3
Pari mag nʌmta hãbmua kꞌãijã,
“Kꞌan gaaimua magan maar judionaanta judionaan kꞌabam kꞌʌʌn kꞌãaijã Hẽwandam dau na hʌ̈ucha nʌmma” wa “Kꞌan wajaug sĩ,
mag pꞌʌʌrbich nʌmua dich mor gaai dauchach nʌm” hakꞌiin,
2 jaauju pöoma tꞌʌnʌm.
Pari chadcha maachta deeum kꞌʌʌn kꞌãaijã hʌ̈ucha nʌmʌn,
maach meeunagta hich Jöoiraujã tꞌumaam kꞌʌʌn hatꞌee hich hiek pꞌã deetarr gaaimuau.
3 Pari magtarrta,
¿jãg hãaur kꞌʌʌnau hʌ̈kꞌamapꞌamjö nʌmjãma?
¿Pãrau kꞌĩirjuawai ham mag nʌm gaaimua hich Jöoirau haju haajerrjã chadcha magba sĩi hich mag kꞌĩir hokꞌooju kꞌai?
4 Magju habá.
Tꞌumaam kꞌʌʌn nem sëunem hawiajã hich Hẽwandam chan sëu chukꞌu sĩerraawai hichin hiin nem hagchata jaaujem.
Maach kꞌaibag jawaagjã hich mag sĩerrʌm higwi jöoi David kꞌararrau Hẽwandam hiek gaai magjim:
“Pua hõor kꞌaibag jaauwaijã hamau,
‘Puan nem hagchata jaaubarm’ haju.
Chad kꞌabam nem hõrau pʌch gaai tꞌʌawaijã pʌchdëuta ganab kꞌaba ganju” ha pꞌãjim,
“pʌchta hagpierraa chitaawai.” (Sal 51:4)
5 Pari mag maach kꞌaigba nʌm gaaimuata warag Hẽwandam maachjö kꞌaba hagpierraa sĩerrʌmjã maadëu kꞌapꞌʌ nʌm kꞌai,
magan ¿jãgáwa?
Sĩi parhoobam kꞌʌʌnau kꞌĩirjuajemjö kꞌĩirjukꞌiin,
magan Hẽwandamau pöd hõor hamach pekau gaaimua dau hapꞌʌʌ hapiju kꞌaba sim haju haai nʌm,
mag pekau gaaimuata hich hagpierraa chitʌmjã wajapꞌa kꞌaugpiejeewai.
6 Pari ma chad kꞌabam.
Mag hakꞌiin magan Hẽwandaman hagchajã kꞌaba parhoobata nem wau sĩerrʌm hakꞌam.
Hẽwandam hichpa magta sĩerrʌm hakꞌiin,
jãga hichdëu maach hi hagkꞌam hedjã pãar kꞌaigba naajim wa hʌ̈u wënʌrrajim kꞌãijã haju maachig.
7 Wa magba hãbmua kꞌãijã pʌaba,
“Pari mag mʌch kꞌaibag chirʌm gaaimua jũrr mua hõrag Hẽwandamau hõor dʌ̈i hagpierraa nem waaujem higwia hi wajaugta pꞌëpi chirʌmjö chirʌmta,
jãga magʌm gaaimua Hẽwandamau mʌ dau hapꞌʌʌ hapibarju” haju.
8 Pari mag hamau jaau nʌmjö mag kꞌaigba nʌm gaaimua hi wajaugta pꞌëpimjö nʌm kꞌai,
jãgwi warag nem kꞌaigbamta wauju kꞌaba nʌ,
magʌm gaaimua jũrr hich mag hi wajaugta pꞌëmkꞌĩir.
Chi mag nʌm kꞌʌʌnaun hamachdëu mag kꞌĩirju nʌm gaaimuata hõrag jaauwaijã,
muan magta jaau chitʌm haajem,
magʌm gaaimua mʌ hëugar sëukꞌa nem hĩgkꞌam kꞌõchgau.
Pari chi mag nʌm kꞌʌʌnan,
Hẽwandam dʌ̈i kꞌujʌr nʌmjö nʌm gaaimua,
hi jua machag hãwatab kꞌaba hãwatju.
Maachin tꞌum pekaupanau
9 Magan ¿maachin jãgata nʌmma?
¿Maach chi judionaanta judionaan kꞌabam kꞌʌʌn kꞌãaijã Hẽwandam na wajapcha nʌ?
Magjã kꞌabam.
