SAN LUCAS
Maach peerdʌ haaujem Jesucristo higwia jöoi Lucaau pꞌã pʌatarr
Salud
1
Teófilo,
kꞌapeer wʌ̈jʌ̈u:
Mʌg hẽsap gaai murua pʌrʌg jawaagpam Jesuu hõrag hiekꞌamatarr dʌ̈i hirua nem waumatarrpa hãba.
Pua kꞌapꞌʌ sim,
jũrram kꞌʌʌnau hich mʌg hiekpai pꞌã hẽkꞌa nʌm warrpem hirua nem waubaaderr haarmua hirua nem jaaumatarrpa.
Maadëu kꞌapꞌʌ nʌm,
magʌm tꞌum chadcha hajim.
Maagwai hõraujã tꞌum hich hag hiekpai maach hee kꞌakꞌapdö wëjöm,
Lucas 1:1-25
2 har warrcha hirua nem waubaaderr hamach daúacha hootarrta hõrag jaaujerr kꞌʌʌnau maachigjã jaautarrjö.
3 Maguata muajã hĩchab pꞌãju kꞌĩirjubaadëjim,
pʌ hatꞌee.
Mamʌ mʌg pꞌãju nawe,
sĩi año kꞌapan hi dʌ̈i hãba wënʌrraajerr kꞌʌʌn dʌ̈i kꞌaar haarmua kꞌĩeb hö nʌm haar estudie chirʌʌ hawia hĩsta pʌrʌg pꞌã deepʌ̈i chirʌm jöoi Teófilo.
4 Mʌg murua pʌrʌg pꞌã deepʌ̈i chirʌmʌn,
pʌchdëu tꞌʌ̃rbaawai Jesús higwia hõrau jaau nʌm pua hũurjemʌn chadcharam hiekꞌau ha kꞌap hamkꞌĩrau.
Juan tꞌaabaju jaautarr
5 Murua pʌrʌg jaaum hig chirʌmʌn mʌgau:
Herodes Judea durr reikꞌa sim jaar hĩchab sĩejim haajem pꞌad Zacarías ha tꞌʌ̃r sim,
judionaan heem.
Mag Zacarías warrgar pꞌad Abías kꞌakꞌitarr dʌ̈i hãba pꞌadnaan pꞌidkꞌaajerr kꞌʌʌn chaain hewagam kꞌʌʌn dën harr haawai hĩchab Abianaan hajim haajem.
Chi Zacarías hʌʌi Elizabed ha tꞌʌ̃r sĩejim haajem.
Majã hĩchab warrgar pꞌad Aarón ha tꞌʌ̃ʌrjerr hag chaain hewagam kꞌʌʌn kꞌa hajim hanaabá.
6 Hich mag jöoi Zacarías hanʌm hich hʌʌi dʌ̈i Hẽwandam dakꞌĩir hajapꞌa wënʌrraajeejim haajem,
hi hipierraa.
Mag gaaimua hãbmuajã ham hëugar hiek chigaapai hiekꞌaba haajeejim hanʌm.
7 Mamʌ mag wënʌrrʌmjã chi hʌʌi bʌ̃ʌrjã chaai hooba kꞌitarr haawai chaai hãbjã chukꞌu naajim haajem.
Mag chaaijã chukꞌu nʌmta ya hamach numwe jöoiraa kꞌitꞌëe hajim hanʌm.
8-9 Mag nʌm hee jũrr Abianaanta Hẽwandamag jëeujem deg pꞌidkꞌaju seman harr haawai mag jöoi Zacarías hanʌmta hag deg pꞌidkꞌa sĩejim haajem,
hich kꞌapeen hich dʌ̈i hãba pꞌidkꞌaajerr kꞌʌʌnpa,
warm kꞌʌʌnaujã semanpierr hich mag pꞌidkꞌa diichjerrjö.
Mamʌ mag pꞌadnaan kꞌapan tꞌʌnaajerr haawai hed hëepierr hãb jʌr hauwia Hẽwandam hatꞌeem incienso pꞌaan duubjeejim hanʌm.
Hamach warrgarwejã hich maagjerr haawai mag hedjã mag nʌmua jöoi Zacarías tꞌʌ̃rta höbërjim haajem,
mag incienso pꞌaag.
