꞌãijã haju hãbmua.
Pari mag kꞌabajim.
Magju kꞌãai hante mag maach meeunau Hẽwandam hichaaur hawi Cristo higba harr gaaimua,
jũrr judionaan kꞌabam kꞌʌʌnta hʌ̈u Hẽwandamau peerdʌtkꞌa haumam,
mag judionaan kꞌabam kꞌʌʌnauta hʌ̈kꞌa pꞌöbaadëm hoowia judionaan hiekkꞌõr wauwi hagjö hʌ̈kꞌamkꞌĩir.
12 Magua kꞌapꞌʌ habat:
Mag judionaanau Cristo higba harr gaaimua jũrr judionaan kꞌabam kꞌʌʌn dʌ̈ita Hẽwandamau dʌ̈rrcha hʌ̈u haajem kꞌai,
magan judionaan tꞌumaam kꞌʌʌnau Hẽwandam hiek hʌ̈kꞌa pꞌöbaadeewai chará,
hagjö Hẽwandamaujã hĩchab hʌ̈uchata haju ham dʌ̈ijã.
13 Judionaan kꞌabam kꞌʌʌn,
mua pãrag magkꞌim hĩchab:
Mʌʌn chadcha hich Hẽwandamauta jʌr haujim,
pãar hee hich hiek jaaumkꞌĩir.
Magua,
mʌch meeun dʌ̈i hiyʌ̈ʌ haawai maata muan hamag jajaau haajem,
14 mag hũrbaawai hiekkꞌõr wauwi hagjö pãar dënjö hʌ̈kꞌabaawai hĩchab hãaur kꞌʌʌn kꞌãijã Hẽwandamau peerdʌ haumamkꞌĩir.
15 Hẽwandamau mag judionaanag hooba sĩutarr gaaimua pãar judionaan kꞌabam kꞌʌʌnagta jũrr hich dʌ̈i kꞌõinaa wënʌrramkꞌĩir hich hiek hʌ̈kꞌapi simʌn,
chadcha wajaug sim.
Pari mʌg hatag hichdëu judionaanagpa hʌ̈kꞌapibarm hedta wajapcha haju.
Magbarm haigta mag hi higba narr gaaimua kꞌëch nʌmjö narrjã deeu pꞌiidʌtkꞌabarmjö nʌisiju.
16 Pãrau kꞌapꞌʌ nʌm,
pabʌ̈jã jẽb hõtag hee simʌn,
tꞌum chi piu nenergjã hë hõttꞌo tꞌʌnaaju.
Mag sim haig hich jöoi Abranta chi pabʌ̈jö sĩebahab,
maagwai judionaan chi piu nenergjöta tꞌʌnʌm.
Magua,
hich jãg warrgar maach jöoin Abrán kꞌararrjã hich Hẽwandamaucha jʌr hautarrjö,
hĩs hewagam judionaanjã hichiita Hẽwandam hõorkꞌa wënʌrraju,
hamjã mag jöoi chaain haawai.
17 Pari judionaan mag olivo chaar gaaim chi piu nenergkꞌa narrta,
hamachdëu hʌ̈kꞌaba harr gaaimua sĩi chi piu kꞌõgkꞌatarrjö naabahab.
Maagwai pãar chi judionaan kꞌabam kꞌʌʌn hʌ̈u hʌ̈kꞌa wëtum kꞌʌʌnta,
pãachdëu hʌ̈kꞌa nʌm gaaimua mag kꞌõgkꞌatarr gaai olivo wëeta tꞌaapꞌë jĩirtarrjö naabahab.
Mag deeum pa gaaita sũrkꞌa höbër nʌmjö nʌm gaaimua,
hich Jöoirau Abranag nem deeju jaautarrjö,
pãraujã hʌ̈u hĩchab hi jua heem nemdam hauba haajeeb.
18 Pari Hẽwandamau judionaan hisegwia mag olivo piu kꞌõgkꞌatarrjö nʌm daar,
pãachdëuta hʌ̈u hʌ̈kꞌa nʌm hawia hoob jũrr ham kꞌa hisëe hamiet.
¿Pãrau kꞌapꞌʌ naabá,
pabʌ̈jã chi piúata wai dʌnaaba chi kꞌarauta wai dʌnaajem?
Hich hagjöta naabahab pãarjã,
judionaan chi kꞌaarkꞌa nʌm gaaimuata sĩi pãarjã sũrkꞌa nʌmjö naawai.
Magua judionaan chukꞌumuan,
pãrau pöd Hẽwandam kꞌaugbakꞌam.
19 Pari magbaa hãbmua kꞌãijã,
“Hãa,
pari mag chi piu kꞌõgkꞌatarr jũrr mʌchta chi nemjĩir chaar kꞌãaijã wajapcha chiraawai,
¿mʌʌta hag gaai sũrkꞌamkꞌĩir kꞌabajĩ?”
kꞌãijã haju.