Maachin,
chaig mʌchdëu jaau chirarrjö,
judionaan kꞌabam kꞌʌʌn dʌ̈i hãba judionaan hawiajã tꞌum pekaupanau,
Hẽwandam hiek pꞌã sim gaai jaau simjö.
10 Mag hi hiek pꞌã sim gaai jaauwai,
“Hẽwandam dau na wajapꞌam kꞌʌʌn chan hãbjã chukꞌum” ha sim.
11 “Hẽwandamau wajapꞌa wënʌrrapi simjö chan hãbmuajã hi dënjö kꞌĩirjuba sim;
hãbmuajã hi higmapꞌamjöta sim.
12 Tꞌumaam kꞌʌʌnauta hi haar baarjem kꞌʌd hisegnaa kꞌʌd kꞌaibag garta wët tꞌʌnʌm.
Tꞌumaam kꞌʌʌnta warag hãr tꞌʌnʌisim;
hi dau na wajapꞌam kꞌʌʌn chan hãbjã chukꞌum” ha sim. (Sal 14:1-3; 53:1-3)
13 “Jãgʌm kꞌʌʌnan sĩi chikꞌam hëugar kꞌaigba hiekꞌaagpaita sĩsidʌm.
Sëukꞌa nem jaaunem sĩsidʌm” ha sim.
(Sal 5:9)
“Par hiekꞌaupai chikꞌam tꞌõojem hakꞌiin, jãgʌm kꞌʌʌnaun nemkꞌierr dënjö hõor dajẽk haju” ha sim. (Sal 140:3)
14 “Ham hiin,
sĩi chikꞌam tꞌõp hiekꞌaagpaita sĩsidʌm gaaimua hihasimjöta sĩsidʌm” ha sim. (Sal 10:13)
15 “Sĩi bʌ̃ʌr habarm gaaimua chikꞌam tꞌõojuuta kꞌĩirju sĩsidʌm;
16 hamach wënʌrrʌmpierr sĩi hõor dau hapꞌʌʌ hapijuuta hẽkꞌaajerram.
17 Hamach mag nʌm gaaimua bʌ̃ʌrjã kꞌõinaa wënʌrraju kꞌaugba nʌm” ha sim. (Is 59:7-8)
18 “Hẽwandam hökꞌö haju kꞌĩirjug chan bʌ̃ʌrjã kꞌĩir hee paba haajerram” ha sim.
(Sal 36:1)
Magta pꞌã sim hich Hẽwandam hiek gaai.
19 Chamʌg Hẽwandam ley gayam mua jaaubarm chan hoob pãrau sĩi hãba judionaan kꞌabam kꞌʌʌn hatꞌeepaita mag jaau chirʌm hamiet.
Maadëu kꞌapꞌʌ nʌm,
mʌg hiekꞌan maach judionaan hatꞌeepata mag pꞌãpijim,
maagwai Hẽwandamau mʌg durr hi hagkꞌam hedjã tꞌumaam kꞌʌʌn hamach kꞌaigba narr kꞌap,
Hẽwandamau hamach kꞌaibag wauju jaaubarm hũurwaijã sĩi kꞌĩu hi hiek hũrmkꞌĩir.
20 Chi lein sĩi maach pekau pöm kꞌitꞌëem kꞌap hapiegpaita hich Hẽwandamau pꞌãpitarr haawai mag hʌʌrkꞌa narr gaaimuapai chan pöd Hẽwandamau maachig,
“Pãar pekau chukꞌu naawai mʌ dʌ̈ijã hiekkꞌõr chukꞌu nʌm” habaju.
Jãga Hẽwandamau maach kulp chukꞌu hapäaijẽ
21-22 Pari hĩs jũrr Hẽwandamau maachig kꞌap hapi sim,
jãga mag hi dʌ̈i hiekkꞌõr pöm nʌmjö narrta pekau chukꞌu harr kꞌʌʌnjö nʌisí.
Chadcha warrgarwejã hichdëu ley pꞌãpitarr gaai jaaunaa sĩi hich hi jaaumienagjã hichdëu magju hich mag jaaupiejeejim.
Pari magjujã mag ley hʌʌrkꞌa nʌm gaaimua kꞌabam hajim.
Hĩs mag pekau chukꞌu harrjö nʌmʌn,
Jesucristo hiek tꞌãraucha hʌ̈kꞌa nʌm gaaimuata,
judío wa judío kꞌaba hawiajã,
Hẽwandamau tꞌum mag pekau chukꞌu narrjö pꞌë wai sim.