10 Mag hich tꞌʌ̃rta höbërtarr haawai hierr Hẽwandamag incienso pꞌaajem hag nasãd wau kꞌërʌm haar simich,
daaugajãr hamach biirdʌajem haigpaita sĩi hõor pöm Hẽwandamag jëeu kꞌodtꞌʌnaajim haajem.
11 Mag hí hagtꞌa hierr Hẽwandamag jëeu sim hee,
Hẽwandam chogta hʌ̃gtꞌarmua bëewia hi kꞌĩirpꞌee dʌnʌʌubaichëjim hanʌm,
chi incienso pꞌaajem hag nasãd wau sim bigaau juachaar gar.
12 Zacariaau mag hoo hatꞌaawai kꞌĩir hëu hawia warag jöoi kꞌa duuibaadëjim haajem,
jãpꞌierr nʌm hiekꞌau.
13 Mamʌ magbaawai chi Hẽwandam chogau hirig,
—Zacarías,
hoob jãpꞌierram hajim hanʌm.
Pua Hẽwandamag jëeu chitʌʌ haajerr hĩsta hirua pʌ hiek hʌ̈kꞌabarm:
Pʌ hʌʌi Elizabed bi hee pawia pʌrʌg chaai hoo deejugui hajim hanʌm.
Mag chaai tꞌaaba kꞌërsiewai pua hi tꞌʌ̃rdam Juan ha tꞌʌ̃rjugui hajim hanʌm.
14 Magbaawain chadau pʌ honee chirsiju.
Mag nʌm dʌ̈i hĩchab hõor pöm honee hajurau,
hi tꞌaababarm habarm hamachdëu hũr hatꞌaawai.
15 Mag chaairau bi heewe Hẽwandam Hakꞌaar hich gaai pꞌẽs wai kꞌitajugui hajim hanʌm.
Mag chaairau hich herraawe vinojã döba,
ni nag deeum kꞌĩir hawia kꞌãijã bʌ̃ʌrjã hich hi hee hauba hich mag kꞌitajugui hajim hanʌm.
16 Mag chaai jöoipawia Hẽwandam hiek jaaubaadeewaita israelnaan kꞌapaana hãsie hamach mor kꞌĩirjuwia deeu heeupemjö maach Pör Hẽwandam hiek hʌ̈kꞌajurau,
warrgar hamach jöoinau hʌ̈kꞌaajerrjö ha jaaumajim haajem.
17 Hi gaaimuata hõor hee Hẽwandamau hich jua tꞌeeg hoopijugui hajim hanʌm,
warrgar hich hi jaaumie Elías kꞌakꞌitarr dʌ̈i haajerrjö.
Hirua Hẽwandam hi jaau nʌrrʌm hũrwia,
jöoin hamach chaain dʌ̈i kꞌajap kꞌaba wënʌrraajerr kꞌʌʌnjã kꞌõinaa wënʌrranaa hĩchab hi hiek hũrmapꞌa haajerr kꞌʌʌnaujã hamach jöoin warrgarm kꞌʌʌn dënjö hi hipierraa haju,
maagwai Hẽwandamau mag ham Pörkꞌaju päaiwaijã hamach tꞌãraucha kꞌõsi hi hiek hũrmkꞌĩir ha jaauchëjim haajem chi Hẽwandam chogau.
18 Magbaawai jöoi Zacariaau,
—Mamʌ ¿jãga magbarju?
hajim hanʌm,
chi Hẽwandam chogag.
Ya mʌg mʌ jöoiraa chirʌm,
maimua mʌ hʌʌijã hĩchab hũanaa kꞌitʌmta ¿jãga mag chaai hoobarju?
hajim hanʌm.
19 Magbaa jũrr chi Hẽwandam chogau hirig,
—Zacarías,
mʌʌn Gabriel ha tꞌʌ̃ʌrjemgui hajim hanʌm.
Mʌchta Hẽwandam garcha hi bʌ̈kꞌʌrr pꞌidkꞌaajem.
Hichdëu mʌ pʌ̈iwiata pʌ haig mʌ bëejimgui hajim hanʌm,
cha mʌchdëu hiek jaau chirʌm jawaan.