20 Mamʌ pãadë kꞌĩirjubat:
Hẽwandamau ham dʌ̈i chadcha mag papiu kꞌõgkꞌabapʌ̈imjö hajim,
hich hiek hʌ̈kꞌaba harr kõit.
Pari pãar chan chi kꞌaar chaar kꞌabam;
pãran sĩi ham kꞌãai hʌ̈kꞌatarr gaaimuapaita mag sũrkꞌa tꞌʌnʌmjö nʌm.
Mag naawai hoob pãach tꞌömiet.
Magju kꞌãai hiekꞌaawaijã hagpierraata hiekꞌabat.
21 Pãadë wajapꞌa kꞌĩirjubat:
Hẽwandamau hamta hich garmua jʌr hautarr kꞌʌʌn haawai hamachta chi pabʌ̈ chaarkꞌa narrjã mag hich hisegbaawai ham gaai sĩi par daúa hooba harr kꞌai,
magan pãar gaai chará ham dënjö hʌ̈kꞌabamʌn hirua jua kꞌʌabacha haju,
sĩi ham gaaimuata sũrkꞌa nʌmjö naawai.
22 Pãadë mʌ hiek hũrbat,
pãrag jaaukꞌim:
Hẽwandaman chadcha wajaug kꞌitʌm hõor dʌ̈i;
pari hĩchab hõrau hich higba haawain,
ham dʌ̈i kꞌĩir masi sĩerrʌm.
Magua mag judionaan hich hiek hʌ̈kꞌaba harr kꞌʌʌn dʌ̈ijã sĩi ham gaai par daúa hoobajim.
Pari pãrau hʌ̈kꞌatarr haawai hich garmuajã pãar dʌ̈i nem wajaug sim.
Pari mag wajaug sim kꞌapꞌʌ hab mamʌ,
hichiita hirua kꞌõsi simjöta haju haai nʌm;
magbamʌn pãran warm kꞌʌʌnjö hirua hisegju.
23 Pari chadcha Hẽwandamau mag ham hisegtarrjã hamau deeu hʌ̈kꞌab kꞌaba hʌ̈kꞌakꞌiin,
Hẽwandamau deeu ham higju.
Magbaawai deeu hich hõorkꞌa hatꞌaawai hũwaai chi papiu kꞌõgkꞌatarrta sũrkꞌapi hatꞌamjö haju,
mag hatꞌeejã hi jua tꞌeeg sĩewai.
24 Pãadë kꞌĩirjubat:
judionaan olivo chaar piu nenergjöta nʌm,
Hẽwandam hõor haawai;
pari pãar judionaan kꞌabam kꞌʌʌnan sĩi olivo chi wë piujöta nʌm.
Mamʌ mag nʌmta pãachdëu hʌ̈kꞌatarr gaaimua jũrr olivo chaar bʌ̈ʌta tꞌaapꞌënaa hag hee sũrkꞌapi hatꞌamjö hajim,
hĩchab hich hõorkꞌa hawaag.
Pãar dʌ̈i magju haai kꞌaba narrta Hẽwandamau magtarr kꞌai,
judionaan chará,
hamachta mag olivo chaar piu nenergkꞌa nʌmjö naawai,
Hẽwandamau deeu sũrkꞌaímʌ sũrkꞌapi hauju,
hamach kꞌõgkꞌatarr pör gaaipai.
Hẽwandamau tꞌum hagdaujö hõor dau haug kꞌaaugjem
25 Cristo gaaimua kꞌodamnaan,
pãachta tꞌönaa pãachdëuta judionaan kꞌãaijã kꞌapcha nʌm ham hugua,
warrgar kꞌaugba haajerr hiekta pãrag kꞌap hapim kꞌõsi chirʌm.
Hiin chadcha judionaan tꞌum kꞌabam mamʌ Hẽwandam hiek hʌ̈kꞌamaaugau tꞌãar tꞌeega tꞌʌnʌm kꞌʌʌnta hʌ̃rpai tꞌʌnʌm.
Mamʌ hamau jãg hʌ̈kꞌaba nʌmʌn,
jãan judionaan kꞌabam kꞌʌʌn warrgarwe hich Hẽwandamau jʌr hautarr kꞌʌʌnau tꞌumaa hʌ̈kꞌa nʌm horapaita jãg tꞌʌnʌm.
26 Mag hich Hẽwandamau jʌr hautarr kꞌʌʌnau tꞌum hʌ̈kꞌa pꞌöbaadeewaita maar meeun chi judionaanjã dʌ̈i hagjö hʌ̈kꞌa pꞌöbaadëwi peerdʌtkꞌaju.
Maar meeunau mag hʌ̈kꞌaju higwia,
jöoi Isaiaau Hẽwandam hiek pꞌã sim gaai jaauwai,
“Jerusalén pꞌöbör heemuata woun höbërju” ha sim,
“maach peerdʌ hauju.