Mag Cristo kꞌurau kꞌaba hakꞌiin chan ni hãbjã peerdʌbam;
23 tꞌumaam kꞌʌʌnta hamach pekau gaaimua hamachdëupai Hẽwandamag hamach hisegpi nʌmjö hi warpta wënʌrrʌm,
hichdëu waupim kꞌõsim waujöjöopaijã kꞌaba.
24 Mag Hẽwandam warpta wënʌrrʌmjö naab mamʌ,
hí tꞌumaam kꞌʌʌn dʌ̈i wajapꞌa kꞌitaawai mag dichdëu nem hajapꞌa wau nʌm paarjã kꞌaba,
hich garmuata mag maach hi dʌ̈i hiekkꞌõr pöm narrjã higba,
Jesucristo gaaimua maach pekau chugpaawia hiekkꞌõr chukꞌu sĩi hich dʌ̈i dau parii hapiejem.
25 Warrgarwe hichdëu hõor peerdʌ haaujeewai chadcha hõor pekau wau nʌmjã hoobamjöta ham haaujeejim,
hich Hiewaa pʌ̈i nʌm hora.
Pari hĩs ya Hẽwandamau mag Jesucristota hõor kõit tꞌõmkꞌĩir pʌ̈ibarmua maachig kꞌapꞌʌ hapi sim,
chadcha warrgarm kꞌʌʌnjã hauju haai sĩejim.
Pari mag hauju hayaa hapiegan Cristo meewia hich bag hãrbarmua hichta hõor pekau chugpaajem kꞌapijim,
hich Hẽwandamau.
26 Mag,
warrgar haajerrjö hĩsjã chi Jesús hiek hʌ̈kꞌa nʌm kꞌʌʌn chan ya tag kulp chukꞌu nʌm haju haai sim Hẽwandamau,
chadcha ham kꞌaibag paarjã Jesuu hʌdʌraa hich tꞌõopitarr haawai.
27 Mag kꞌai magan Moiseeu ley pꞌã pʌarr hʌʌrkꞌa nʌmuata kulp chukꞌu nʌm hawia pöd dich tꞌöju kꞌaba nʌm.
Hẽwandamau mag maach kulp chukꞌu hapʌ̈i simʌn,
mag ley hʌʌrkꞌa nʌmua kꞌaba,
hãba Jesús hiek tꞌãraucha hʌ̈kꞌa nʌm gaaimuata mag maach kulp chukꞌu hapʌ̈i sim.
28 Wajapcharan maan mʌgta sim:
Hẽwandamaun Jesús hiek tꞌãraucha hʌ̈kꞌa nʌm kꞌʌʌnta ya tag kulp chukꞌu nʌm ha jaaujem.
Hirua mag sĩi ley gaai jaau sim hiekta hõrag hʌʌrkꞌapi jaauba sim,
hich dʌ̈i hamach pekau gaaimua kulp chukꞌu nʌm ha jawaag.
29 ¿Wa pãrau kꞌĩirjuawai Hẽwandam sĩi maach judionaan dënpaí,
warrgarwejã maach jöoinagta hich hiek pꞌã derr haawai?
¿Hí hĩchab durrpierram kꞌʌʌn Hẽwandam kꞌabá?
¿Mag hiek maach jöoinag pꞌã deetarrjã tꞌumaam kꞌʌʌn hatꞌee kꞌabajĩ?
Chadcha hichpaita durrpierram kꞌʌʌn Hẽwandamma.
30 Tag Hẽwandam chukꞌu hãba hich happaita sĩerrʌm.
Hichdëupaita chadcha Jesucristo hiek hʌ̈kꞌaa chaar hʌ̈kꞌa nʌm kꞌʌʌnan,
judío wa judío kꞌaba hawiajã,
magʌmjã higba tꞌum hãba ya bʌ̃ʌrjã kulp chukꞌu narrjö hapäaijem.
31 Magan jãgáwa.
Mag maadëu hʌ̈kꞌaa chaar hʌ̈kꞌa nʌisiewai,
¿mag ley maach hatꞌee tag baleeba haadëp sĩeb?
Baleeba sĩsim habá.
Mag baleeba hapiju kꞌãai,
mag hʌ̈kꞌaa chaar hʌ̈kꞌa nʌmuata warag hʌ̃rcha hi baleepi nʌm kꞌabáwa,
warrgarwejã hich magta Hẽwandamau hʌ̈kꞌapi jaaujerr haawai.