20 Mamʌ mʌg murua pʌchig jaau chirʌm pʌchdëu hʌ̈kꞌaba habarm gaaimua,
pʌ meu meraa chirsijugui hajim hanʌm,
bʌ̃ʌrjã hiekꞌaba.
Maimua ya chi chaai hatꞌam hedta deeu pʌ hiek heerdʌjugui hajim hanʌm.
Murua pʌrʌg mag jaau chirʌmʌn,
chadcha tꞌum mʌchdëu cha jaau chirʌmjöo haju ha jaaumajim haajem,
chi Hẽwandam chog hʌ̃gtꞌarmua bëetarrau.
21 Magʌmich daaugajãr hõor pöm Hẽwandamag jëeuwai pos tꞌʌnarr kꞌʌʌnau hi nʌ nʌmua jũrr hamach kꞌapeenag,
—Keena,
¿jãga habarmta mʌg jöoi Zacarías jãg da höbërchëbáma?
hanaajim hanaabá.
22 Mamʌ mag nʌm hee höbërcheewaijã pöd hõrag hiekꞌaba,
hiekꞌam hig nʌmjã sĩi juaupaita jajaau haajeejim hanʌm,
pöd hiek höbërba haawai.
Magbarm haigta kꞌaugaa hapꞌöbaadëjim hanaabá,
Hẽwandamau kꞌãijã dau daau hirig hiekꞌachëwiata mag sĩsim.
Maigmua hatag hich mag jöoi meu meraa kꞌërsijim hanaabá.
23 Maimua hich pꞌidkꞌa sĩerr seman tꞌum höbër hëebaadeewai hich diig petajim haajem.
24 Maimua mag chi Hẽwandam chogau jaautꞌurtarr kꞌur chadcha jöpcha Elizabed bi heepajim hanaabá.
Mag hich jõorbaadeewai dawagjã höbërba,
cinco meses sĩi degpai sĩejim hanʌm.
25 Mag degpai simua,
“Maach pör Hẽwandamauta mʌʌn heeg hoobarmgui” haajeejim hanʌm.
“Chaai chukꞌu haawai hõor hee kꞌĩir naa hʌrraajerrjã tag mʌ chigag chukꞌu hʌrraju.
Hʌ̈ucha jãgbarm Hẽwandamau” haajeejim hanʌm.
Jesús tꞌaabaju jaautarr
26 Magtarr kꞌur seis meses dichwia nʌm hee,
Hẽwandamau hʌ̃gtꞌarmua deeu hich chog Gabriel pʌ̈ijim haajem,
jũrr Galilea durr pꞌöbördam Nazaret ha tꞌʌ̃r sim hee daupeer hõor meraa kꞌitʌm María ha tꞌʌ̃r sĩerr haar.
Lucas 1:26-56
27 Mag daupeer woun hãb José hanʌm dʌ̈i jua pʌraag ya hiek deewi sĩejim haajem.
Mamʌ mag hiek deewi nʌmjã José bʌ̃ʌrjã hagtꞌa María dʌ̈i kꞌapes haba naajim haajem.
Chi José hanʌm warrgar rey David kꞌakꞌitarr hag chaain hewagam kꞌʌʌn dën hajim haajem.
28 Mag hich chogbapäaiwai chi Hẽwandam chog bëewi chi daupeer sim haar dubwia hirig,
—¿Jãgpai hʌ María?
Honee habá haichëjim hanʌm.
[Hẽwandamau nem hajapꞌa haag hʌʌin kꞌapan tꞌʌnʌm hee pʌʌta jʌr hatꞌam.]
María,
chadcha Hẽwandam maach Pöröu pʌʌta heeg hoobarmgui hajim hanʌm hirig.
29 Mag hũrbaawai kꞌĩirju sĩi hawia hich hödegpai “¿Jãgwia hirua mʌrʌg mag hiekꞌabaichë?”
hajim hanʌm.
30 Magbaawai chi Hẽwandam chogau,
—Hoob kꞌĩirjum,
pʌʌta Hẽwandamau hʌ̈u heeg hoobarbahab hajim hanʌm.
31 Pua chaai hemkꞌooidam paarpaju.
Mag chaai Jesús ha tꞌʌ̃rbá hajim hanʌm.