Maguata hewag pawijã maach chi Jacob chaainkꞌa nʌm kꞌʌʌn maach pekau heemua maach peerdʌ hauju” ha sim. (Is 59:20)
27 Maimua hagjö hich Hẽwandamau jöoi Jeremiegjã,
“Mʌchdëu hag nawe ham jöoin dʌ̈i hiekꞌatarrjö mʌchdëuta ham pekau chugpaapʌ̈iju” hajim,
maar chi judionaan higwia. (Jr 31:33-34)
28 Hĩsin maar meeun judionaan pöm sĩi hamach garmuata Hẽwandam dʌ̈i hiekkꞌõr hau tꞌʌnʌm,
maach peerdʌajem hiek hamachdëu hiseg nʌm gaaimua.
Pari hamau mag nʌm haig,
jũrr pãar hatꞌeen wajaugta sim,
mag hamau hiseg wai nʌm gaaimuata hʌ̈u pãrau hʌ̈kꞌa naawai.
Pari hamau mag hich hiseg nʌm hãba,
Hẽwandamau ham kꞌõsinaa hagtꞌa hich hõorkꞌa hauju kꞌĩirju sim,
hich garmuata ham jöoinjã jʌr hautarr haawai.
29 Wajapcharan Hẽwandamau hichdëu nem deebarm chan tag kꞌecheu hauba,
ni hich hiekꞌatarrjã deeu naspawi hichaaupapa haba sĩerrʌm.
30 Warrgarin chadcha pãrau Hẽwandamau jaau sim hichaaurta nem wau wënʌrrajim.
Pari hĩs jũrr judionaanta warrgar pãar tꞌʌnarrjö Hẽwandam hichaaur tꞌʌnaawai jũrr hĩs Hẽwandamau hʌ̈u pãarta dau haug kꞌaug sim.
31 Pari mag hĩs hamau Hẽwandam hichaaur nem wau nʌm hãba,
hichiita mʌg hatag Hẽwandamau pãar dau haug kꞌaug nʌm hoowia hamachdëujã deeu hʌ̈kꞌam kꞌõsi haju.
Mag hamaujã pãar dënjö hʌ̈kꞌabarm hedan chadau Hẽwandamau hamjã dau haug kꞌaugab kꞌaba dau haug kꞌaugju.
32 Wajapcharan tꞌumaam kꞌʌʌnta Hẽwandam hichaaur nem wau wënʌrrʌm gaaimua,
ni hãbjã hi dau na wajapꞌa sim haju kꞌabam;
ni hãbmuajã wir haigpai jãga hich wajaug paapʌ̈ijujã kꞌaugba sim.
Pari Hẽwandamau tꞌumaam kꞌʌʌnta mag wai simʌn,
judionaan wa judionaan kꞌaba hawiajã,
hich garmuata tꞌum hagdaujö hõor dau haug kꞌaugaagta mag wai sim.
33 Hẽwandamta chadcha hõor dau haug kꞌaugaag tꞌumaam kꞌʌʌn dʌ̈i wajapꞌa kꞌitʌm.
Maach kꞌĩirjug chan hi kꞌĩirjug dʌ̈i barbam.
Hichdëuta hõor peerdʌ hawaag hag nawe waujujã tꞌum kꞌapꞌʌ hajim.
Hirua hõor dʌ̈i nem wauju kꞌĩirju wai sim chan pöd hãbmuajã jaau hauba,
ni hirua nem wau simjã kꞌaugba haajem,
jãgwi jãg waumaajẽ.
Mag hãbmuajã hi kꞌĩirjug dʌ̈i barbaju higwia,
Hẽwandam hiek pꞌã sim gaai jaauwai,
34 “Kꞌaíu mʌg nʌm haig maach Pör hʌ̃gtꞌar chiraajem kꞌĩirjug kꞌapꞌʌ sĩ” ha sim.
“Kꞌaíu hirig wawí hiekꞌamaju haai sĩ,
hichdëuta kꞌapcha sim hawi” ha pꞌã sim.
(Job 15:8; Is 40:13)
Maimua,
35 “Kꞌaíu hʌ̃rcha hirig nem deewi sĩ,
jũrr hag paar hajués hirig nem jëwaag” ha pꞌã sim hagjö. (Job 41:11)
36 Nem tꞌʌnʌmʌn tꞌum hich dënëu,
hichdëuta tꞌum hompaatarr haawai.
Hĩchab nem tꞌʌnʌmʌn hi gaaimuata tꞌʌnʌm,
hichdëuta tꞌum wai dʌnaawai.
Tꞌumaam kꞌʌʌnag hich tꞌö hiekꞌamkꞌĩirta magʌm nem tꞌum hompaatarr haawai hichta mʌg hatag pawiajã hich mag tꞌumaam kꞌʌʌn kꞌãai hʌ̃rpai sĩerrʌm hiekꞌau.