6 Nataman, impanguyan ni Isaw ka me asawa rin, me anak, me suluhuanen, me ayam, wey ka langun ne karatuan din ne nakuwa rin diye te Kanaan, wey migdiyu-diyu sikandin te hari rin ne si Hakub. 7 Su kenad egkaayun ne egpalemungey pad sikandan ka eg-ugpe tenged te subla ne dakel ne kasangkapan dan wey ka inged ne in-ugpaan dan kenad eleg tenged te kasalig te me ayam dan. 8 Sikan naa ka miggalin e ensi Isaw diye te me bubungan te Idumiya.

9 Seini ka itulan te me kabuhalan ni Isaw ne migligkatan te me matig-Idumiya ne diye te bubungan te Siir. 10-13 Due lukes ne anak ni Isaw ki Ada ne egngaranan ki Ilipas. Ne si Ilipas, due lalimma ne anak din ne lukes: si Timan, si Umar, si Sipu, si Gatam, wey si Kinas. Duen pad si Amalik ne anak ne lukes ni Ilipas ki Timna, ka duwey rin ne uripen.

Due degma sabeka ne lukes ne anak ni Isaw ki Basimat ne egngaranan ki Riyuil. Ne si Riyuil, due hep-at ne anak din ne lukes: si Nahat, si Sira, si Sama, wey si Misa.

14 Due degma me lukes ne anak ni Isaw ki Uhulibama: si Hiyus, si Halam, wey si Kura. Si Uhulibama ka anak ni Ana ne apu ni Sibyun.

15 Seini ka me kabuhalan ni Isaw ne neyimu ne me pangulu te nalein-lein ne me tribu: si Timan, si Umar, si Sipu, si Kinas, 16 si Kura, si Gatam, wey si Amalik. Me anak sikandan ni Ilipas ne panganey ne anak ni Isaw ki Ada. Ne diye sikandan nangugpe diye te inged te Idumiya.

17 Ka me anak ni Riyuil ne anak ni Isaw ki Basimat, neyimu degma ne me pangulu. Sikandan ensi Nahat, si Sira, si Sama, wey si Misa. Nangugpe degma sikandan diye te inged te Idumiya.

18 Ne neyimu degma ne me pangulu ka me anak ni Isaw ki Uhulibama ne ensi Hiyus, si Halam, wey si Kura. Sikandan ka me apu ni Ana ne amey ni Uhulibama. 19 Sikandan langun ka me kabuhalan ni Isaw (wey ke Idum) ne me pangulu te tribu ran.

20 Due mahinged diye te Idumiya ne si Siir ne Hurihanun. Seini ka ngaran te me anak din ne me lukes: si Lutan, si Subal, si Sibyun, si Ana, 21 si Disun, si Isir, wey si Disan. Neyimu sikandan ne me pangulu te me Hurihanun ne tribu diye te Idumiya. 22 Seini ka me lukes ne anak ni Lutan: si Huri wey si Himan. Ne atebey iya ni Lutan si Timna. 23 Seini man-e ka me lukes ne anak ni Subal: si Alban, si Manahat, si Ibal, si Sipu, wey si Unam. 24 Seini man-e ka me lukes ne anak ni Sibyun: si Aya wey si Ana. (Si Ana ka nakakita te meinit ne me sebseb ne diye te mammara ne inged ne kene egkeugpaan te migpepanabtab sikandin te me asnu te amey rin.) 25 Seini ka me anak ni Ana: si Disun ka lukes wey si Uhulibama ka malitan. 26 Seini man-e ka me lukes ne anak ni Disun: si Himdan, si Isban, si Itran, wey si Siran. 27 Seini man-e ka me lukes ne anak ni Isir: si Bilhan, si Saaban, wey si Akan. 28 Seini man-e ka me lukes ne anak ni Disan: si Us wey si Aran. 29 Ka me pangulu te me Hurihanun ne tribu diye te Siir iyan inse Lutan, si Subal, si Sibyun, si Ana, 30 si Disun, si Isir, wey si Disan ka me pangulu te me Hurihanun ne tribu ne mahinged diye te inged te Siir.

31 Seini ka guhuren meyitenged te me Hari ne migmandu diye te Idumiya te ware pad Hari diye te inged te Israil. 32 Si Bila ne anak ni Biur ka migmandu diye te Idumiya ne migligkat te siyudad te Dinhaba. 33 Te pegpatey ni Bila, iyan nakasubal kandin te migmandu si Hubab ne anak ni Sira ne mahinged diye te Busra. 34 Te pegpatey degma ni Hubab, iyan e man-e nakasubal migmandu si Husam ne matig-Timan. 35 Te pegpatey degma ni Husam, iyan e man-e nakasubal migmandu si Hadad ne matig-Abit ne anak ni Bidad. Sikandin ka migpanalu te pegpabunbunuey ran te me matig-Midiyan diye te inged ne Muab. 36 Te pegpatey degma ni Hadad, iyan e man-e nakasubal migmandu si Samla ne matig-Masrika. 37 Te pegpatey degma ni Samla, iyan e man-e nakasubal migmandu si Saul ne matig-Rihubut ne marani te Iyupratis ne weyig. 38 Te pegpatey degma ni Saul, iyan e man-e nakasubal migmandu si Baal-Hanan ne anak ni Akbur. 39 Te pegpatey degma ni Baal-Hanan, iyan e man-e nakasubal si Hadad ne matig-Pau. Due asawa ni Hadad ne si Mihitabil ne anak ni Matrid wey apu ni Misahab.

40 Seini ka ngaran te me pangulu ne kabuhalan ni Isaw ne nangugpe diye te me inged ne impasangey kandan: si Timna, si Alba, si Hitit, 41 si Uhulibama, si Ila, si Pinun, 42 si Kinas, si Timan, si Mibsar, 43 si Magdiil, wey si Iram. Sikandan ka me pangulu ne kabuhalan ni Idum ne nangugpe diye te me inged ne impasangey kandan. (Si Idum ka dangeb ne ngaran ni Isaw, ka migligkatan te me matig-Idumiya.)