32 Hichta tꞌumaam kꞌʌʌn kꞌãai hʌ̃rʌʌcha sĩerraju,
maimua hichpai Cha Hʌ̃gtꞌaa Pꞌuu Nʌm hag Hiewaa ha tꞌʌ̃rjugui hajim hanʌm.
Maagwai maach Pör Hẽwandamau hirigta israelnaan tꞌumaam kꞌʌʌn Reikꞌapiju,
warrgar pãach jöoin David kꞌararrag kꞌapitarrjö.
33 Mag hichta tꞌumaam kꞌʌʌn Pörkꞌabaadëm haigmua hatag hi jua tꞌeeg bʌ̃ʌrjã höba,
hich mag sĩerraju ha jaaujim haajem.
34 Magbaawai Mariaau chi Hẽwandam chogag,
—Mamʌ mʌg hagtꞌa mʌ hõor meraa jaaijã chukꞌu hʌmta,
¿jãga magbarjuma?
hajim hanʌm.
35 Magbaawai chi Hẽwandam chogau magjim hanʌm:
—Jãan hich Cha Hʌ̃gtꞌaa Pꞌuu Nʌm hag Hakꞌaar pʌ gaai sĩeicheewaita pʌ jõorjugui hajim hanʌm,
hich hiiu haawai.
Mag gaaimua mʌg chaai pua hoobarm bʌ̃ʌrjã kꞌaibag chukꞌu hauwia hich mag kꞌitaju.
Hich Hẽwandamauta hich hiiu pʌ bi hee papi sim dën haawai hi tꞌʌ̃r Hẽwandam Hiewaa ha tꞌʌ̃rjugui ha jaaujim haajem.
36 Maimua warag hirig,
Pʌdë hũrbá hajim hanʌm,
pʌ naamhũan Elizabed hũanaa kꞌitab mamʌ,
hiruajã chaai hemkꞌooi paarpajugui hajim hanʌm hĩchab.
Hõrau pöd hirua chaai hoobaju haajerrjã ya seis meses simgui hajim hanʌm,
bi hee patarr.
37 Hẽwandam hatꞌee chan bʌ̃ʌrjã pꞌitꞌurm nem chukꞌumgui hajim hanʌm.
38 Magbaa Mariaau magjim hanʌm:
—Mʌʌn Hẽwandamau nem jawaata hũr hʌmgui hajim hanʌm,
hichdëu nem jaaubarmpierr haag.
Mag kꞌai magan Hẽwandamau cha pua jaau simjö haju haai sim mʌ dʌ̈i hajim hanʌm.
Mag jaau pʌawia chi Hẽwandam chog deeu hʌ̃gtꞌar petajim haajem.
Mariaau Elizabed hoon matarr
39 Mag Hẽwandam chogau hichig hiek jaautꞌurtarr kꞌur kꞌãai kꞌapancha kꞌaba nʌm hee,
Mariaau hich naamhũan Elizabed hoon majim haajem Judea durr,
durr dapag hee pꞌöbördam kꞌërʌm hee.
40 Mag petawia,
jöoi Zacarías di haar barwia,
hich naamhũanag,
—¿Jãgpai hʌ Elizabed?
haimajim hanʌm.
41 Mag Mariaau hichig hiekꞌabaichëm hũrbaawai warre hũan Elizabed bi heem chaaita pogogor kꞌabaadëjim hanaabá.
Magbarm dʌ̈i hich hũan Elizabed gaaijã Hẽwandam Hakꞌaar pꞌẽs haicheewai honegau Mariaag,
42 —Kadam,
pʌchta hãba chadcha hʌʌin kꞌapan tꞌʌnʌm hee Hẽwandamau hʌ̈uhcha habarm;
maimua pʌ chaaijã hʌ̈ucha kꞌitajugui hajim hanʌm,
hõor hee Hẽwandam na.
43 Kꞌanii mʌg mʌ hapꞌʌʌ hʌrrʌmua mua kꞌap hʌajĩ pʌ maach Pör hãdkꞌa simua mʌch hoon bëeju.
Hʌ̈u pʌ bëejimgui hajim hanʌm María.
44 Jãguata pʌ hiekꞌabaichëm mʌchdëu hũr hatꞌam dʌ̈i,
mʌ chaai hagtꞌa bi hee kꞌërʌmuajã kꞌaug hatꞌaawai,
tꞌʌgdʌdʌ kꞌabaadëjimgui hajim hanaabá,
honegau.
45 María,
Hẽwandam chogau pʌchig jaauchëtarr hiek pʌchdëu hʌ̈kꞌatarr gaaimua chadcha pʌʌta honee hʌrraju.
Maach Pör Hẽwandamau hich chog dʌ̈i pʌrʌg jaaupʌ̈itarr hiekꞌan tꞌum hichdëu jaautarrjöo chadcha höbëbërgmajugui hajim hanʌm.
46 Magbaawai Mariaau Hẽwandamag jëeumamua magjim haajem:
“Hẽwandam,
pʌchta hãba maar Pör haawai mʌch tꞌãrauchata pʌrʌg hʌ̈u hajim ha hʌm.
47 Mʌ tꞌãar honee hʌm Hẽwandam,
pʌch maar peerdʌajemuata mʌch dʌ̈i mʌgbarm gaaimua.
48 Chadcha puan mʌ dʌ̈i pʌchdëu hampierr haju haai sim.
Hõrau hoowai sĩi mʌg maadëu nem higab hʌrrʌmta pua mʌ jʌr hatꞌam.
Pua mʌ dʌ̈i mʌgbarm gaaimua hĩsmua hatag hich mag hõrau mʌ higwia,
‘¡Maagwai jãg hʌʌi honee kꞌaba hʌabá!’
hajurau.
49 Pʌchdëupaita chadcha maar tꞌum wai dʌnʌm.
Pʌchdëu mʌ dʌ̈i mʌgbarm gaaimua hõrau pʌ jua tꞌeeg kꞌapꞌʌ nʌisiju.
50 Mʌg hatagjã har pʌch hipierraam kꞌʌʌnan hich jãg pua ham dau hee haug kꞌaug paraa chitaju.
51 Pʌ jua tꞌeegjöm kꞌʌʌn chan mʌg jẽb gaai hooba haajem.
Wir haig hamach tꞌöo haajerr kꞌʌʌnjã ya pʌ jua heegar paaukꞌabaadëm.
52 Mʌg jẽb gaai chi tꞌetꞌem tꞌetꞌem haajem kꞌʌʌnjã hiek tꞌeeg chukꞌu hisegkꞌʌʌiwia jũrr hapꞌʌʌ maadëu higbajöjöo kꞌitꞌëem kꞌʌʌnta pua pör pꞌiriupʌ̈imaajem.
53 Hapꞌʌʌ jãdaúa durrumjö kꞌitꞌëem kꞌʌʌnaujã pʌrʌg jëeuwai pua hamachdëu nem hig nʌm tꞌum deejem.
Mamʌ riknaan,
jũrr pua dau haug hee päaijem,
pʌch higba nʌm kõit.
54 Hẽwandam,
pua nawe pʌch hiekꞌatarr kꞌĩir hakꞌooba,
chadcha hĩsta pʌch chognaan israelnaan hʌ̈u heeg hoogpam,
pʌchdëu warrgarwe maar jöoinag jaaujerrjö.
55 Nacha jöoi Abranag jaauwai,
hi chaain hewagam kꞌʌʌn heem hãb tꞌaababarmuata maar peerdʌ hauju hatarr haawai,
hĩs hewag nassi pawiata chadcha hich mag habarm.”
Maga hajim haajem Mariaau Hẽwandamag jëeumamua hi tꞌö hiekꞌatarr.
56 Mag María hich naamhũan Elizabed hoon mawia hi di haig hed tꞌãrjupjö sĩejim haajem.
Mag sĩi hawiata deeu hich diig petajim haajem.
Juan chi hõor pör choomie tꞌaabatarr
57 Mag María hi haig sĩewia petarr kꞌur ya hich hauju hed haadeewai hũan Elizabedau chaai chi hemkꞌooidam hoojim haajem.
Lucas 1:57-80
58 Mag Hẽwandamau hʌ̈u hi heeg hoowia jõorpitarr chaai hatꞌam ha hũrbaawai ham dʌ̈i di dakꞌa naajerr kꞌʌʌnau chi Elizabed kꞌodnaan dʌ̈imua ham haig bëewia hirig,
“Hʌ̈uta Hẽwandamau pʌ chaai hoopibarm;
pʌ chaai gaaimua maarjã honee nʌmgui” haajeejim hanʌm,
jũrr bëe tꞌʌnʌm kꞌʌʌnau.
59 Maimua mag hautarr ocho días haadëm hee,
deeu chi Elizabed haig hi kꞌapkꞌʌʌn dʌ̈i hi kꞌodnaanpa bëe tꞌʌnʌisijierram haajem,
chi chaai mehëudam pꞌʌʌrbichpʌ̈i nʌm hoon.
Mag bëewi chadcha pꞌʌʌrbichpʌ̈ijim haajem.
Mamʌ chi chaai tꞌʌ̃r chi dënnaanau hagtꞌa jaauba narr haawai bigaaum kꞌʌʌnaun chi chaaidamjã hich haai gaaita Zacarías ha tꞌʌ̃rm hig naajim hanaabá.
60 Mamʌ magbaawai chi hãdau,
—Hʌ̃hʌ̃,
hi tꞌʌ̃r chan mag kꞌabam.
Mʌ chaairan Juan hata tꞌʌ̃rjugui hajim hanʌm.
61 Magbaawai hamachdëu jũrr hirig,
—¿Kꞌan jãgwia pua hi mag tꞌʌ̃rm hig hʌ?
Pãar hee hãbjã mag tꞌʌ̃r chukꞌu sĩebahab hajierram hanʌm,
mag gaai hi tꞌʌ̃raag.
62 Magbaawai jũrr chi hayag,
—¿Pʌ chaai kꞌan ha tꞌʌ̃r nʌ?
ha jëeujierram haajem.
Mamʌ mag jöoi meu meraa kꞌitʌmta kachpa kꞌĩ tꞌʌnarr haawai,
jũrram kꞌʌʌnau mag parhooba juau jajaaukꞌamua hichig jëeu nʌm kꞌaug hatꞌaawai,
63 jũrr hich garmua tabaldam jëeuwia,
hag gaai “Hiin Juan hata tꞌʌ̃rju” ha pꞌãnaa,
hamag hoopijim hanaabá.
Mag hoopibaawai tꞌum haig tꞌʌnarr kꞌʌʌnau hamach hödegpai,
“¿Kꞌan hajaug gaaimuata hãba mag gaaita chaai tꞌʌ̃rm hig nʌma?”
hajierram hanʌm.
64 Mamʌ mag pꞌãnaa hirua hoopibarm dʌ̈icha hĩchab hich jöoi Zacarías hiek heerdʌ sĩsijim hanaabá.
Magbaawai Hẽwandamag jëeumamua magjim hanʌm:
—Hʌ̈uhcha jãg pʌchdëu jaautarrjöo habarm,
Hẽwandam.
Mʌ hũan chaai tꞌaabaawaita pua mʌ hiek heerdʌpiju hatarr haawai ya chadcha deeu mʌ hiek heerdʌ chirsim.
Hĩsin chadau mʌch meukꞌudamaucha pʌrʌg hʌ̈u hajim ha chirʌm Hẽwandam hajim hanʌm.
65-66 Mag hoobaawai tꞌum haig narr kꞌʌʌnau,
“Jãan hich hiiuta jãgpibarm” ha kꞌĩirju nʌisijierram hanaabá.
Maimua hërëu pꞌöbaadëwia hamach wënʌrrʌmpierr hamachdëu hoomatarr tꞌum hich mag jajawag wëtmarr haawai Judea durr hee didam hãhãbdö kꞌëkꞌëdʌm heem kꞌʌʌnaupa kꞌakꞌapdö hich mag sĩi bĩi jöisijim haajem.
Mamʌ mag chi jaau wënʌrrʌm kꞌʌʌn hiek hũrmam kꞌʌʌnau tꞌumaa kꞌĩirjuwia hamach wir haigpai,
“Mag chaaidam mʌg hatag jöoipabaadeewai,
¿jãgata kꞌitajuuta mag jaau nʌma,
bʌ̃rʌʌ kꞌitwe mag nʌm?”
haajeejim hanʌm.
Mag,
hich Hẽwandamau bʌ̃rʌʌwe hich kꞌõchagpierr bãaupʌ̈ijim hanaabá.
67 Hich hag hed hagtarr kꞌur nʌʌpai hawia jöoi Zacarías gaai Hẽwandam Hakꞌaar pꞌẽs haicheewai Hẽwandam hi jaaujem kꞌʌʌn dënjö hiekꞌamamua María chaai higwia magjim hanʌm:
68 “Hẽwandam,
hʌ̈uhcha pua pʌch chaain heeg hoowia hĩsin chad maar peerdʌ hawaagpam.
Magua maar honee nʌmgui hajim hanʌm.
69 Warrgar pʌ chog David kꞌakꞌitarr hag chaain hewagam kꞌʌʌn heemta pua chi jua tꞌierr maar hatꞌee pʌ̈ibapʌ̈im,
maar peerdʌ haumkꞌĩir,
70 hich warrgarwe pʌch hi jaaumienau hõrag jaaujerrjö.
71 Hamau jaauwai mag ‘Pʌchdëu pʌ̈ibarmuata maar peerdʌ hauju’ haajeejim,
‘tꞌum maach hoomapꞌa haajem kꞌʌʌn jua heemua,
maimua hĩchab chi dajãumie maach kꞌũgurwia pekau hee burrpieg hẽkꞌa sĩerraajem jua heemuajã hagjö.’
Maagjerr hĩsta hʌ̈u hag hed pabaichëmgui” hajim hanʌm.
72 “Hẽwandam,
pʌchdëu maar jöoin israelnaan dʌ̈i hiek deetarr bʌ̃ʌrjã kꞌĩir hakꞌooba,
hʌ̈u pua maar dau hee haug kꞌaugbarm.
73 Mag hiek deetarr hed pua pʌch hiiucha jöoi Abranag jaauwai,
pua maar peerdʌ hauju hajim,
74 maach hoomapꞌam kꞌʌʌn högkꞌaba,
ni dösãtjã högkꞌaba,
75 hãba pʌch dʌ̈ipai hajapꞌa wënʌrramkꞌĩir,
tag bʌ̃ʌrjã pekau wau wënʌrram hugua.”
76 Mag nacha Mariaau chaai hooju higwia hiekꞌa dichtarr kꞌur jũrr hich chaai higmamuata jöoirau magjim hanʌm:
“Hiewaadam,
pʌʌta Cha Hʌ̃gtꞌaa Pꞌuu Nʌm hag hi jaaumie ha tꞌʌ̃rju.
Puata maach Pör maju hee hi na hõrag,
‘Maach peerdʌajem ya bëeimʌʌ sim’ ha jaaumaju,
ya mag jaaubarm hũrwia hõrau hi pierrwai hamach tꞌãraucha kꞌõsi hi hiek hʌ̈kꞌamkꞌĩir;
77 maimua hamag maach peerdʌajem hiek jaaubaawai hamach kꞌaibag tꞌumaa hãsie hewag kꞌĩirjuwia Hẽwandamag chugpaapi jëeumkꞌĩir.
78 Magaag hatꞌeeta Hẽwandamau maach tꞌumaam kꞌʌʌn kꞌĩir jãsenkꞌawia hich Chaai pʌ̈i sim,
peerdʌju kꞌaugba haawai pöd hʌ̃gtꞌar höbërbaju haajerr kꞌʌʌnpa peerdʌ haumkꞌĩir.
79 Mag hamach peerdʌju pierrum kꞌapꞌʌ haadëmʌn,
sĩi hõor kꞌĩchag hee nʌmjö nʌm kꞌʌʌnau hãspa hurum kꞌaug hatꞌamjö warag hãspapiwia kꞌʌd chaar hee paaukꞌabaadëmjö Hẽwandam dʌ̈i kꞌõinaa wënʌrraju.”
Ma hajim haajem jöoi Zacariaau hich hiek heerdʌtarr hed hiekꞌatarr.
80 Maimua chi Juandam bãaumam dʌ̈i Hẽwandamau hich Hakꞌaarta hi gaai pꞌẽs deejim hanaabá,
hich dʌ̈i hubʌ nʌrrʌmua hich hiek jaau kꞌaug hamkꞌĩir.
Jöoipawia,
hich hap hõor chukag hee warp mawia sĩejeejim haajem.
Maimua Hẽwandamau hich hiek Israelpienag hũrpiju hed haadeewaita chi Juanau hõrag jaaubaadëjim haajem.